Литературный вечер посвященный творчеству молодого лезгинского поэта Владика Батманова
материал

Ведущий 1: Гьуьрметлу мугьманар, муаллимар ва аялар. Чун къе и гуьрчег залда к1ват1 хьун тажуб кар туш. Вучиз лагьайт1а чи Советский юкьван школада ихьтин шадвилин мярекетар гзаф кьиле тухузва. Къенин чи нубатдин межлис алай аямда еке метлеб авайди я.-------------------------

Ведущий 2:  И гафариз къуват яз заз куь фикирдиз чи машгьур алим Гьажибег Гьажибегован гафар гъиз к1анзава: « Лезгидин сад лагьай ва виридалайни ч1ехи къуват ч1ал я. Агъзур йисар алатнат1ани , гьикьван к1евера гьатнат1ани , чи ч1ал квахьнач. Вучиз лагьайт1а ам дегьзаманрин гзаф къудратлу ч1аларикай я. »

Ведущий 1 : Инсанрин виридалайни зурба яратмишун ч1ал я.Ч1ала чи тарих,  адетар, меденият  хуьзвайвиляй, ч1ал хуьнилай еке ватанпересвал авач.

 Ч1ал – им чан алай шей я.  Адав къайгъударвилелди эгеч1ун лазим я. Дидедин ч1алаз  гьуьрмет авун, адал рахун, кхьин чи гьар садан буржи я.

 « Ч1ал  амай кьван гагьда халкь ама », - лугьузва бубайрин мисалда.

Ведущий 2:

« Къуват я ви дагъдин земзем булахар

 Ви гьевес я цуьквед къацу яйлахар.

  Дагъларин лекь цава гузвай дамахар

       Мадни лувар гужлу хьуй ви дидед хва.

                                    Шад ая Лезгистан,вун гьафил жемир

                                    Рик1е авай хазина ваз гьайиф къвемир

                                    Ви къизилдин  къелем гъиляй вегьемир

                                    Ам Аллагьдин савкьат я ваз, дидед хва».

 И хуш келимаяр , къенин чи шад межлисдин кьилин иштиракчи , чи ч1алан векил, бажарагълу(жегьил) шаир , лезги халкьдин кьегьал хва, Владик Нафирович Батмановаз,Фатима Феталиевади бахшнавайбур я.

Ведущий 1: Квез , гьуьрметлу Владик Нафирович, къе чи мектебдин шад            межлисдал атун хвашкалди.                                                                        

- Квехъ чандин сагъвал, хизанда гьуьрмет , бахт,берекат, къелемдин хцивал хьун чи эрзиман мурад я.

Ведущий 2: 

                                       « Хуьрел шаир хва Владик

Ватан к1ан хьун ква гьиссерик»

 Исятда  чаз гаф гуз к1анзава , квез бахшнавай и ч1аларин сагьиб, лезги ч1алан ва литературадин муаллим , Агъалар Энверович Пашаеваз. Буюр , гаф куьд я ,Агъалар муаллим!

_

Чухсагъул  Агъалар муаллим.        

-Ведущий1:

                      Атайла ви билбилдин сес,

                     Акатда чак ашкъи ,гьевес.

                     Чи манияр ийиз тамам

                     Ша майдандал ,Ашукь Рустам.

Гьуьрметлу Рустам Надирович,куьн галачиз чи са мярекатни кьиле физвач. Къенин, Владик Нафирович Батманован яратмишунриз талукьарнавай межлис, Рустам Надировича  Асеф Мегьманан « Дуствал » манидилай башламишзава

- Чухсагъул Рустам муаллим.

Ведущий 2: 

« Азиз диде, са муштуллух гун  за ваз :

                                   Зи шииррин мярекат жед мукьвара

                                   К1ан  я рик1из куьнни ана авазваз

                                   Бубадизни зи мецелай хабара.

Ведущий 1: 

Физва уьмуьр , физва зунни виликди,

                                   Гьар атай югъ сувар я зи уьмуьрда,

                                   Къелемни чар агуд ийиз гъиликди,

Гьар къан тарих кхьизва за шиирда».

Ведущий 2 : Ша чун гила гьуьрметлу юлдашар Владик Батманован     уьмуьрдиз сейирдиз фин :

- Жегьил шаир Владик Нафирович Батманов 1995 – йисан 16- октябрдиз  Мегьарамдхуьруьн райондин Хуьрелрин хуьре дидедиз хьана. Гьеле гъвеч1и ч1авалай лезги шиирратдал, халкьдин хкетрални манийрал , миск1алрални мисалрал рик1 хьайи Владика эдебиятдиз сифте камар вегьенва. Мектебда к1елзавай йисарилай ада ширар кхьизвай. Хайи ч1алал рик1 алай , адан къадир чизвай жегьилди яратмишзавай шиирар «Лезги газет» , « Самурдин сес» газетриз акъатзава . Ада  сифте теснифай «Билбил» т1вар алай шиир  2011-йисан «Самурдин сес» газетда чапна.

.

- «Билбил» шиир к1елда   Ханум Карахановади.

Ведущий 1:  2012 – йисуз адан сад лагьай шииррин к1ват1ал « Билбил» т1вар алаз чапдай акъатна.

Алай вахтунда Владик Батманова Дагъустандин Гьукуматдин университетдин магистратурада ва заочнидаказ Социально- педагогический институтда к1елзава, гьа са вахтунда Дагъустандин радиода лезги ч1алалди «Дагъларин уьлкве» передачани тухузва.

Ведущий 2: Ам Вирироссиядин I « Дидед ч1ал» конкурсдин гъалибчи , Юсуп Хапалаеван премиядин лауреат, «Самур» т1вар алай литературный кружкодин председатель , Вирироссиядин «Хайи ч1ал» конкурсдин гъалибчи, « Йисан шаир» премиядин номинант, Магьарамдхуьруьн

« Жегьилрин парламентдин депутат», Дагъустан Республикадин кьилин стипендиядиз лайихлу хьана.

 2017-йисуз Дагъустандин ктабрин издательствода шаирдин « Чубарук» ктаб чап хьанва. Къуй квез генани еке агалкьунар хьурай!

Ведущий 1: Владик Батманов манийрин текстерин авторни я. Адан шиирриз авазарни кхьенва ва чи бажарагълу манидарри тамамарзава.

Исятда квез  Карибов Анзора «Диде» мани тамамарда. Гафар Владик Батманован.

 -Чухсагъул, Анзор.

Ведущий 2: Ша, гьуьрметлу юлдашар, чун гила Владик Батманован яратмишунрихъ галаз мукьувай  таниш жен.

«Кхьизва за» шиир, к1елда   Диана Султановади:

Зи  муг , зи кьеб Хуьрелрикай,

                                        Жуваз таниш гуьзелрикай

                                        Авадан пак чуьллерикай

                                        Даим ч1алар кхьизва за.

                                         Стхайрикай , вахарикай,

                                         Акур ширин ахварикай,

                                         Заз ван жезвай хабаррикай

                                         Даим ч1алар кхьизва за.

                                         Играми тир дидедикай,

                                         Заз гайи пак нек1едикай,

                                         Ада ч1угур «шеледикай»

                                         Даим ч1алар кхьизва за.

                                        Ярдин къешенг бедендикай,

                                         Саздикайни кемендикай,

                                         Ашукьрикай, шаиррикай,

                                         Даим ч1алар кхьизва за.

Ведущий 1: Чухсагъул.

                            « Азиз диде, ви зегьметар пара я,

                            Ви лайлайдин ван даим заз чара я,

                            Къе зав гвайди ви алхишрин хара я,

                            Зун уьмуьрлух буржлу я ваз , чан диде!»

« Гьайиф , диде кьуьзуь жез…» к1елда   Камила Рамазановади.

«Дидед хатур хадач за…» к1елда Зульфия Алимирзоевади.

Ведущий 2:

                  « Диде чан зи, тек са югъ вун авачир

                  Ирид йисай фейиди хьиз хьанвай заз.

                  Чан аламаз дидед  къадир жедач чир,

                  Са бязибур гьарай  ийиз жеда ваз».

« Мурад  тир хва ахкун садра ..» к1елда, Сувар Османовади :

-Чухсагъул.

- Гьуьрметлу юлдашар, Владик Батманован эсеррай чаз халкьдин мецин эсерриз мукьвавални аквазва. «Жегьил рушар» макьамдин сегьне тамамарда 8-классдин рушари: Регина Габибовади, Диана Султановади, Диана Гасретовади, Аният Ахмедовади .

Ведущий 1: 

                     « Зи лезги чил, вун заз багъри диде я,

                        За нек хъвана а ви михьи хуралай.

                        Заз Самур вац1,  к1вални-уба вине я,

                        Багьа зат1 жеч верц1и лезги  ч1алалай.»

- « Лезги ч1ал» шиир к1елда Диана Гасретовади.

-  « Агь, Самур вац1, Самур вац1» шиир к1елда Эмиля Керимовади.

- «Ватан» шиир к1елда  Асият Забитовади.

- « Лезги ч1ал» шиир к1елда  Зульфия Алимирзоевади.

-«Лезгияр» шиир к1елда Лейла Рагимхановади.

Ведущий 2: «Гьуьрметзамач,салам гузмач ч1ехидаз,

                        Вич тухудай къайда чизмач ч1ехидаз,

                        Диде-Ватан ,к1вал-югъ чидач гижидаз

                       Дуьнья акваз рик1 т1ар жезва,азиз дуст,

                       Рик1 гъамари къеняй незва, азиз дуст»

- Исятда квез, гьуьрметлу тамашачияр,чи школадин   аялри    «Илчияр» сегьне къалурда.Сегьнедин автор Ферид Вагабов .

                              Иштиракчияр:

                                 Керим -                                

                       Шихали -

                                 Абидат-

                                Султанат-

                               Айишат-

                                Мирзяли-

                                Эмина-

Ведущий 2:  Чухсагъул, къуй куьн гьамиша шад хьурай ва ихьтин шад мярекатра иштиракрай.

      Ведущий1: «Чуьнгуьр» шиир к1елда  Индира Вагабовади.

--                           -Ви манияр алаз мецел

                               Гурлу я къе мехъерни мел.

                              Чун лап шад я атунал вун

                              Ашукьдин хва Ашукь Айдун!

Азиз дустар ,Ашукь Айдунни къенин чи шад межлисдин багьа мугьманрикай сад я.

Т1алабзава квевай гурлу капаралди къаршиламишун.

Гьуьрметлу  Ашукь  Айдун ,  гаф куьд я.

Ведущий 2: Мани «Кваргичин» тамамарда ,«Лезги сес» конкурсдин гъалибчияр : Ашукь Айдуна  ва чи школадин урус ч1алан ва литературадин муаллим   Хасплатова Эсвира Эмиргамзаевнади

-Лап чухсагъул .Куьне чи межлис гурлу авуна.Куь алакьунар генани артух хьурай!

Ведущий 1: «Къе лезгияр лезги ч1алал рахазмач,

                       Муаллимдиз гьуьрметдай кас аквазмач

                       Лезги ктаб лап гъилени гьич кьазмач.

                       Вун идаз гьик1 килигзава, азиз дуст

                      Квачирди вахъ гилигзава ,азиз дуст».

-- «Дегиш хьанва» шиир к1елда  Регина Габибовади.

--«Аквазва вилералди» к1елда Аният Ахмедовади.

--«Жеда бязи рушар» к1елда  Ирена Рагимовади.

--«Наркотикриз ваъ лагь куьне» к1елда Зарема Мирзебасовади.

--«Зи т1варц1икай» шиир к1елда Амина Балиевади.

Ведущий 2:   Чухсагъул.

                     Ша гьуьрметлу дустар,чун гила чи школадин аялрин  «Зарафатдин кимел» мугьмандиз фин. Майдан куь ихтиярда ава!

(Школадин КВН-дин командади чпин сегьнеяр къалурда)                                                                        

-- Куьне чун гзаф шадарна.

    Зарафатни хъуьруьн галачиз инсанар фад кьуьзуь жеда,лугьузва бубайрин мисалда.Гьелбетда, дуьз гафар я.

Ведущий 2:

 И гафариз къуват яз,заз куь фикирдиз шаир Сажидинан «Темпелдин хиялар» шиир к1елайла,Владик Батманова кхьей ч1алар гъиз к1анзава.

«Гьайиф….» тамамарда Шарафудин Асварова

Ведущий 2: Чухсагъул  Шарафудин.

                      «Садрани вун зи рик1елай алатдач,

                        Вакай даим заз зи рик1е рагъ жеда.

                        Ви акунар зи фикирдай  акъатдач,

                        Вун амай кьван зунни даим сагъ жеда»

--« Ви мехъерик» шиир к1елда  Имам Махмудова.

--«Эхиз  жезмач т1ал завай»  к1елда  Навруз  Гашимова.

- Чухсагъул.

Ведущий 1: Нубатдин мани, премьера «За ваз темен гайи ч1авуз» тамамарда урус ч1алан  ва литературадин муаллим  Хасплатова Эсвира Эмиргамзаевнади.

Гафар Владик Батманован . Гьава Эсвира Хасплатовадин.

--Лап чухсагъул,Эсвира муаллим , куь сес генани хци хьурай !

Ведущий 2:

            Агь,за вучин,кьазвач хабар

            Тек са к1екре зи рик1икай.

            Гьяддин къузни гудач  ахвар,

            Гьарайиз жед ваз к1аникай.

«К1екрез» шиир к1елда Хадижа Габибовади.

-Баркалла ваз,чи гъвеч1и дуст,Хадижа руш! Вуна чун лап гьейранарна.

«Асиятан жалоба» Байрам Салимован шиир к1елда Агьизар Асварова.

Ведущий 1:

Гьуьрметлу, Шакир Магарамович , куьнни чи гьевеслу  манидаррикай сад я. Чун инанмиш  я, къе и шад межлисдал  куьне чаз , куь хуш сесин аваздихъ яб акалдай мумкинвал  гуда .Буюр, Шакир муаллим!

«Геджелер» Эльза Ибрагимовадин аваз.

Ведущий 2:  

Исятда чаз гаф гуз к1анзва, къенин чи  межлисдин тахсиркар ,чаз    и шад межлис кьиле тухуз мумкинвал гайи, чи лезги эдебиятда ц1ийиз ва экуьз  куьк1венвай гъед ,шаир Владик Нафирович Батмановаз.  

-Чухсагъул.Куьн генани еке дережайрив агакьрай!

Ведйщий 1:

 Гьуьрметлу Владик Нафирович, куьн чаз мугьман жеда лагьайла,

                      аялри и хабар гзаф шаддиз кьабулна.Абур гьевесламиш хьана.

                       Чи школада чаз малум хьанва, шиирар туьк1уьрунал машгъулвал авай кьве аял.Абуруз шад жедай, куьне  абуру сифте къачузвай  къадамриз къимет ганайт1а .

Теклифзава аялриз сегьнедал атун:

-Гуьлера  Балиева ….

-Сувар Османова….

Ведущий 2:Нубатдин гаф чаз чи школадин директор Агахан Камиловичаз гуз к1анзава.

-Агахан Камилович :-----

-Чухсагъул Агъахан Камилович.

Ведущий 1: Гьуьрметлу Владик Нафирович,и шадвилин дуствилин лишан яз, чаз квез чи  гуьруьш рик1ел амукьдай савкьат багъишиз к1анзава.

Ведущий 2:

Къе куьнни ,гьуьрметлу Ашукь Айдун  ,сад лагьай сефер яз чи школадиз мугьман хьана,куь ширин сесиналди куьне чи межлис мадни ч1агурна.Имни квез чи патай рик1ел аламукьдай  са савкьат.

Ведущий 2: Вирибурун  т1алабунралди  и гуьруьш  куь са манидалди давамар хъийин.Буюр Ашукь Айдун.

Гьуьрметлу мугьманар ва иштирак авур аялар ,квез виридаз  чухсагъул.

Билбил

Гьар са иинсан я вал гьейран,

Чагъдава вун гьализ девран,

Акурлахъди дигай бустан,

Хкажда на ви сес билбил!

Виринра ви ава тариф,

Куьтягь жезвай гатфар гьайиф.

Тахьурай гьич ви  ван зайиф,

Чи гуьгьуьлдин гьевес, билбил.

Гьикьван  хьурай  кьакьан тарцел,

Ша зи патав,ацукь къуьнел.

Вавди рахаз ширин мецел.

К1анзава зи рик1из,билбил.

Гьиниз физва лув гуз цавуз,

Туна багъда зун ик1 ялгъуз

Мугь ман хьухь заз,мани лугьуз,

Санал девран гьалин билбил!

    Гьайиф,диде кьуьзуь жез…

Сагъ тежер хер авазва хьи зи чанда,

  Кьуьзуь жезвай диде акваз пашманда, 

Ам амукьна к1ан я к1вале, ватанда,

Гьайиф,гьайиф,къе зи диде кьуьзуь жез,

Адан ч1улав яргъи ч1арар рехи жез…

Зи мехъер югъ акурай ваз чан, диде,

Ви тостунин ван гьат хьурай чи хуьре,

Эхь ,амукьда ви акунар чи рик1е,

Гьайиф,гьайиф къе зи диде кьуьзуь жез,

Адан ч1улав, яргъи ч1арар рехи жез…

Диде… Валай мукьва касни заз авач,

Вун хьиз ширин гьич са инсан зав рахач,

Ви хьиз рик1ел зун саданни гьич алач,

Гьайиф,гьайиф, къе зи диде кьуьзуь жез,

Адан ч1улав яргъи ч1арар рехи жез…

Аял ч1авуз вичин чими къужахда

Чун ксуриз,хьанай диде к1валахда.

За дидедал гьамишанда дамахда,

Гьайиф гьайиф ,къе зи диде кьуьзуь жез,

Адан ч1улав яргъи ч1арар рехи жез.

Яхц1ур йисав агакьнава яшар ви,

Шагь дагъд кьил хьиз, рехи хьанва ч1арар ви,

За дат1ана хуьда рик1е пак т1вар ви,

Гьайиф ,гьайиф къе зи диде кьуьзуь жез,

Адан ч1улав яргъи ч1арар рехи жез.

Владиказ к1анда диде нефес хьиз,

Багъда авай билбилдин хуп1 гьевес хьиз.