Театрализация сказки "Теремок" на свой лад
методическая разработка (средняя группа) на тему

     Кĕвĕ  майăн  юмахçă  тухса  калать:

- Юмах  юпа  тăрринче,

 Халап  хапха  тăрринче.

 Сикĕр, ачасем, кунтарах,

 Тимлĕр  мана  хытăрах.

 Пирĕн  аслă  вăрманта,

 Юмахри  пек  вырăнта

 Акă  пĕр  çурт  курăнса

 Ларать  çуттăн  ялкăшса.

      Юмахçăран  керменкке  пулса  тăрать.

Керменкке:- Эп – Керменкке, Керменкке,

                          Илĕртÿллĕ  чиперкке.

                          Юратмастăп  тунсăха,

                          Кăмăллатăп  савăнма.

                          Васкăр  халех  ман  пата

                          Пурăнмашкăн  ушкăнпа.

          Кĕвĕ майăн  сиксе  кĕрет  Шапа.

Шапа:  -Эп – пысăк  тута, ват  шапа,

                Вăрманпа  пырап  сиксе.

                Çурт  шыратăп  пурăнма

                Ак, тамаша, тупрăм  та!

(Муз. инструменчĕпе  выляса  шакканă  пек  тăвать).

Шапа: - Хуçи  пур-и, майри  пур-и,

                Кам  пурăнать  ку  керменре?

                Ква-ква-ква!

Керменкке: - Никам  та  пурăнмасть  ман  патра.

Шапа: - Апла  пулсан  мана  кĕрт-ха  пурăнма?

Керменкке: - Кĕртессе  кĕртĕп-ха  та, анчах  юрру-ташшу  мĕнле-ши  сан?

Шапа: - Халех  сăвă  каласа  паратăп,  итле,Керменкке.

                     Шапа  сăвă  калать:

Вĕçме, утма  пĕлместĕп,

Йăкăлт-якăлт  сиккелеп.

Шывра  ишеп  пит  хастар

Пулăсемпе  юнашар.

Хĕртĕнетĕп  çу  каçа

Çыранта  вырта-вырта.

Хитре  юрă  юрласа
Тĕлĕнтереп  таврана.

Керменкке: - Ну  маттур та  шапа  тус, кĕр  ман  пата  пурăнма.

      (Шапа кĕрсе  чÿречерен  пăхса  тăрать).

Кĕвĕпе  Маша  кĕрет  карçинккапа, пĕр  аллинче  шăнкăрав.

Маша: - Ау! Ау! Ау! (кăшкăрать), никам  та  сас  памасть.

(кермене  курать): - Ай,  мĕнле  хитре  пÿрт  ларать.

(Шăнкăравпа  шăнкăртаттарать).

Маша: - Хуçи  пур-и,  майри  пур-и,

                 Кам  пурăнать  ку  Керменре?

Шапа: - Эп – пысăк  тута, ват  шапа

                 Эсĕ  кам?

Маша: - Эпĕ  Маша  хитрескер

                 Киле  çул  çухатнăскер,

                 Кĕрт-ха  мана  çĕр  каçма?

Керменпе  Шапа: - Юрласа  пар  малтан.

Маша: - Халех  юрласа  паратăп.

            Частушкисем  юрлать:

 1.Эпĕ  пĕчĕк  хĕрача,

    Эп  шкула  каймастăп.

    Илсе  парăр  сандали

    Эп  качча  каятăп.

2.Анне  виççĕччен  кăна

   Хушрĕ  выляма  мана.

   Эп  вылярăм  улттăччен –

   Мĕн  пулать  киле  çитсен?

3.Атте  мана  юратать,

   Шаккалат  илсе  парать.

   Каланине  итлемесен

   Хăлха  чикки  те  парать.

4.Сарă-сарă  чĕпписем

   Кĕрпе  сăхма  пĕлмеççĕ.

   Курма  килнĕ  çыннисем  те

   Алă  çупма  пĕлмеççĕ.

Шапа: - Кĕр  Маша  ман  пата

               Питĕ  хитре  юрлатăн

               Ква-ква-ква!

       (Маша  кĕрсе  чÿречерен  пăхса  тăрать).

Бибика  музыкипе 2 кашкăр  тухаççĕ, очкисемпе.

1кашкăр- Марат: - Ай  мĕнле  хитре  кермен  ларать,

                                       Кам  пурăнать-ши  унта?

    (кастаньетăпа  шакканă  пек   сас  тăваççĕ).

2кашкăр- Никита: - Хуçи  пур-и, майри  пур-и

                                         Кам  пурăнать  ку  керменре?

Шапа: - Эп  пысăк  тута, ват  шапа.

Маша: - Эпĕ  Маша  хитрескер,

                Киле  çул  çухатнăскер.

Пурте: - Эсир  камсем?

Икĕ  кашкăр  пĕрле: - Вăрманта  эпир  пурнатпăр,

                                            Никамран  та  хăрамастпăр.

                                            Пире  хытă  юратса

                                         „ Кашкăр,”-  тесе  чĕнеççĕ.

- Кĕртĕр-ха  пире  пĕрле  пурăнма?

Пурте: - Малтан  ташласа  кăтартăр.

Кашкăрсем: - Халех  ташласа  паратпăр.

  „Бибика” ташă  ташлаççĕ  сысна  çурисемпе.

Кермен: - Кун  пек  хитре  ташлакансене  пурне  те  кĕртетпĕр.

   (Кашкăрсем  кайса  икĕ  енчен  пăхса  тăраççĕ).

  Кĕвĕпе  мулкач  параппанпа  сиксе  кĕрет.

Мулкач: - (кĕвĕ  чарăнсан  параппанне  пăнтăртатта-рать).

- Хуçи  пур-и, майри  пур-и,

  Кам  пурăнать  ку  керменре?

Шапа: - Эпĕ  пысăк  тута, ват  шапа.

Маша: - Эпĕ  Маша  хитрескер,

                Киле  çул  çухатнăскер.

Кашкăрсем: - Эпир  вара  кашкăрсем.

Пурте: - Эсĕ  кам?

Мулкач: - Эпĕ  мулкач,  мул  пухакан

                     Сăрт  хыçĕнче  пурăнакан.

                     Кĕртĕр-ха  мана  пĕрле  пурăнма?

Пурте: - Малтан  юрласа  кăтарт  пире.                          

                 Мулкач  юрлать:

1. Атте  паян  пасартан

    Илсе  килчĕ  параппан.

    Пăт – пат  параппан

    Пăнтăртатать  пит  аван.

2.Тĕмеске  те  тунката

    Нимĕн те  мар  мулкача.

    Карта  урлă  ялт!  сиксе

    Кĕрсе  каяп  пахчана.

Мулкач: - Кĕртетĕр-и  мана  пĕрле  пурăнма?

Пурте: - Кĕр!

      Кĕвĕпе  тилĕ  кĕрет  йăпшăнса.

Тилĕ: - Ай  мĕнле  хитре  кермен  ларать.

             - Хуçи  пур-и, майри  пур-и

              Кам  пурăнать  ку  керменре?

Шапа: - Эпĕ  пысăк  тута, ват  шапа.

Маша: - Эпĕ  Маша  хитрескер

                Киле  çул  çухатнăскер.

Кашкăрсем: - Эпир  вара  кашкăрсем.

Мулкач: - Эпĕ  мулкач -  мул  пухакан.

Пурте: - Эсĕ  кам?

Тилĕ: - Эпĕ  тилĕ  маттурскер,

              Халап  çапма  ăстаскер.

              Манăн  кĕрĕк  те  паха,

              Илем  кÿрет  вăл  мана.

- Кĕртĕр-ха  мана  пĕрле  пурăнма?

Пурте: - Малтан  ташласа  кăтарт-ха  пире.

                               Тилĕ  ташши.

Пурте: - Кĕр  тилĕ  пирĕн  пата.

„Маша  и  Медведь”  мультфильмри  кĕвĕпе  Упа  кĕрет  велосипедпа  ярăнса, аллинче  бубен.

Упа: - Ай-уй, мĕнле  хитре  керменкке (бубенпа  çапса  шакканă  пек  тăвать):

 - Хуçи  пур-и, майри  пур-и

   Кам  пурăнать  ку  керменккере?

Шапа: - Эпĕ  пысăк  тута, ват  шапа.

Маша: - Эпĕ  Маша  хитрескер,

                  Киле  çул  çухатнăскер.

Кашкăрсем: - Эпир  вара  кашкăрсем.

Мулкач: - Эпĕ  мулкач – мул  пухакан.

Тилĕ: - Эпĕ  тилĕ  маттурскер,

              Халап  çапма  ăстаскер.

Пурте: - Эсĕ  кам?

Упа: - Эпĕ -  Упа- утаман

            Ик  урапа  утакан.

            Пур  чĕрчунран  хытăрах

            Мĕкĕрттерсе  çÿрекен:

            У-у-у-у-у-у!

Пурте: - Эсĕ  мĕн  тума  пĕлетĕн?

Упа: - Эпĕ  ташша  пит  ăста,

            Юрататăп  савăнма.

(Упа  бубенпа  выляса  ура  хуçса  ташлать, юрлать):

- Ташши, ташши,

  Салакайăк  ташши.

  Салакайăк  ташши  мар  та,

  „Аистёнок”  ташши.          Хоппа! Хоп!

Упа: - Эй, чĕрчунсем, ачасем!

            Тухăр  кунта  ташлама.

            Пурте  пĕрле  савăнар,

            Килĕштерсе  пурăнар!

Пурте  Керменкке  умне  тухса  тăраççĕ  те  юрă  юрлаççĕ:

1.Керменре  уяв  пуçланчĕ,

   Дирижёрĕ  ват  шапа.

   Улăхĕ, кÿлли, вăрманĕ

   Янăрать  çĕршер  саспа.

П-в: - Кăвва – кăвва, ка-ка-ка,

           Тар-тар, ак-ак-ак!

2.Сарă  тилĕ  те, мулкачĕ,

    Шурă  юс, мăран  упа.

    Пурте  килнĕ  савăнма,

    Пурте  ăшшăн  ал  çупма.

П-в: - Кăвва-кăвва, ка-ка-ка,

           Тар-тар, ак-ак-ак.

Упа:     - Савăнаççĕ  чĕрчунсем,

               Хĕпĕртеççĕ  ачасем.

Пурте: - Çÿлтÿпе  хĕвеллĕ,

               Эпир  пит  телейлĕ.

Юмахçă: - Юмах  ятăм  юптартăм,

                    Кукăр  çулпа  чуптартăм,

                    Пĕр  сăмах  та  суймарăм.

Пурте: - Сывă  пулăр, тепре  тĕл  пуличчен!