Укучым
материал на тему

«Педагог» конкурсына.

Укучым - горурлыгым.

          Укытучы һөнәре – җир йөзендә иң изге һөнәрләрнең берсе. Бай рухлы, киң күңелле, үз эшенә нык бирелгән, тирән белемле һәм балаларны чиксез яратучы кешеләр генә укытучы була ала. Безнең һәрберебез кайчандыр укучы булган һәм һәрберебезнең күңелендә укытучы һәрвакыт иң якын туганнарыбыз белән бергә сакланачак.

          Үзең укыткан укучыларым да миңа бик якын. Берсе турында язарга уйладым гына, барсы да яныма «килеп басты».

         Эшкә батыр, төскә матур булган Гөлүсәм бар. Авызы белән кош кына тотмый, диләр нечкә күңелле, шәфкатьле һәм арка таянырлык Миләүшәм турында. Эшкә оста, сүзгә кыска булган Лилияне һәркем ярата. Үлгән кешене торгызып бастыра, диләр эчкерсез һәм шаян Алсу турында. Сүзне үлчәп кенә сөйләүче мөләем Зөһрә, бик күркәм һәм көләч Рүзилә, чын джентельмен Фәргать, төгәллеге һәм пөхтәлеге белән аерылып торган Раил бар. Раил армиядән кайткач, сыйныфташы  Ләйлә белән гаилә корды. Гарипов Марсель турында агачтан сандугач кына ясамый, дияр идем. Ул моңлы тавыш иясе.Һәр җәй авылда Сабан туйны музыка белән бизәүче, алыштыргысыз ди джей. Кадерле улларым да минем укучыларым.

          Ахметшина Раилә беренче укучыларымның берсе. Ул Казан шәһәрендә онкология шифаханәсенең “үңәч хирургиясе” бүлегендә шәфкать туташы булып эшли. Өстәмә белгечлеге-массаж ясаучы.Югары белемле клиник психолог. Гиппократ оныгы Раилә гел гыйлем өсти, белемен даими үстерүне үзмаксат итеп куйган.Кызыксынучан,кешелекле, рәхимле, ышанычлы кеше ул. Аны белгән һәр кеше бу сүзләрне раслар. Ул зәвык белән киенер, ашыкмас. Раилә үз эшен ярата, тик торуны белми, гел хәрәкәттә, гел эзләнүдә.

          Онкология  шифаханәсенә барырга язмасын, әмма шулай килеп чыкса, бара калсагыз, Ахметшина Раилә Мәхмүт кызын сорагыз. Ярдәм итәр, киңәшен бирер. Аннан сез дә әйтерсез:чыннан да, кешелекле, акыллы, абруйлы, ягымлы һәм чибәр шәфкать туташы икәнсең, Раилә!-дип.

        Мин якыннан аралашып яшәгән укучыларым турында яздым. Мин аларның берсен дә онытмыйм. Укытучы һөнәренең бик кызыклы ягы бар:шәхесне үсештә күрү, яңалыкларга гаҗәпләнү, үзгәрешләргә соклану һәм үзеңнән дә даими үсештә булуны таләп итү. 7 яшьлек бала “плоет” (плывает),                                                            “ичьчо» (ещё), «севётна» (сегодня) һәм башка шундый хаталар ясап күнегүләр үти, ә урта мәктәпне уңышлы тәмамлап, КДУның филология                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                 факультетына укырга керә. Искиткеч бит, килешегез! Һөнәребез бик җаваплы, катлаулы, әмма мондый мавыктыргыч хезмәт сирәк.

Яңа Җөлби башлангыч мәктәбе

Гайфуллина Гөлсинә Мәхмүт кызы

I категорияле укытучы.