Шалкан әкияте
занимательные факты (2 класс) по теме

 Сәламәтлек сәгате  дәресе  

  өчен «Шалкан» әкиятенә      

    нигезләнеп  язылган

          әкият-тамаша  

                               (1-4 класслар өчен)

                                          2013,февраль

          «Шалкан»  әкиятенә  ияреп.

А.б.         Бик борын заманда түгел,

                Безнең коннәрдә генә,

                Булган, диләр, алга таба

                Сөйләнәчәк вакыйга.

Бабай:    Витаминнарга бай,дигәч,

               Чәчкән идем, шалканны,

                Күтәрә алмаслык зур булган

                Нишләтергә сон моны?!

                Тегеләй дә, болай итеп,

                Йолыккалап карадым.

                Инде дә килеп чыкмагач.

                Карчыгымны чакырдым!

              - Карчык, әйдә,кил әле,

                Аз гына булыш әле!    

Әби:        Гомер буе әйтә килдем,—

                Тартуыңны ташла,-дип,

                Тәмәке тартып, сыра эчеп,

                Йөрүеңнән тукта,-дип.  

                 Минем сүзне тыңламадың,

                 Кычкырып көлдең генә;

                 Алтмышың тулмас борын үк

                 Бабай булдың син,менә!

                 Әлдермештәге Әлмәндәр

                 Йөз яшькә җиткән,- диләр,

                 Моның кебек шалканнарны

                 Туп итеп типкән,-диләр.

                  Сыра белән тәмәкене,

                  Беркайчан дус итмәгән,

                  Шуңа күрә әле аны    

                  Әҗәл дә җиңә алмаган!

Бабай:       Сәламәтлегем какшады,

                  Инде үзем дә беләм,

                  Сүзеңне тыңламаганга

                  Чын күңелдән үкенәм.

                   Тәмәкесен –сырасын

                   Авызыма да алмам …

                   Әйдә әле оныкка дәшик,

                   Бәлки ул кылыр файда?

Онык:         Нигә дип мине борчыйсыз?

                    Теликтан мультик бара.

                    Шоколад алып кайтыгыз,

                    Булганы бетеп бара.

Бабай:         Шоколад, көнбагыш ашап.

                    Мускулларың ныгымас,

                    Ярылмаган утын ята,

                    Ярсаң һич зыян итмәс

.

Әби:             Хәрәкәттә-бәрәкәт

                     Икәнен онытма син,

                     Көн буена телевизор

                     Каршында утырма,син!

                     Саф һавада эшләп керсәң,

                     Булыр ипи дә тәмле,

                     Китаплар алып укысан—

                     Булыр зиһенен ямьле!        

Онык:           Миннән дә файда булмады—

                      Корсагым мишәйт итә

                      Әйдә,Акбайга дәшик, без,

                      Көн буе йоклап ята.

Акбай:          Көчек килеш алып кайтып,

                      Чылбырга бәйләдегез,

                      Буыннарым катып бетте,

                      Шуны һич сизмәдегез.

                      Сөяк-санак, каткан ипи,

                      Ашап тамак туймый ул,

                      Миңа да тәмле аш кирәк

                      Үзегездән артмый шул.

Онык:           Песи нишләп күренми соң?

                      Һаман йокыда микән;

                      Төшендә генә булса да,

                      Тычканнар тота микән?

Песи:            Сөт сорап сырпаланганда,

                      Күрми генә үтәсез,

                      Эш эшләгәндә -мин кирәк,

                      Бер онытып калдырмыйсыз!

                      Ярар, әйдә, бергә тартыйк,

                      Бәлки көчебез җитәр;

                      Без шалкан тарткан арада,

                      Тычкан да килеп җитәр!

                      Аны инде айлар буе,

                      Һич кенә тота алмыйм,

                      Шундый җитез, өлгер, уңган

                      Серенә төшенә алмыйм?

Тычкан:        Аның сере бик тә гади—

                      Һәркем үти алырлык:

                      Сәламәт булыйм дигәнгә

                      Наказ итеп алырлык:

                      Кичтән иртә ятып йокла

                      Ә иртән иртәрәк тор!

                      Гимнастика ясый башла,

                      Ашавың көтеп торыр.

                       Ашауга килгәндә исә-

                       Баллы, майлы ашама,

                       Витаминнарга бай булган

                       Ризыкларны ташлама!

                       Гигиена таләпләрен

                       Һәрчак үтәргә кирәк,

                       Спорт белән шогыльләнергә ,

                       Эш эшләргә дә кирәк!

                       Шушы гади кагыйдәне,

                       Үти ала һәркем дә

                       Шалканны тартып чыгарам,

                       Карап торыгыз менә!!!

А.б.                Онык.Акбай.Песи кебек,

                       Ялкаулар юкмы сездә?

                       Тычкан кебек уңган. булган,

                       Җитезләр кирәк безгә!

                        Нәни дуслар! Әкияттән ,

                        Һәркем гыйбрәт алсын,

                        Авырмау кагыйдәләре

                        Сезнең хәтердә калсын!

                        Сәламәтлек  сәгатьләрен

                        Кем һәрчак көтеп ала,

                        Таза, сау, сәламәт булып

                        Шул гына үсә ала!  

Искәрмә:  Әкият-тамашаны сәламәтлек сәгатьләренә кереш, йомгаклау дәресләре, яки, башлангыч класс укучылары атналыгы кысаларында дәрестән тыш ачык чара, шулай ук спорт һәм сәламәтлек айлыгы вакытында сәламәт яшәү рәвешен пропагандалаучы чара буларак кулланырга мөмкин