Тыва чогаалга тайылбыр бижик
материал

Тыва чогаалды өөредиринге тайылбыр бижик.

Тыва аас чогаалы, чечен чогаал чоннуң чогаадыкчы салым-чаяанының боттуг көстүүшкүннери болур. Аас чогаалы тыва чоннуң ада-өгбелериниң чүс-чүс чылдарда чогаадып, болбаазырадып келген сөстүң уран чүүлү болур. Ооң эстетиктиг чаңчылдарынга даянгаш, делегейниң улустарының (эң ылаңгыя орус, моол) литератураларының үлегер-майыын эдерип,тыва чечен чогаал 20 чүс чылдың чээрбиги чылдарындан бээр  боттанып келген. Амгы үеде тыва аас чогаалы болгаш литература Тыва Республиканың чонунуң культуразының эң улуг доктаамал эстетиктиг чаңчылдарлыг уран чүүлү болу берген. Ол ам чонну чаагай чаңчылдарга кижизидериниң, өгбелерниң алдарлыг төөгүзүн өөренириниң, келир үеге бүзүреп болурунуң идегелин быжыглаар чепсээ апарган

Тыва чогаалды өөредириниң сорулгалары, кылыр ажылдары.

Аас чогаалы болгаш литература кижилерниң медерелин сайзырадырынга, сагыш-сеткилин байыдарынга, аажы-чаңын хевирлээринге, чоннуң чаагай чаңчылдарын эдереринге аажок улуг салдарны чедирип турар, ынчангаш оларны уран чүүлдүң өске-даа хевирлери-биле холбаштырып өөретпишаан, дараазында сорулгаларны салган:

-Тыва улустуң шаандагы болгаш амгы амыдыралы-биле, хосталга, аас-кежик дээш чоннуң демисежип чораанын өөреникчилерге таныштырар, төөгүчү ёзу-биле угаап өөредир.

-Россияның хөй националдыг улустарының акы-дуңма харылзааларын, кожа-хелбээ чурттар, депшилгелиг чоннары-биле харылзааларын көргүскен чогаалдар-биле чалыыларның интернационалчы, патриотчу кижизидилгезин быжыктырар.

-Улустуң аас чогаалының, литератураның курлавырларын аныяк салгалды чаагай идеалдарга, улусчу моральга, ужур-чурумга, төрээн чуртунга, чонунга, төөгүзүнге чоргааралды, бойдуска, кижиге, дириг амытаннарга гуманисчи хамаарылгалыг болурунга кижизидеринге ажыглаар.

-Тыва литература амыдыралга тура-соруктуг, омак-сергек, бурунгаар чүткүлдүг, хей-аъттыг, күш-ажылга болгаш эстетикага кижизидип, ону алдаржыдып өстүреринге чепсек болур.

-Улустуң аас чогаалының, литератураның теоретиктиг билиглерин амыдыралга ажыглап билиринге өөредир.

-Чогаалдарның идейлиг утказын, уран-чеченин медередип, уран номчулгага быжыг хандыкшылдыг болурунга өөредир.

-Үе-үеде тыва литератураның шиитпирлеп турганы хөй айтырыгларын тыва чогаал эртеминиң башкылаашкынынга чаа чогаадыкчы, тывынгыр, ханы билии, хей-аът киирикчи эрудициязы, бодунуң үлегерлиг чоруу-биле  өөреникчилерниң дилеп тывар, сонуургалдыг  ажылдаарын чедип алыр.