Ана тилим
статья по чтению (3 класс)

Биз Къарачай-Черкес республикада джашайбыз. Бизни республикабыз Россияны эм ариу джерлерини бириди. Бизни республикада шохлукьда кёб тюрлю миллет джашайдыла.

Кече джулдузла  къолунг бла узалыб джетерча, алай чууакъ кёрюнедиле. Кюндюз мийик къаяланы тюбюнде къарасанг, джашил талада, аланы ичлери бла кюмюшча джылтырагъан суула, суу секиртмеле, алача джылтырагъан акъ къанджалбаш юйле. Мен къууанама быллай джуртда туугъаныма

Бизни республиканы адамлары мамырлыкъны сюйген адамладыла.Ала бир-бирине болушадыла, къууанчны, къайгъыны, да бирге этедиле, байрамланы бирге бардырадыла.

Ана тилим - тауларымы къадау ташы,

Намысымы,насыбымы сыйлы башы,

Ана тилим - джюрегими   булбул  джыры,

Миллетими нюр чырагъы, сыйы, сыры.

Ана тилим да, Ата джуртум да бирдиле меннге.

   Ана тил - адамны  ата-анасы, ата-бабалары, миллети сёлешген тилди. Адам талай тилни билирге болады, билалгъан да этеди. Билирге да керекди. Алай а эм багъалы, адамны кесини энчи тили - ана тилиди. Анга «ана тил» деб да бош айтылмайды.

   Адам сагъыш, оюм ана тилинде этеди. Ана тилни макъамы адамгъа джылыу, кюч-къарыу, саулукъ береди.

   Адам къайсы тилде сёлеширге ёч эсе, ол миллетни адамыды деб бош айтылмайды. Сабийлигинден башлаб, сёлешген тилни юсю бла адамгъа ол миллетни миллет ангысы сингиб, тини, къылыгъы да анга кёре къуралады.

Миллет да тилини юсю бла сакъланады. Тили унутула барса, ол миллет  да тас болады. Миллети болмагъанны уа тюз, таза халиси да, сыйы да болмайды. Ол себебден, ана тилин билмеген, сюймеген адам - ол миллетин, ата-бабаларын, ата-анасын, кесин да учуз, сыйсыз этеди.

    Кьарачай тилни, ана тилни дерслеринде тюз сёлеширге, халатсыз джазаргьа, тилибизни сюйерге, адет -намысны билирге юренебиз.