"Бәхетле балачак"
материал

«Бәхетле балачак»

Балачак- тылсымлы да, ягымлы да,һәркемгә дә якын сүз бу.Балачак ни арада үтеп китә?! Сизми дә каласың. Ә бит балачак гомернең иң гүзәл, иң матур, әти- әни канаты астында рәхәтләнеп яши торган чагы. Балачакның шат җырлары, балачакның шат еллары. Мәңге истә калачак! Яклыйк, саклыйк һәм яратыйк без балаларны. Яшәешнең төп мәгънәсе – балалар.Алар безнең киләчәгебез, милләтебезнең горурлыгы. Аларның елмаюы һәм бәхетле карашлары җир йөзендәге иң зур байлыктыр, мөгаен.

Җәйнең беренче көне балачак иленең иң матур бәйрәме. Бу көнне “Көнбагышкай” балалар бакчасында да “Бәхетле балачак” дигән бәйрәм гөрләде. Балалар бакчасы ишегалды балалар чыр- чуына күмелде. Бәйрәм программасы күңелле конкурслар, җәй турында шигырьләр, табышмаклар чишүдән, куңелле уеннар, төрле эстафеталар, җыр -  биюләрдән торды. Бәйрәмне “Җәй” һәм “Петрушка “ның килүе тагын да җанландырып җибәрде. Балалар геройлар белән бик рәхәтләнеп уйнадылар, күңел ачтылар. Асфальтта төрле төстәге акбурлар белән рәсем ясадылар, сабын куыклары очырдылар. Барысы да бик канәгать калды.

Ә без, иң мөһиме: һәр бала әти- әнисе кочагында үссен, һәр сабый үз бәхете белән тусын, сәламәт һәм бәхетле булсыннар. Балалар әти- әни мәхәббәтен һәм күңел җылылыгын тоеп яшәсеннәр. Йөзләреннән елмаю китмәсен, әти- әниләр балалары белән һәрвакыт горурлансыннар дигән теләктә калабыз.