Хатын-кыз – милләт рухын саклаучы
статья по теме

Хатын-кыз – милләт рухын саклаучы

Нужа елгасыннан ятып эчкән,

Мең хәсрәтләр кичкән аналар

Архивларда гына яши мени?

Алар безнең җанда калалар:

Гасырларны кичеп киләчәккә

Гомер тавын тартып баралар

Үткән тарихыбызга күз салсак, аның нигезендә аналарга тирән хөрмәт ята. Гаиләдә ана изге зат, аның сүзе күп вакыт- соңгы сүз, соңгы нәтиҗә.Шуңа күрә дә милләтне милләт итеп яшәтүдә төп роль хатын-кызга, аналарга йөкләнә.

   Бөек язучы Ризаэддин Фәхретдин үзенең бер фәнни хезмәтендә болай дип яза: “Ир кешегә гаиләнең җитәкчесе, ә хатын-кызга гаиләнең терәге һәм өй белән идарә итү вазыйфасы йөкләнелә. Хатыннары тәртипле булган милләт-тәртипле милләт, хатыннары тәртипсез булган милләт-тәртипсез милләт, Тәрбияле аналар үз балаларына гына түгел, ә барлык мөселман балаларына хөрмәтле ана. Аналарның хезмәтләре иң авыр, иң мәшәкатьле хезмәт.

   Әйе, халкыбызның күп гасырлар дәвамында яшәп килгән тәрбия чараларын, күптөрле күркәм гореф-гадәтләрен, ата-баба йоласы буларак буыннан-буынга күчеп сакланып калган матур өлгеләрне тапшыручылар- аналар.

   Дине, теле, мәдәнияте, тарихы һәм йолалары бер булган кешеләрдән торган халыкны милләт диләр. Һәр халык үзенчә бөек һәм зирәк. Бу сыйфатларны ул үзенең тарихи яшәеш юлында тудыра, ягъни, милли халык барлыкка килә. Ә милләтнең сафлыгын һәм асыл сыйфатларын сакларга тиешле аналар милли әхлакъ һәм иман дигән изге төшенчәләрне онытмый, үз балаларында да тәрбияли.

    Татарларның бөеклеге- аларның мөстәкыйль рухлылыгында, теләсә нинди эштә уңган һәм һәвәс булуында .Һәр мәсьәләне тыныч хәл итү, башка халыклар белән аралашып яши белү- татар халкының кананда

  Татарларга укуга,гыйлемгә, мәгърифәткә омтылу, әдәплелек, әхлаклылык, олыларны олы итә белү, ислам дине кануннарын үтәп яшәү хас.

    Бу сыйфатларны бездә аналарыбыз тәрбияләгән.Хөрмәтлик аларны онытмыйк.

   Гаяз Исхакый: “Хатын-кызны , ананы хөрмәт итмәгән милләтнең киләчәге бик караңгы, өметсез”- дип язып калдырган.

   Фикерләребез, уйларыбыз һәм эш- гамәлләребез белән олылыйк, зурлыйк аналарны. Ярдәмебезне тоеп, сөенеп яшәсен әниләр

Ана назы-җирдә ул мәңгелек,

Мәңгелек җыр- бишек җырыгыз.

Без узасы юлда маяк булып,

Гомер буе балкып торыгыз.

Гомер юлларыгыз озын булсын,

Тигез тормыш аны бизәсен.

Яшәү дәвере якты көннәр бирсен,

Авырлыклар мәңге килмәсен.