Эрдэмэй замаар зориhон Эржэн Цынгеевнагай мунхэ дурасхаалда
статья

Эрдэмэй замаар зориhон Эржэн Цынгеевнагай мунхэ дурасхаалда

          Yлзы hайхан Yльдэргэ нютагтамнай ажалша бэрхэ, үнэр баян айлнууд олон юм. Эдэнэй тоодо Цэнгэ Цыренович Данзанов Цымжидма Базаровна Базарова хоерой гэр бүлэ ороно. 1969 ондо энэ айлда Эржэн басаган түрэжэ, аба эжыгээ, абга нагсанараа  баярлуулаа бэлэй. 1975 оной намар 6 наhа гүйсэhэн энэ басаган Yльдэргын дунда hургуулиин богоhо алхажа, 10 класс дүүргэтэрээ эрхим бэрхээр hуража ябаа. hургуулида hураха үедөө Эржэн хурса хурдан ухаатай, хүнэй анхарал гансата татамаар, дүрбэн тэгшэ хүмүжэлгэтэй басаган hэн. Тэрэнэй шаби ябахада, пиjнер, комсомол гэhэн hалбаринууд залуушуулда аргагуй ехэ нүлоо үзүүлэгшэ бэлэй. Мэдэсэ ехэтэй, урагшаа hанаатай, хүнтэй харилсажа ядахагүй Эржэн Данзанова hургуулиингаа пионерэйшье мүн комсомолойшье эмхэ ударидажа, hонирхолтой элдэб ажал ябуулжа байгаа. Түрэл нютагайнгаа hургуули мүнгэн медаляар дүүргэжэ, МГУ-гэй психологиин факультедэй оюутан болоhон юм.

         Москвада hураха үедөө Эржэн эрдэм мэдэсэеэ, бэлиг шадабарияа улам мүлижэ, хүгжөөжэ ябаа. hургуулида оролдосотойгоор хандаhанайнгаа аша үрэдэ манай нютагай басаган МГУ улаан дипломоор дүүргэжэ, түрэлхидөө, багшанараа, нютагаархидаа баярлуулhан байна.

         Хүнэй наhан соо жаргахашье, уйдахашье саг болодог гээшэ ааб даа. Эржэн басаган залуухан наhандаа эхэ, эсэгэhээ гээгдэжэ, айлай ехэ үри hэн тула хоер дүү хүбүүдээ, дүү басагаяа хүлыень дүрөөдэ, гарыень ганзагада хүргэжэ,зоной дунда хүн болгон табиhажа шадаhан байна. Эндэ нютагаархидайнь, түрэлхэдэйнь үргэмжэ ехэ туhа боложо үгөө гэхэдэ алдуу болохогүй.

         Зааhан багшанарайнгаа, туhалжа байhан түрэлхидэйнгөө омогорхомоор дээдэ hургуулияа амжалтатайгаар дүүргээд, аспирантуурада hурахадаа, хожомынь ажаллаха үедөөшье Эржэн мэдэсэеэ улам үргэдхэжэ, эрдэм шэнжэлгын ажал ябуулаа. Зориhон хэрэгээ бэелүүлжэ шададаг Эржэн басаган 28 наhандаа 1997 оной июниин 27-до «Содержание актуального этнопсихологического статуса личности (на материале бурятского этноса)» гэhэн темээр психологиин эрдэмэй кандидадай нэрэ зэргые хамгаалhан байна.

          1998 онhоо Москва хотодо политическа консалтингада хүдэлhэн байна. 2008 ондо Канада гаража, Альбеты провинциин правительствада консультантаар ажаллаа. 2020 онhоо Эржэн Данзанова  психологой мэргэжэлээрээ амжалтатайгаар худэлжэ психоаналитик гэhэн сертификаци гаража шадаа.

         Иигэжэ буряад басаган холо хари гурэндэ зоригтой, амжалтатай худэлжэ, буряад угсаатанайнгаа нэрэ дээрэ ургэжэ  ябаhан байна. Теэд эрдэм ухаан бэлигтэй нютагаймнай Эржэн басаганай сагhаа урид  алтан дэлхэйтэеэ хахасаhаниинь харамтай.

Цырена Будацыренова, буряад хэлэ бэшэгэй багша