"Прилагательнойтне - валрисьмесэ".
план-конспект урока (6 класс)

Уроконь темась: «Валрисьмесэ прилагательнойтнень таркаст».

( Е. Четверговонь «Сырнень човалят» книганзо  тевс нолдазь»).

Вешематне:  келейгавтомс содамочитнень прилагательноенть  коряс; ванномс прилагательноенть валрисьмесэ тарканзо; кастомс вечкеманть эрзянь келентень, ловномантень; кастомс тонавтницятнень мелест бажамо ламонь содамо,  пертьпельксэнь мазычинь нееме, ялгань кунсоломо.

Планируемой результаттнэ:

Эйкакштнэ мельс ледстясызь прилагательноень коряс материалонть, тонадыть сонзэ текстстэ муеме , пельксэнь- пелькс явномо ды кортамосо тевс нолдамо.

Кармить бажамо седе ламонь содамо прилагательноенть коряс

Тонадыть пертьпельксэнть мельга ванномо, курова важодемстэ ялгаст кунсоломо.

Оборудованиясь: компьютер, мультимедийной проекторось, «Сырнень човалят» книгась,карточка лангсо текст.

Уроконть молемазо

I.  Уроконтень анокстамось.

    Тонавтыцянь вал.

           Шумбрачи, эйкакшт! Течи миненек  састь инжеть, шумбракстнетяно инжетнень марто. Ушодсынек паро мельсэ  эрзянь келень уроконть.

 (Слайд)    II. Уроконь темас совавтомась.   Течинь уроконть ули мелем ушодомс   минек велень сермадыцянть Ольга Силантьевань  стихотворениянь строчкатнесэ:

Мон пек вечкса тиринь келем,

Сон максы монень лембе.

Сонзэ марто кись монь келей,
Пингесь валдо ды кеме. 
 

-Кода корты сермадыцясь тиринь кельденть?

(Сермадыцясь тиринь кельдензэ сермады вечкезь. Тиринь келесь  макссь тензэ эрямодонть содамочить, секс пингезэ валдо ды кеме.)

-А кона валтнэ мазылгавтыть стихенть?                                       

 -Муинк прилагательнойтнень.

 -Ледстинка,  кодат ёнкст  невтить прилагательнойтне?

       -Кода явовить прилагательнойтне смустень коряс? (качественнойть ды относительнойть)

III. Од материалонь тонавтнемась.

1. - А ней, эйкакшт, ванынка,  валрисьмень  кодамо кортамо пельксэкс карми улеме  прилагательноесь васенце валрисьмесэнть? (Определениякс)

-  Косо сон ашти? (Существительноенть икеле).

Омбоце валрисьмесэнть мезекс кармить прилагательнойтне?

-Косо тарказо прилагательноенть, бути сон ашти сказуемоекс? (Существительноенть мельга)

- Кода сюлмави сказуемоесь подлежащеенть марто? (Подлежащеенть марто сюлмави числань ды лицянь коряс).

2. Уроконь теманть ды вешеманзо ёвтамось.

- Эйкакшт, а мезде карматано кортамо уроксо? ( Карматано кортамо  валрисьмесэ прилагательнойтнень таркадост)

 Мезе  карматано тееме уроксо?

( Келейгавтсынек содамочитнень прилагательноенть  коряс; ванносынек   прилагательноенть валрисьмесэ тарканзо)

(Слайд)Сермадсынек тетрадьс числанть ды теманть.

3. Учебник марто важодема.  Ловнови 27-це параграфось.

-Видестэ-аволь кортынек прилагательноенть коряс, вансынек учебниксэ максозь материалонть. Ловносынек 27-це параграфонть.

-Эйкакшт, весенень чарькодевсь  материалось, кевкстеманк улить? Бути арасть, мольтяно седе тов.

(Слайд)IV. Кемекстамо

1.   Кавтонь- кавтонь важодема. Максозь прилагательнойтнень совавтынк валрисьмес истя: васенце валрисьмесэнть сынь улевельть определениякс, омбоцесэнть – сказуемоекс.

Лопав, тикшев,  севонев.

1. Лопав виресь тердсь эсензэ мазычисэнзэ. - Яннэсь ульнесь лопав.
2. Тикшев лугатнесэ кассть мазый цецят. – Пандятне тикшевть.
3. Сёвонев моданть ланга касыть васень цецят. – Тонь кедеть сёвоневть.

(Слайд)2. Курова важодема

-Эйкакшт, прилагательнойтнень покш смустест кортамосонть, художественной литературасонть. Прилагательнойтне сайневить произведениясо героенть портретэнзэ, ёжомарямонзо невтемстэ, потмоёжонзо панжомсто. Седеяк покш тарка саить прилагательнойтне пертьпельксэнть ёнксонзо невтемстэ.

     Важодеме карматано куросо. Тынк икеле карточка лангсо максозь текст.

Заданиясь: 1-це куронтень-Совавтодо текстэнть эйс смустень коряс ладиця прилагательнойть. 2- це куронтень- муемс прилагательнойтнень, евтамс, кодамо валрисьмень пельксэкс кармить улеме.

1 к. Кузсь сэрей пандо пряс. Васов тайгань пертьпельксэсь неяви. Ков а варштат-тусто вирь. Певтеме тайганть прок пезэяк косояк арась. Касыть сэрей чувтотне сядо иеть пшти узерень апак вача. Кувака пингест печтясызь-сяворить, наксадыть. Празь чувтонть кияк виде рунгонзо а токасы, чуросто ансяк охотник эли вирень ракша эскельди троксканзо.

Арсинк эсь юткованк, кие карми кортамо.

- Кодамо лезэст неть текстнэсэ прилагательнойтнень?

( Прилагательнойтнень вельде невтеви  пертьпельксэнть мазычизэ).

2 к. Читне экшендсть. Течи-ванды пры лов. Пувить якшамо вармат. Лопавтомо сорныть Сибирень тоща килейтне. Ансяк сэрей пичетне, рацяня кедратне ды пиже кузтнэ аштить лембестэ оршазь. Сынь а пелить сёксень кежей варматнеде, а пелить Сибирень телень якшамо читнеде.

-Эйкакшт, кода важодиде куросо?

-Кодат неть тексттнэнь типест  - повествования, описания или рассуждения?

-Эйкакшт, ледстясынек, кодамо произведениясто саезь неть пелькстнэ? «Кедровой пештть»).

 -Кие сёрмадыцязо ёвтнеманть? (Петр Семёнович Глухов. )

Виде, эйкакшт, эзинк стувто. Пётр Семёнович Глухов ульнесь мокшэрзянь сёрмадыця, а косто сон содасы истя вадрясто тайгань пертьпельксэнть?  (Глухов чачсь Чувашиянь Малые Кармалы велесэ. Тетязо – авазо ды сонськак ульнесть эрзят. Сон од пингестэ туекшнесь Магнитогорск ошонь металлургической комбинатонь строямо, секскак тайгань пертьпельксэсь ульнесь тензэ содавикс).

-Эйкакшт, «Кедровой пешть» евтнеманть лемсэ ули прилагательной?

3. (Слайд) Налксема «Кие ламо соды? » Тиринь литературасто ледстятано произведеният, конатнень лемсэст улить прилагательнойть.  Кона курось седе ламо соды?

(«Пештень тарадке», «Вишка партизан»,  стих «Чачома край», ёвкс «Од ава», басня «Чаво Колоз», «Ёжов ривезьке», «Сермав каткине», «Вирень вайгельть», «Солдатонь ава»).

4. Оймсема ютко.

Эйкакшт нама сизиде, оймсемань кисэ аламос налксетяно. Стятано парта бокас. Минь парсте содасынек существительноенть, ней содасынек прилагательноентькак. Бути ёвтан существительной, ландятадо, бути прилагательной цяпадтядо кедьсэ пря велькссэ.

Ловов, якшамо, теле, маней, чувтотне, ванькс, чикась, од, мазый, китне, сэтьме, кудотне.

(Слайд) 5. Исследовательской важодема.

Катя Иванова кудосо  тейсь  исследования Поводелень тейтерь-аватнень оршамотнеде. Макстано вал тейтернентень.

-Катя, лездась тенть кияк важодемстэ?

- Катя, кодамо лезкс  тонеть  макссть прилагательнойтне важодемстэ?

Вывод: ( Прилагательнойтне лездасть монень оршамопелень описаниянь максомсто: тюсонь, материалонь невтемстэ).

Кель-валонь кастомань лангсо важодема. Тонавтыцясь:

- Прилагательнойтнень ланга кортамсто минь седеяк пек марясынек , кодамо мазый, гайтев эрзянь келесь.  Сонзэ вельде минь карминек содамо пертьпельксэнть. Нама, пек паро, зярдо ломанесь соды лия кельтькак: рузонсенть, немеценсенть ды лият. Сынь седе келейгавтсызь ломаненть содамочинзэ пертьпелькстэнть, теевтьсызь содавиксэкс лия народтнэнь эрямочист дыкультураст марто. Ансяк а эряви стувтнемс седее, што ансяк  тиринь келенть вельде пачкодят лия кельтненень. Нама, улить ютксонок ломанть, конат виздить кортамо тиринь кельсэ. Ансяк сынь, монь койсэ, эсест пряст тейнесызь пеетькшнема таркакс. Кунсолынк, мезе сермадыть теде минек поэттнэ.

(Слайд)Маризь Кемаль «Импортной панар».

(Слайд) А ней налксезь ладсо невтьсынек Н. Ишуткинэнь стихотворениянзо «Инже».

 «Кортак састо, вант, илядызь маря,

Иляст арсе: минь мартот а рузт», -

Церась валтнэнь пельс нильнезь тапарясь,

Сонсь авнзо ве енов сайсь-усксь.

Виздемадонть, марявсь, церась нейке

Анок ульнесь мастор алов прамс.

Мелезэнзэ пек эзь тукшно вейкесь –

Мейс аванстэнь ошов эрявсь самс.

Витнесь копорьсэнзэ стака канстонть, -

Велень ава, а ён таркас понгсь:

«Цёрынем, а эряволь монь вастомс,

Паз максоволь – пачкодевлинь монсь.

Иля мурне, иля сёвно эйсэнь,

Вельть тошнакадынь кисэнк, тон кемть.

Ошсо стака – маряса седейсэ,

Вана пурнынь – сэрнинь казнеть тенк…»

Неия тень весементь эсь сельмсэ –

Потмаксос колавкшнось мель-ёжом.

Чиськак теке чополгалесь велькссэнь –

Истя тень ульнесь берянь, а ён.

Секс, нать, аванть валонзо-ризксэнзэ

Ормакс педясть-вачкодевсть монь эйс…

Свал икелем – нусманя сельмензэ,

Сынь ваныть, ваныть видьстэ седейс.

  -  Ёвтынк, мезень кис ризныть эрзянь поэттнэ?

- Савкшнось ли тыненк визделгалемс тиринь кельсэ кортамодонк?

Содатано: эрзятнестэ лиссть превей ветицят, виев тюрицят, ламонь содыцят, гайтевстэ морыцят.

   Секскак миненек эряви каштансто кандомс прянок  эрзянь келенек кис.

     Эряви меремс, улить истят  ломанть, конат ламо вийть максыть эрзянь келень ванстомантень. Истятнэстэ вейкесь минек буень сермадыцясь

   (Слайд)   Е.В.Четвергов (псевдонимезэ Нуянь Видяз) чачсь 1934 иестэ Дубёнка ёнксонь Орданьбуе велесэ. 1994-2016 иетнестэ ульнесь «Эрзянь мастор» газетань редакторокс. 

   «Сиреневая луна» васенце книгазо лиссь 1989 иестэ. Теде мейле – «Велень вайгельть», «Сырнень човалят», «Иень тюст», «Янгамо», «Где цветёт чистодуш», «Эрзянь масторонь седейсэ. Имена их бессмертны», «Эрязденть арсезь», «Ванине», «Тесэ ды Тосо», «Финно-угры в русском языке». 
 Ней аноксты одс нолдамс «Сырнень човалят» книганть, ков совить эрзянь кезэрень ды неень шкань валтнэ.
 (Слайд)  Сырнень човалят: Стувтовозь ды чуросто вастневиця валт. — Саранск: Мордовской книжной издательствась, 1994. —208 с. — Мордов. -эрзя яз. (Четвергов Е. Золотые бисеринки. ) Кода корты сонсь сёрмадеесь: «Эрьва валось — сырнень човаля, чинть каршо кувтолдыця-налксиця ведьбовне. Емась сон, стувтовсь — емавтынек мазычи. Муинек одов, лецтинек — сюпалгадынек»  Четвергов Евгений снартызе максомс од ойме стувтовозь ды кезэрень пингень эрзянь валтнэнень.

(Слайд)Кармавтома. Проект.

-Эйкакшт, тейтяно   аволь покш проект, конань лемдясынек « Тикшень мастор», лезксэкс карми тенек улеме «Сырнень човалят» книгась.

Ловнан эсензэ Е.В. Четверговонь «Уцяскаван!» ледстнемастонзо саевкс:  

…Лисян пирев, ютан келей лугава. Вана кончтни ожо сельминесэнзэ цивцясь. Вакссонзо прянзо чиремтни, терди алтюжа сезялтикшесь….Кочкан телень чаекс арвотикше, варяв лопат ды чавканьпрят.

(Слайд) Пректэнть тейсынек максозь планонть коряс.

1 пельксэсь.  Кона валтнэ асодавикст?

  2. Мезе невти те валось?

3. Рузонь кельс ютавтомазо.

  3. Арседе неть валтнэнь  марто валрисьметь.

Вансынек, кода толкови неть валтнэнь смустест Евгений Четвергов.

Тонавтницятне важодить словаренть марто.

-Вансынек, мезе минек лиссь.

(Слайд) Цивцясь – Донник желтый- медонос. Сезялтикшесь – пижма, лециця тикше.

Арвотикше – душица, моли чайс. Варяв лопа – зверобой, чаекс паро.Чавкань

пря – клевер красный, ракшань андомапель.

-Арседе неть валтнэнь  марто валрисьметь.

- Эйкакшт, кода арсетядо , паро лезкс макссь тенек «Сырнень човалят» книгась?

5. Рефлексиясь.

-Эйкакшт, мелезэнк тусь, кода важодинек течи уроксо?

-Ледстясынек, мезе минь карминек содамо  одонть прилагательнойденть?

(Течи минь мельс ледстинек прилагательноенть, карминек содамо, зярдо прилагательноесь эрси определениякс, зярдо сказуемоекс,  кодамо лезэст текстсэ  прилагательнойтнень).

- Мезекс кортамосонть эрявить прилагательнойтне?

(Прилагательнойтнень марто минек кортамонок мазылгады, прок вельми, тееви эрьва кодамо тюссо мазылгавтозь артовкс)

 (Слайд) 6. Кудов кармавтома.

1. П. 27. Упр. 221или максодо описания ялгать эйстэ.

7. Меельце валось.

Эйкакшт, минь уроконть ушодынек эрзянь кельденть кортамосо, прядомскак кортамонок ули мелем поэтэнть Дмитрий Тагановонь стихотворениясо:

Кепедик мазый эрзянь валонть –

Сон цитни видьстэ тонь пильгало.

Тон иля юта вакска.

Тон сонзэ ладик теште ладсо,

Конатне менель кирьксэнть ацыть,

Ды иляк стувто ванстомс.

Совавтодо текстэнть эйс смустень коряс ладиця прилагательнойть.

 Кузсь …   пандо пряс. Васов тайгань пертьпельксэсь неяви. Ков а варштат-…    вирь. …       тайганть прок пезэяк косояк арась. Касыть …   чувтотне сядо иеть …      узерень апак вача. …      пингест печтясызь-сяворить, наксадыть. Празь чувтонть кияк виде рунгонзо а токасы, чуросто ансяк охотник эли …  ракша эскельди троксканзо.

Валтнэ: сэрей, тусто,певтеме, сэрей, пшти, кувака, вирень.

Арсинк эсь юткованк, кие карми кортамо.

- Кодамо лезэст  текстсэ прилагательнойтнень?

Муемс прилагательнойтнень, евтамс, кодамо валрисьмень пельксэкс кармить улеме.

Читне экшендсть. Течи-ванды пры лов. Пувить якшамо вармат. Лопавтомо сорныть Сибирень тоща килейтне. Ансяк сэрей пичетне, рацяня кедратне ды пиже кузтнэ аштить лембестэ оршазь. Сынь а пелить сёксень кежей варматнеде, а пелить Сибирень телень якшамо читнеде.