Классный час для учащихся 2 класса "Татулыкка ни җитә"
классный час (2 класс) по теме

                                           Татулыкка ни җитә?

Максат: Балаларда бер-берсенә  ихтирамлылык һәм хөрмәт, бер-берсенең уй-фикерләре белән хисаплаша, уңай якларын саный, җитешсезлекләрен аңлый, хаталарын кичерә белү сыйфатларын  тәрбияләү.

Җиһазлау: мәкальләр язылган плакат,укучылар өчен: дәфтәр, ручка.

Дәрес барышы:                                            

 I.Өйгә бирелгән эшне тикшерү.

    Сугыш турында сөйләү. Укучылар үзләренең әби-бабалары турында сөйлиләр.

 II. Уку мәсьәләсен кую.

    (Укытучы укый) Мәктәп укучылары белән һәр очрашудан зур канәгатьләнү алып, күтәренке, шат күңел белән кайта торган сугыш һәм хезмәт ветераны Рәҗәп агайның бүген кәефе кырылган иде. Атна буе хәзерләнгән иде ветеран бу очрашуга. Башта балаларның аңа бирәсе сорауларын китертте. Алар- җиде сорау иде.

     Очрашуга барырга өч көн кала,(парикмахерскийга )чәчтарашка барып,чәчләрен төзәттереп кайтты.Балалар каршысына басып сөйләгәндә киячәк зәңгәр пиджәгенең төймәләрен тикшереп чыкты, аның түшенә тагылган дистәдән артык орден-медальләрен берәм-берәм тотып карады, янәсе, кигәндә төшеп калмаслармы?.

    Менә шулай хәзерләнде укучылар белән очрашуга карт ветеран. Кем белә, бәлки бу очрашуның соңгысы булып куюы бар, ярты млн.нан артык кеше яшәгән бу шәһәрдә аның яшендәгеләр кул бармаклары белән санарлык кына калган иде.

-Нәрсә, карт, сөмсерең бик коелган, әллә йөрәк шаяртып җибәрдеме?-дип каршы алды Рәҗәпне, карчыгы Наҗия әби,-төсең агарып киткәндәй булган.

-Йөрәк ул урынында дип җавап кайтарды, нидер әйтеп бетермичә.

Рәҗәп агай, ашыкмыйча гына өс-башын алыштырып, залдагы диванга килеп утырды да:

-Нервы лар беткән, карчык, көч-хәл белән генә үземне түздердем,-диде.

-Ачыграк итеп сөйлә әле,-диде Наҗия әби,- әллә тыңларга теләмәделәрме?

-Тыңлавын тыңлыйлар алар, тик бер-берсенә карата сабыр түгелләр, юктан гына да кызып китәләр дә сугышыр чиккә җитәләр, көзге әтәчләр кебек инде. Җитми сыйныфта, җитми...

Рәҗәп бабай сөйләп бетерергә өлгермәде, ишек шакыдылар...

Аны Наҗия әби барып ачты.

- Сиңа, карт, мәктәптән укучылар килгән...

Төркемнәрдә тикшерү өчен сораулар.

-Ничек уйлыйсыз: Рәҗәп бабайның кәефе нилектән кырылган?

(Укучылар,аның сөйләгәнен тыңлап та бетермичә,бер-берсен бүлдерә- бүлдерә сораулар бирә башладылар,шунлыктан шау-шу, тавыш-гауга киткән, сыйныф җитәкчесе дә аларны тынычландыра алмаган һ.б. )

- Укучылар кабаттан Рәҗәп бабаларына ни өчен килгәннәр дип уйлыйсыз?

- Рәҗәп бабай:”Җитми-җитми”,-дип Наҗия әбигә нәрсә турында әйтергә теләде икән?

- Укучыларның бер-берсенә карата ихтирамлылык һәм хөрмәт җитми.

-Бу нилектән килеп чыга?

-Сыйныфта татулык, дуслык булмаудан.

-Димәк, бүгенге сөйләшү нәрсә турында булачак?

-Татулык турында.

-Үз-үзеңә бәя кую.

III. Уку мәсәләсен чишү.

1 нче бирем(төркемнәрдә тикшерү).

-Нәрсә ул татулык?

Җаваплар:

-Тату булу: дусларча килешеп, карышмыйча эш итү.Тату гаилә.Тату күршеләр. Тату балалар...

-Татулыкның нигезендә нәрсә ята?

Җаваплар:

-Бер-береңне аңлау, бер-береңә юл кую, уңай якларны санау, җитешсезлекләрне, хаталарны кичерә белү.

-Нинди мисаллар китерә аласыз?

2 нче бирем(төркемнәрдә тикшерү).

-Татулык турында нинди мәкальләр һәм әйтемнәр беләсез?

 Җаваплар:

Матурлык бәйрәмдә, татулык көн дә кирәк.

Тату аш тәмле булыр.Татулыкта бәрәкәт һ.б.

Кош канаты белән, кеше дуслыгы белән көчле. Авыр эшне күмәк кул җиңә.

-Үзегез белгән кешеләр арасында тату яшәгән кемнәрне күрсәтә аласыз?

3 нче бирем(мөстәкыйль эш)

Үзеңдә татулык сыйфатлары булдыру буенча үз-үзеңне тәрбияләү планын төзү.

                                                     Көтелгән план үрнәге.

Нинди дә булса эшкә керешкәнче, аны үтәргә, иң башта үз-үзеңне ышандырырга.

Эшең уңышсыз килеп чыкса иң элек гаепне үзеңнән эзләргә.

Һәр кешедән, элек уңай якларын  таба белергә өйрәнергә.

Үзеңдә түземлелек, сабырлык сыйфатларын тәрбияләргә.

Кешенең ялгышларын, хаталарын кичерә, гафу итә белергә өйрәнергә.

IV.   Рефлексия.

-Бүген дәрестә нәрсә турында сүз барды? Нәрсә белдегез? Дәрес файдалы булдымы?

  V. Өйгә  эш бирү.

“Татулыкка ни җитә?” дигән темага инша язарга.