Урок – путешествия "Вирь Ордаж вели".
план-конспект урока (5 класс)

   МБОУ «Темниковская средняя общеобразовательная школа имени Героя Советского Союза А.И.Семикова»

             Панжада   урок

         Урок – путешествия

           Вирь  Ордаж вели.

                                Етафтозе Уткина М.П.

                                        мокшень кялень и        

                                        литературань

                                        тонафтысь

                                        5-це классонь

                                        тонафнихнень

                                        мархта.

                          2019 к.                               

 Цельхне:

                1.крхкалгофтомс шабатнень содамошиснон Вирь Ордаж

                 велеть историянц, койнзон, обуцянзон колга;

                2.тонафтомс мяляфтома панчфнень, нармоттнень,

                тишетнень, животнайхнень, мокшень щапнень лемснон;

                3.касфтомс кельгомать шачема ширети и ванфтомс сонь.

   Оборудованиясь:

                                   мокшень сире щапт, ки няфтемань карта,  

                                   билетт  задания мархта, карточкат, картинкат

                                   лия райононь щамса, магнитофон,

                                   И.В.Сорокинонь «Вирь Ордажсь» картинац,

                                  альбом фотография мархта, видеокассета,

                                  слайтт, коське тишень пусмот, лихтибрянь ведь.

                        Урокть молемац.

 1. Оргмоментсь.

-Шумбратада, шабат! Озада!

Тячи минь мархтонт етафттама аф обычнай урок, а урок-путешествия.(Учительсь наряжаф мокшень щамса).

-Шабат, ваномок монь щамозень лангс, пади, тинць шарьхкодьсасть, кодама району минь мольхтяма путешествияс?

-Кодама районца якайхть тяфтама щамса? (Кда шабатне аф содасазь, учительсь азсы сонць). Да, тяфтама щамса якайхть Темниковскяй районца.

2. Викторина «Мокшэрзянь шапне».

Учительсь наряжаф мокшень щамса (ожакиса, крганяса, кушакса, кудряса, пунялентаса, гарсовайса, жилеткаса, цюлкапочкса).

Шабатне азондсазь щапнень лемснон.

Азондови кудрятнень колга: мокшетне кунаркиге кельгозь толгань кочксемаснон. Ня толганятнень мархта мазопнезь щамснон и кудботмоснон. Сидеста васьфневсть толгатне мокшаватнень мазы серма мархта щамсост. Тиендсть эздост украшеният, конатнень каннезь иласта.  Фкя мокшень тяфтама наряжамбяльть лемдезь - кудрят.

3. Валонь работа.

Учительсь няфти карточкат, коса серматфт ня сире щапнень лемсна. Шабатне сермадсазь тетрадезост ня валхнень и мяляфтсазь.

4. Темниковскяй райононь щамть сравниндамац лия райононь щапнень мархта (Зубово-Полянскяй, Атюрьевскяй, Торбеевскяй, Краснослободскяй и лия).

(Няфтевихть картинкат).

-Мезьса наряттне фкат, а мезьса аф фкат? Азондови, што фкя лацот ожакись, сермадомань сюретне и стафкссна.

(Учительсь азонды Атюрьевскяй райононь щамть колга).

-А срхкамда инголе, шабат, эрь ина арьсетяма, кодама канкс тейнек эряви сявомс мархтонк? Конешна, инь эрявикс канкссь киса-тя содамошиньке. Мон надиян, што канксонте сембонь стакат.

-А кодама путешествиясь ки няфтема картафтома?

-Шабат, ванода лацкас доскать лангс. Тяса няфтьф ки няфтемань картаньке. (Доскать эса повфтаф ки няфтемань картась).

-Путешествовандама, шабат, минь карматама автобусса. А штоба озамс автобусти, тейнек эрявихть билетт.

(Учительсь яви сембе шабатненди билетт, коса серматфт заданият. Азондомс рузкс,мокшекс, кда содасазь, эрзякс: шуфттнень, панчфнень, животнайхнень лемснон).

(Шабатне отвечайхть мельцек заданиятнень лангс).

-Шабат, билетт сембе сяводе? Озада лацкас. Путешествияньке ушедсь.

-Шабат, а кодама путешествиясь морофтома?  Эрьда морасаськ сембонди содаф и кельговикс мокшень народнай мороть «Луганяса келунясь».

(Мороть кафта куплетонзон морамасна магнитофононь записть коряс).

5. Темников ошть колга азондомась.

-Вов, шабат, арттама инь сире Мордовиянь Темникав ошть вакска. Козя ошсь эсь содаф композиторонзон, поэтонзон, легендарнай и мужественнай Алена Арзамасская-Темниковская авать, Российскяй Флотонь адмиралть Ф.Ф.Ушаковонь лемонц, краеведческяй музейть, П.Г.Смидовичень лемса Мордовскяй государственнай заповедникть мархта. Лама нинге азолень ба, но пачкодеме Вирь Ордаж велети.

6. Картинань коряс работась.

   (Няфтеви картина « Вирь Ордаж велесь», конань сермадозе велень художниксь И.В.Сорокин). (Учительсь азонды велеть колга).

- Мезе няйхтяма васенце планть эса?  (Церькавть).

(Церькавть колга легендать азондомац. Слайдонь няфтемась).

   -Азонкшнезь сиретне, што тя ульсь пяк кунара. Велеть эзга мольсь оцю урма. Кулсесть сиретне, оттне, шабатне. Велеряйхне изезь сода,мезе тиемс и коста учемс лезкс.Эста азозе эсь валонц сембодонга сире атясь.Аньцек фкя аралаеньке-тя Шкабавазсь. Тячивок молян Баторонь пряти и мадан онц тумоть алу. Сиретне тиендсть тяфта, мзярда велеть лангс прашендсь кодама - бди зиян.

    Шобдава сембе велеряйхне пуромсть пандть пряс. Атясь азозе, што Шкабавазсь няфтсь фкя ки-строямс велети церькав. Аньцек церькавонь пайгонь вайгяльсь паньцыне сембе стакатнень-сталмотнень, урматнень, зияттнень велеть эзда. А тевсь строямста туй вишкста снярда, мзярда ушетксонц путсазь вете-кота кизонь

церанятне.

     Тяфта и тисть велеряйхне.

     Шабатне покодсть оцю ломаттнень лаца.

     Вов тяфта тиевсь церькавсь.

Шабат, тя фкя тяка церькавсь районца-вете прянь. Сон каннесы Александр Невскяень-полководецть лемонц. Тяфтама церькавда вете марнек Россияса.

7. Школать колга азондомась.

     -Церькавть каршеса,шабат,ащи школаньке, кона строяф 1969 кизоня. Тяса шабатне тонафнесазь мокшень кяльть, ванфтсазь сонь традициянзон, обуцянзон. Ламоц шабатне серматкшнихть стихотвореният, морот, содайхть лама легенда и предания эсь велеснон колга.

   -Арьда, шабат, суватама инжикс школав.

   -Вай, да тяса перяфкс. Сон аф нолдасамазь. А штоба етамс сонь, эряви азондомс валмуворкс.

(Учительсь няфти плакатс серматф валмуворкс, а шабатне лувсазь и мяляфтсазь, азсазь смузенц.)

8. Видеозаписень ваномась.

   -Шабат, учсамазь школань тонафнихне. Тяса моли оцю ила  «Кельк и содак эсь кяльцень»

9. Мокшень кялень кабинетть колга азондомась.

   -Вов, шабат, тя мокшень кялень и литературань кабинетоньке. Тяса кочкаф сембе материалсь, кона лезды тонафнихненди сяда крхкаста содамс мокшень кяльть.

 Хоть школасонк тонафнида аф лама, но синь етксост лама смузю и еню шабада.

(Сяськомань почетнай грамотатнень ваномасна-слайтт).

  -Вов мзяра почетнай грамотада шабатне получасть эсь крхка содамошиснон колга мокшень кяльса и литератураса. Синь лисендсть сяськикс аф аньцек районца и республикаса, но и участвовандакшнесть Всероссийскяй конкурснень эса.

10. Велень поэтессать Ошкина Оксанать колга азондомась.

        -Кие аф содасы минь велень поэтессаньконь Ошкина Оксанать? (Няфтеви фотографияц). Тинь,пади, шабат,лувондость сонь стихонзон, баснянзон, азксонзон, легенданзон, очерконзон, пеетьксонзон и публицистическяй статьянзон, конат печатлакшневсть  «Якстерь тяштеня», «Мокша» журналса, «Мокшень правда», «Темниковскяй известия»газетатнень эса. Оксана аделазе Мордовскяй государственнай университетть журналистонь отделениять. А 2003-це кизоня Оксананди максфоль  литературнай премиясь мокшень кяльса стихонзон инкса, кода од автор.

(Няфтеви фотографияц: премиянь получандамац, конань макссы Н.И.Меркушкин.)

11. Макаев Вадимонь колга азондомась.

Еран, шабат, нинге азомс смузю цераняньконь колга, кона сась нинге емланяста велезонк Калининградста. Изь машта ефси мокшекс корхтама. А 6-це класса кармась сермадома стихт, латсесь тейст музыка и морсезень.

А 9-це класса сявозе 1-це вастть Республиканскяй фестивальса «Од вий» эсь моронц мархта, конань лемдезе шачема ширенцты. Тяддя аделазе Саранск ошса Л.П.Кирюковонь лемса музыкальнай училищать и мрдась покадема шачема ширезонза.

Лама нинге смузю шабаньке, но кда мяленте, содафттядязь синь мархтост, мзярда сатада кизонда ширезонк каникулантень пингста.

12. Школань музейть мархта знакомондамась.

(Няфтевихть слайтт музейть колга).

-А вов, шабат,школань музейньке. Тяса кочкаф сембе сире пингонь утварсь, кона азонды Вирь Ордаж веленьконь колга. Синь азондыхть сире пингть колга, кода эрясть мокшетне инголи и кода эряйхть тяни.

13. «Марлюня» народнай ансамбльть колга азондомась.

    -Школасонк ули фольклорнай народнай ансамбль «Марлюня»,  конанди тяддя топоди 20 киза. ( Видеозаписень няфтемась ансамбльть колга). Тяса морайхть учительхне и тонафнихне. Ансамбльсь морси мокшень народнай морот, эсь мороснон, конатнень арьсекшнесазь синць морсихне.

14. Путешествиясь вирть, паксятнень, лугатнень эзга.

-Путешествияньконь сяда тов етафтсаськ ялга. Ванцаськ сянгяря виреньконь, кели паксяньконь, пиже луганьконь. Вирсь козя иможса: масторонь кстыса, инезиса, пичелюса, канабокса, кярьксмарьса и лияса.

Шабат, ярхцседе тяфтама иможда? (Шабатне азондыхть).

(Учительсь няфти косьфтаф иможень пусмот. Азонды пчкафтомань вийснон колга).

15. Кемгафтува лихтибрять ваксса ваймамась и колганза легендась.

    -Пади, шабат, сизеде, арьда озатама ваймама кемгафтува лихтибрять ваксс. А мон, шабат, азондса легендать, мес тя лихтибрясь лемтьф «Кемгафтува пря».

    Тя ульсь пяк кунара. Туста вирьхнень еткса эрясть кафта братт-Ордаш и Оброш.Эрясть и покасть синь фкя-фкянь ужяльдезь и мялень аф колазь. Но весть мезьсна-бди ашезь явова и синь пяк кяжиясть фкя - фкянь лангс, марнек етась етковаст равжа ката. И эстоньбере Оброш тусь лама вайгяльбе вирть потмос и кармась тоса эряма эсь семиканц мархта. И шабанзонды, конатнень эзда котоль, изь мярьгонде васетькшнемс Ордаш брадонц шабанзон мархта, конатнень тожа котоль. Но шабатне, аф ваномок тянь лангс, сяка васетькшнесть фкя-фкянь мархта. Штоба аф кяжияфтомс аляснон, синь васетькшнесть пелезь вирьса, оцю тумоть ала. Очижинь шиня шабатне налхксесть марса и изезь шарьхкоде, кода ушесь шоподсь. А шобдава шабатне няйсть чуда: тумоть ала шавсь кемгафтува лихтибря эрь шабать лемс. А ведсь эсонза ульсь аф аньцек ару и кельме, а нинге пчкафты.

   Тяда меле браттне мирендасть и кармасть эряма ладязь. А кемгафтува лихтибрясь тянемс эряй.

   Лама ломань сашенды тяза, штоба петемс шумбрашиснон. Мон, шабат, кандонь тя лихтибряста ведня, штоба лаздомс петемс и тиньге шумбрашинтень. А урокть аделамда меле варжасасть пчкафты веднять. (Банкаса ведь).

16. Путешествиять колга обобщениянь тиемась.

-Лама нинге можна азомс Вирь Ордажть колга, но путешествияньке аделакшневи. А монь мялезе тяни, шабат, эздонт кулемс, тусь ли мялезонт путешествиясь.

-Мезе тусь мялезонт?

-Кодама вастова етама мархтонт?

-Кодама вастсь тейнть сембодонга мяляфтовсь?

18.Оценкань путомась.

19.Кудонь тевсь: арьсемс аф оцю азкс тячиень путешествиять колга «Якстерь тяштеня» журналти.

20.Итогонь тиемась.

   -Надиян, шабат, тячиень путешествиять меле сяда пяшкодесть содамошинь канксонтень.

    Тясть юксне тядянь-авань кяльть, обуцятнень, койхнень, кельгость шачема ширенять, ванфтость эсонза эряйхнень!

  Мялезе, шабат, путешествияньконь шумордамс  моразень мархта «Шачем крайняй».

1. Кельгса шачем ширенязень

    Сонь луганзон, перьфть и вирть.

    Тяса нармонь морхне гайняйхть

    И пяк мазы марнек ширсь.

            Припевсь:

            Мазы Ордаж веленязе

            Лугаса вирняса,

            Сяда мазы аф муят

            Марнек масторть лангса.

2. Коса афоль уле ломанць

   Куду лажады сон най.

   Шачем ширесь эсонк учи

   И эрь ломанць вели сай.

             Припевсь:

3. Кельгса шачем ширенязень

    Мазы мокшень крайнязень.

    Щайнязень и тряйнязень

    Сембе тевса шнайнязень.

            Припевсь: