Бәйрәмнәр
методическая разработка по теме

Белем  бәйрәме

1.  Бүген  шундый  матур  көн,

 Шатлык  күккә  җиткән  көн,

 Балалар  бакчасыннан

 Мәктәпләргә  килгән  көн.

2. Алда – мәктәп, кулда -  чәчкә

Ашыгабыз  барчабыз.

          Керер  өчен  киләчәккә

Мәктәп  ишеген  ачабыз.

3.  Беренче  сентябрь – минем

Бәхет  шатлыклы  көнем.

Сагынып  белем  учагын

Мин  бүген  сиңа  килдем.

4.  Әтием  дә, әнием  дә,

Бу  көнне  бик  көттеләр.

Балалардай  дулкынланып,

Мине  озата  килделәр.

5.  Мәктәп  юлы – хөрмәт  юлы

Киләчәккә  илтә.

Котлы  булсын  уку  елын        

Башлаган  бу  иртә!

6.  Бүген  йөзләр  көләч  безнең

Күңел  сөенә,

Атлыйбыз  тәүге  адымнар

Белем  иленә.

7.  Якты  мәктәпкә  килдек  без

Хәерле  сәгатьләрдә

И, мәктәбем, өйрәт  безне

Иң  матур  гадәтләргә.

8.  Мәктәпкә  озаткан  чакта

Әбием  кочып  сөйде:        

-Алдынгы  булырга  тырыш,

Бәбекәчем, берүк, - диде.

                             Җыр ,, Бүген  белем  бәйрәме ”

                Матур  күлмәкләр  киеп,               Бүген  Белем  бәйрәме

                Чәчәк  бәйләме  тотып                   Кулда  чәчәк  бәйләме.

                Без  мәктәпкә  барабыз                  Теләп  безгә  бишлеләр

                Һәм  шуңа  куанабыз.                    Озата  әти-әниләр.

                                            Бик  тырышып  укырбыз,

                                            Үскәч  галим  булырбыз.

                                            Алда  көтә  дәресләр

                                            Һәм  зурдан-зур  өметләр.                

  9.    Хыяллар безнең канатлы

        Хыяллар шундый матур

        Киләчәктә барыбыз да

        Булырбыз кыю, батыр.

 10.   Хәрефләр дә өйрәнербез,

        Сүзләр төзеп уйнарбыз.

        Сагынып көткән мәктәптән без

        Беркайчан да туймабыз.

 11.  Язарга да өйрәнербез

        Каләм тотып кулларга.

        Хәрефләрне  тезәрбез  без

        Тигез, матур юлларга.

 12.  Ак  кәгазь  буйлап  үтәр

        Безнең  тәүге  юлыбыз.

        Оста эшчеләр итәр

        Безне оста кулыбыз.

 13.  Аннан мисал-мәсьәләне

        Чишү  юлын эзләрбез

        Дәфтәрләрне, көндәлекне

        Бишле  белән бизәрбез.

                        Җыр ,,Өйрәтәләр  мәктәпләрдә”

     Каләм тотып кулларга

     Хәрефләрне язарга

     Өйрәтәләр мәктәпләрдә, мәктәпләрдә.

     Тапкырларга, бүләргә,

               Нәниләрне сөяргә

     Өйрәтәләр мәктәпләрдә, мәктәпләрдә.

    Бишкә бишне кушарга,

     Иҗектән сүз ясарга

     Өйрәтәләр мәктәпләрдә, мәктәпләрдә.

     Белер өчен бик күпне

     Яратырга китапны

     Өйрәтәләр мәктәпләрдә, мәктәпләрдә.         

14.  Хушыгыз  инде  якын  дусларым

        Калдырам  сезне  уенчыкларым.

        Бүгеннән  мин  укучы  булам

       Дәрес  укуга  күңел  беркетәм.

15.  Алда  бит  мине ,,Әлифба”  көтә,

       Матур  рәсемнәр  кашын  сикертә.

        Яңа  китаплар,  яңа  уеннар

        Бары  да  көтә  мине  мәктәптә.

16.   Кыйммәтле  белем мирасын

        Өйрәнеп  үсәрбез  без.

        Балачакның  зур  хыялын

        Чын  тормыш  итәрбез  без.

17.        Дус,  тату,  матур  яшәүнең

        Серенә  төшенербез.

        Бик  тырышып  укыганда

        Уңышка  ирешербез.

18.        Өйрәнербез  тормышта

        Бик  күп  төрле  һөнәр  без.

        Бер  дә  куркып  тормыйча

        Айга  хәтле  менәрбез.

19.        Күп  нәрсәләр  белермен

        Туган  илем  турында.

        Мин  бит  инде  зур  булдым.

        ,,Әлифбам”  бар  кулымда.

          Җыр ,,Без  инде  хәзер  зурлар”

          Уйныйлар  биттә  нурлар;

        Әлифба  алды  куллар.

        Мәктәпкә  илтә  юллар...

        Без  инде  хәзер  зурлар!

                Сүз  ясарга  өйрәнербез

             Хәреф  кушып  хәрефкә.

             Тапкырларбыз,  бүләрбез

      Төрле  санны  дәрестә.

Энә  алып  кулга  без

Киң  келәмнәр  чигәрбез,

Чыгып  иркен  кырга,  без

Бергә  иген  игәрбез.

      Бердәм  атлап  йөрербез

      Талмаслар  аяк-куллар.

      Инде  мәктәпкә  килдек  без,

      Без  инде  хәзер  зурлар!

20.        Үзебез  нәни  булсак  та

        Безне  зур  дип  санагыз.

        Әти-әни  эшкә  бара

        Без  мәктәпкә  барабыз.

21.        Исәнме  мәктәбем  диеп

        Баш  иябез  сиңа  бүген  без.

        Хәтерләп  кал, мәктәп,

        Беренче  кат  бүген  синең

        Бусагаңнан  атлап  үтәбез.

№2        Белем  бәйрәме (балалар аз булганда)

1.  Беренче  сентябрь – минем

Бәхет  шатлыклы  көнем.

Сагынып  белем  учагын

Мин  бүген  сиңа  килдем.

2.  Әтием  дә , әнием  дә ,

Бу  көнне  бик  көттеләр.

Балалардай  дулкынланып,

Мине  озата  килделәр.

3.  Мәктәп  юлы – хөрмәт  юлы

Киләчәккә  илтә.

Котлы  булсын  уку  елын        

Башлаган  бу  иртә!

4.  Бүген  йөзләр  көләч  безнең

Күңел  сөенә,

Атлыйбыз  тәүге  адымнар

Белем  иленә.

5.  Мәктәпкә  озаткан  чакта

Әбием  кочып  сөйде:        

-Алдынгы  булырга  тырыш,

Бәбекәчем , берүк , - диде.

   6.  Якты  мәктәпкә  килдек  без

Хәерле  сәгатьләрдә

И , мәктәбем , өйрәт  безне

Иң  матур  гадәтләргә.

  Җыр ,, Бүген  белем  бәйрәме ”.

                Матур  күлмәкләр  киеп,               Бүген  Белем  бәйрәме

                Чәчәк  бәйләме  тотып                   Кулда  чәчәк  бәйләме.

                Без  мәктәпкә  барабыз                  Теләп  безгә  бишлеләр

                Һәм  шуңа  куанабыз.                    Озата  әти-әниләр.

                                            Бик  тырышып  укырбыз,

                                            Үскәч  галим  булырбыз.

                                            Алда  көтә  дәресләр

                                            Һәм  зурдан-зур  өметләр.                

7.     Хушыгыз  инде  якын  дусларым

        Калдырам  сезне  уенчыкларым.

        Бүгеннән  мин  укучы  булам

        Дәрес  укуга  мәктәпкә китәм.

8.    Алда  бит  мине ,,Әлифба”  көтә,

        Матур  рәсемнәр  кашын  сикертә.

        Яңа  китаплар,  яңа  уеннар

        Бары  да  көтә  мине  мәктәптә.

9.     Кыйммәтле  белем мирасын

         Өйрәнеп  үсәрбез  без.

         Балачакның  зур  хыялын

         Чын  тормыш  итәрбез  без.

10.        Дус,  тату,  матур  яшәүнең

        Серенә  төшенербез.

        Бик  тырышып  укыганда

        Уңышка  ирешербез.

11.        Үзебез  нәни  булсак  та

        Безне  зур  дип  санагыз.

        Әти-әни  эшкә  бара

        Без  мәктәпкә  барабыз.

12.        Исәнме  мәктәбем  диеп

        Баш  иябез  сиңа  бүген  без.

        Хәтерләп  кал, мәктәп,

        Беренче  кат  бүген  синең

        Бусагаңнан  атлап  үтәбез.

                            Җыр ,,Без  инде  хәзер  зурлар”

        Уйныйлар  биттә  нурлар;

        Әлифба  алды  куллар.

        Мәктәпкә  илтә  юллар...

        Без  инде  хәзер  зурлар!

               Сүз  ясарга  өйрәнербез

             Хәреф  кушып  хәрефкә.

             Тапкырларбыз,  бүләрбез

      Төрле  санны  дәрестә.

Энә  алып  кулга  без

Киң  келәмнәр  чигәрбез,

Чыгып  иркен  кырга,  без

Бергә  иген  игәрбез.

       Бердәм  атлап  йөрербез

      Талмаслар  аяк-куллар.

      Инде  мәктәпкә  килдек  без,

      Без  инде  хәзер  зурлар!

       ЭЗТАБАР БУЛАМ БҮГЕН!

1.    Бүген бездә зур тантана

  Елмаю йөзебездә.

  Эзтабарлар – кыю халык

  Булабыз һәммәбез дә.

2.    Белмим кая басканымны

       Бии - бии йөрим бүген.

       Дусларым, - дим,- беләсезме

       Иң шатлыклы көнем бүген

       Эзтабар булам бүген!

3.    Кем эзтабар була ала?

       Шуны белсен һәр бала.

4.   Кем укуда иң оста,

      Китап – дәфтәре чиста?

      Ул баламы?

      Ул бала– уңган бала –

      Эзтабар дип атала.

5.   Кем булыша зурларга,

      Кем бик оста җырларга?

      Ул баламы?

      Ул бала– уңган бала –

      Эзтабар дип атала.

6.  Кем яратмый өчлене,

     Ычкындырмый бишлене?

     Ул баламы?

     Ул бала– уңган бала –

     Эзтабар дип атала.

7. Кем ялкаулыкны сөйми,

    Кем туры, дөрес сөйли?

    Ул баламы?

    Ул бала– уңган бала –

    Эзтабар дип атала.

8. Кем ярата кошларны,

    Кемнең бик күп дуслары?

    Ул баламы?

    Ул бала– уңган бала –

    Эзтабар дип атала.

9.    Һәркөн иртән торабыз

       Мәктәпкә юнәләбез.

       Белер өчен күп нәрсәне

       Аңлар өчен бар нәрсәне

       Бик тырышып укыйбыз.

10.   Өйрәнербез тормышта

        Бик күп төрле һөнәр без.

        Бер дә куркып тормыйча,

       Айга хәтле менәрбез.

11.      Без үсәрбез беләкләргә,

   Баһадир көче туплап.

   “Уңганнарым!”- дияр илем

   Безнең хезмәтне хуплап.

12.     Яңа шәһәрләр төзербез,

   Игәрбез кырда иген,

   Кирәксә Гагарин сыман

   Айкарбыз җиһан иңен.

13.  Нинди юлдан атласак та,

       Нинди эшләр башласак та.

       Һич белмибез куркуны без

       Без куәтле, без дәртле.

Бергә:  Яратабыз укуны без

             Яратабыз хезмәтне.

14.    Кулларыбыз хезмәт сөя

      Яшь булсак та.

      Өлкәннәргә булышабыз

       Кирәк чакта.

15. Оста кулларга һәрвакыт

      Эзләсәң эш табыла.

      Эш эшләгәч тәмле була

      Аш та, чәй дә табында.

16. Без – тырышлар токымы,

 Йөрәктә зур көрәш очкыны.

 Күп юллар бар безгә узасы

 Без илнең киләчәк хуҗасы.

17. Без тәртипле, тәрбияле

      Булырга тырышырбыз

      Класс белән, мәктәп белән

      Ярыш оештырырбыз.

18. Абагалар чәчәк аткан

      Аланнар бардыр әле

      Яшь эзтабар һәрбер эштә

      Ачышлар ясар әле.

19. Уку безнең иң төп бурыч

       Тырышып уку-эшебез

      Тирән белем сорый илем

      “Бишле”дә бит көчебез!

20.  Белемле, һөнәрле үсәрбез,

        Илебез ни кушса үтәрбез.

       Аның данын яклар өчен

       Лаеклы булып үсәрбез.

21.  Без җырлаган дәртле җырлар

  Истә калачак.

  Дәртле җырлар кебек дәртле

  Безнең балачак.

Җыр “Күңелле безнең балачак”

1.          Кояш керә тәрәзәдән,

        Нурлары җем – җем итә.

        Күңелле безнең балачак

        Безнең киләчәк көтә.

2.    Якты мәктәп залларында

       Яңгырый безнең аваз.

        Күңелле безнең балачак,

        Тормышыбыз мәңге яз.

3.    Урманнар, таулар, болыннар.

       Чакыра безне алга

       Күңелле безнең балачак

       Безнең киләчәк алда.

№2 Эзтабар булам бүген (балалар аз булганда)

1.Тирә - юньдә сары яфрак

Килеп җитте алтын көз.

Шатланабыз, елмаябыз

Чәчәкләрдәй матур без.

2. Күрәсезме бүген кояш
Ничек назлы елмая.
Безнең бәйрәмебезне
Ул да бит көтеп ала.

3. Без эзтабар булабыз
 Алда зур эшләр.
Өйдә ничек булышканны

Өлкәннәр  сөйләр.

4. Эзтабарлар кем дисәгез -
Тәвәккәл батыр алар.
Бәхет өчен көрәшчеләр
 Юлыннан атлый алар.

5. Эзтабарлар кем дисәгез-
Хезмәт сөйгән һәр бала
Горур, матур исем белән
Эзтабар дип атала.

6. Эзтабарлар кем дисәгез-
Шигырь, җыр сөючеләр.
Күңелләргә шатлык нуры
Өләшеп бирүчеләр.

7. Үзе тыйнак, үзе горур,

Хак сүз булыр әйткәне.

Яратыр газиз Ватанны,

Сөяр әткәй - әнкәйне.

8. Безнең кемнәр  икәнлекне

Эшебез әйтер.
Барыбыз да китап белән

Дуслашты хәзер.

9. Без үсәрбез беләкләргә
 Баһадир көче туплап.
"Уңганнарым" дияр илем
Безнең хезмәтне хуплап.

10. Яңа шәһәрләр төзербез
Игәрбез кырда иген.
Кирәксә Гагарин сыман
Айкарбыз җиһан күген.

11. Көтегез үсеп җиткәнне
 Чыгарбыз ерак юлга.
Күктән йолдыз алып кайтып

Бирербез сезнең кулга.

12.Сүз бирәбез сезгә бүген

Укырбыз "4" кә "5" кә.
Җиң сызганып өйрәнербез
Сез кушкан һәрбер эшкә.

Бергә: Вәгъдәне үтәрбез,
Теләккә җитәрбез
Туган илгә без
Хезмәт итәрбез.

Җыр: “Күңелле балачак”

ЯҢА ЕЛ КОТЛЫ БУЛСЫН!

   Алып баручылар:

   - Ишетәсезме , дуслар? Сизәсезме , дуслар?

   - Сизәбез, Аяз,  бик яхшы сизәбез.

• Нәрсә сизелә, Зилә?

   -  Яңа ел чыршысын әйтәм инде. Быел ул бигрәкләр хуш исле. Аны сизми калу

        мөмкинме соң?
   -  Тагын ниләр сизелә, дустым?

   -  Тәмле апельсин исе килә... 
   -  Тагын?
   -  Тагын нәрсә сизеләме? Бүген кешеләр ягымлырак, күзләреннән нур ташып тора...
   -  Нигә шулай икән соң ул?
   -  Ничек шулай булмасын? Бүген бит бездә Яңа ел кичәсе.
   -  Баштук шулай диләр аны.
   -  Әйдә ,Аяз, соравыңны яңадан кабатла.
   -  Ишетәсезме, дуслар?
   -  Сизәсезме, дуслар?    

  Бергә: Яңа ел килә! Яңа ел килә!

 Алып баручы: Исәнмесез, кадерле дуслар! Яңа ел белән сезне! Ул сезгә нык  

                          сәламәтлек, бәхет, шатлык алып килсен!

1 укучы: Исәнме, чыршы, исәнме!
               Тагын да бер ел үтте
               Күңелле чыршы бәйрәмен
               Балалар күптән көтте.

2 укучы: Ян яктырак, чыршыкай
               Балкысын утларың
               Бүген синең тирәңә
               Җыелган дусларың.

3 укучы: Күрегез безнең чыршыны
               Ничек матур киенгән.
               Безгә бәйрәм ясар өчен
               Урманнан безгә килгән.

4 укучы: Нинди генә уенчыклар
               Муенсалар юк анда:
               Серле шар һәм алмалар,
               Бөреләр дә бар анда.

5 укучы: Гаҗәп күркәм безнең чыршы
               Җем-җем килеп яна ул.
               Башлыйбыз чыршы бәйрәмен
               Котлы булсын Яңа ел!

 Бергә: Котлы булсын Яңа ел!

6 укучы: Кыш килде акка төренеп
               Җир өстен сөеп кенә .
               Тау битләрен сыйпап үтте
               Ак көртләр өеп кенә.

7 укучы: Җем-җем иткән йолдыз белән
               Тулган төнге саф һава .
               Ә көндез ап-ак чәчәктәй
               Ябалак карлар ява.

Алып баручы: Уңган кыш, юмарт кыш! Балаларга күңелле уеннар алып киләсең, ә

бәйрәмнәреңнең иң ямьлесе, көтеп алганы, әлбәттә инде, чыршы бәйрәме.
               Дәртле көйләр яңгырасын
               Күңелләрне җилкетеп
               Парлашып бер биеп алыйк
               Чыршы янын гөрләтеп.
                                                       

Чыршы тирәли җырлап әйләнү. 

                                     Яңа ел әкияте. «АК яфрак »
1 өлеш.    Убырлы карчык йорты. Алып баручы сәхнә алдына чыга. 

А.б.    Борын-борын заманда, менә шушы аланда яшәгән ди бер Убырлы карчык. Аның берсеннән берсе ялкау ике кызы булган. Әкияттән әкияткә күчеп йөри торгач, Убырлы карчык бик картайган, авызында теше калмаган, бөтен нәрсәне чәйнәми генә йота икән. Ой! Өеннән чыгып килә.Тс-с-с... Мин качтым.

У.к.   Уң якка да янтайдым,
         Сул якка да янтайдым,
         Баралмыйм да, таралмыйм да,
         Картайдым, аһ, картайдым.
         Эх, Шәп чакларым бар иде,
         Карурманнар тар иде,
         Мине күргән җен-пәринең
         Ике күзе шар иде
         Ах, картайдым шул, картайдым.
Ялкауларым, чыгыгыз әле монда. Җилбикә! Йокыбану! (иренеп кенә чыгалар)
Җил.  Я, нәрсә инде...
Йок.   Әле дә үлмәгән икән...
У.к.    Үлгәнче, эшләр өйрәтәсем бар әле сезгә.
Икесе бергә: Ә безнең эшлисе килми.
Йок.   Эшләсәң ямьсезләнәсең.
Җил.  Синең кай төшең матур соң? Гөмбәколак!
Йок.   Табак авыз!
Җил.  Чеметәм!
Йок.   Тырмыйм!
У.К.   Алабай. Мияубай. Үтерәләр!
         (Алабай, Мияубай килеп керәләр, кызлар тегеләргә тибә башлый) 
У.к.   Туктагыз!
Йок.  Матур апакаем дип әйтсен!
Җил.  Матур имеш. Матур минем кебек була ул!
Йок.  Нәрсә сөйләгән була, көянтә сыйрак.
У.к.   Талашып ятканчы, киндер сугар идегез.
Йок.  Мин лутчы кияүгә чыгам.
Җил.  Әле сиңа кадәр минем чыгасы бар. Рәхәтләнеп, бер нәрсә эшләмичә, тәмле

          әйберләр ашап ятар идең бугай.
Йок.  Минем авыз табак кадәр түгел лә. Сиңа гына сыя ул.
Җил.  Болай гына әйтәм. Минем кебек матур кыз күргән кеше, миңа гына өйләнә инде  ул.
Йок.   Алабай,әйт әле шуңа минем генә матур икәнне.
Алабай:   һау-һау!
Йок.   Юк дисеңме, ычкын моннан.
Җил.  Мияубай, миннән дә матурракларның тумаганлыгын дөреслә әле.
Мияубай.  Мияу-Мияу!(баш селки.)
Җил.   Алайса ычкын, перес, перес!
Убырлы.  Туктагыз! (Бөтенесе туктап кала, йорт иясе керә) Туктагыз, Мин сезне үз  һөнәрләремне өйрәтер өчен җыйдым. Йорт иясе, дустым, әйт, нишләтим боларны?
Йорт иясе.  Яхшылап чыбыкла! (убырлы чыбыкламакчы була, кызлар кача)
                   Ух,тишек борыннар!
У.к.   Жәлке шул, үз кызларым бит.
Й.иясе.  Яшьрәк чакта сыртларын көн дә кашып торырга кирәк аларның. Картайгач, соң  була ул.
У.к.  Ачуымны чыгарма әле. Сиңа рәхәттер, үз кызларың булмагач, кешенекен яманлау.
Й.иясе.  Мин йорт иясе икән, алар минем дә балаларым була бит.
У.к.   Алайса, булыш. Син миннән акыллырак, сакалың да әнә нинди озын. Бир бер

          киңәш, нишләтим кызларымны?
Й.иясе.  Алайса, син аларның үзләрен генә калдыр да, өеңнән чыгып кит. Үзләре эшкә  өйрәнсеннәр. Көзгеләрне сихерләргә онытма: аларны ямьсез күрсәтсен.

У.к.    Әфсен-төфсен, әфсен-төфсен,
          Матурларны ямьсез итсен,
          Кызларны эшкә өйрәтсен.
          (Төрле якка карап, шул сүзләрне кабатлый, чыгып китәләр)

            2өлеш.   (Берсе төчкерә-төчкерә,икенчесе киерелә-киерелә кызлар керә) 
Җил.  Гыр-гыр гырылдап ,бер чүлмәк йокы чыга.
Йок.   Әрекмән колагын киереп, Җилбикә диген. (көзгеләренә карап, бизәнергә утыралар, аһ-ваһлыйлар,елый башлыйлар, эт белән мәче өреп-мияулап яннарына

           килә, тегеләр тибеп кенә җибәрә)
Җил.  Әйдә, ичмаса, ашыйк.
Йок.  Убырлы, ашарга бир әле!
Җил. Үлде микән әллә?
Кычкырышалар: Убырлы! Убырлы! (Беркем дә күренми)
Йок.   Әйдә алайса, үзебез булса да пешерик инде, тамак ачты.
Җил.   Алабай тәлинкәсендәге ботканы гына ялыйм мин (Мүкәләп ялаганда, Алабай  тәпиеннән тешләп ала) Алалай!
Йок.  Ә мин мәче сөтен эчәм. (Ул эчкәндә, мәче тәпиен кытыклый) Хи-Хи-Хи...
Җил.  Убырлы, ачтан үтерәсең бит, ашат инде! (бөрелеп йөри башлый, аннан ята)
Йок.   (Егыла)  Үләм,бер күзем йомылды.
Алабай.    Мин нәрсә эшләсен беләм.
Мияубай. Нәрсә?
Алабай.    Кыш бабайны чакырырга кирәк.
Мияубай.   Убырлы карчык сихерләп тә куркытмаганны, ул аларны эшкә өйрәтер

                   дисеңме?!
Алабай.     Балалар алар яхшылык белән өйрәткәнне , мактаганны ярата.
Мияубай.  Бүләк биргәнне дә диген. Әйдә чакырыйк алайса. Кыш бабай! Кыш бабай!

                    (капчык күтәреп Кыш бабай керә) 

 Кыш бабай. Исәнмесез! Нәрсә сез мине вакытыннан алда борчыйсыз әле? Яңа ел

                       килеп җитәргә берничә көн бар бит әле

 Алабай.   Җилбикә белән Йокыбану Яңа елга бозык гадәтләрен алып кермәсен дип, Сезне чакырган идек.

К.Б.   Нинди гадәтләр ул?
Мияубай.  Алар бер дә эшләргә яратмыйлар.(кызлар башларын күтәреп, колакларына  кулларын куеп тыңлап яталар)

К.Б.  Эшләмәгән кешеләргә бүләкләрем дә юк минем. Берәр эш күрсәтмәсәләр, аларны яңа елга алып кереп булмас.(яннарына бара, тегеләр үлгәнгә салынып яталар).   Әллә  үлгәннәр инде. Ярар, аларга дигән күчтәнәчләремне мин сезгә бирермен.   (Кызлар сикереп торалар)  Юк, юк, без үлмәдек. Ял гына итә идек.
К.Б.   Кызларым, нинди һөнәрләрегез бар?
         (Кызлар як-ягына караналар)
К.Б.   Сез әлегә карап, иптәшләрегездән өйрәнеп утырып торыгыз. Әйдәгез әле,

        балалар, бер ел эчендә ниләргә өйрәндегез икән, һөнәрләрегезне күрсәтеп алыгыз.
                                       

 Концерт программасы  дәвам итә.   Шигырьләр, җырлар, биюләр.

К.Б. Рәхмәт, балалар. Сез бик күп беләсез икән. Җилбикә белән Йокыбануга да үз һө-нәрләрегезне өйрәттегез. Алар моннан соң ялкауланмаслар. Сезне якынлашып килүче Яңа ел белән котлыйм һәм зур, кыю, батыр булып үсүегезне телим.

К.К. Кадерле, дуслар! Мин дә сезне Яңа ел белән котлыйм!
       Зәңгәр күк аяз булсын
       Илебез тыныч булсын
       Аналарның, балаларның
       Күңеле тыныч булсын!
К.Б. Балалар, инде минем китәр вакыт та җитте. Мин сезнең белән саубуллашам.

         Сез уйнагыз, шаярыгыз. Яңа ел котлы булсын!

        Сау бул,  Кыш бабай!

         Уеннар  дәвам  итә.

                                «Көлкәй» әкияте.  

Яңа ел кичәсе. Зал бәйрәмчә бизәлгән. Музыка уйнап тора.

Катнашалар:   Шут,  Көлкәй,  Үги әни һәм аның кызлары,   Көлкәйнең әтисе,

                        Тылсымчы Фея,  Патша,  Патша улы.

Күңелле музыка астында кулына төргәк тотып Шут килеп керә.

Шут:               Исәнмесез, без киләбез

                         Сезгә ерак  илләрдән

                         Җиткерәбез Сезгә указ

                         Өязнең короленнән.

                               Тыңлагыз, тыңлагыз

                                Җыелыгыз, уйлагыз!

                                Ишетмичә калмагыз

                                Сөенегез, җырлагыз!

                                         У К А З.

                     Король  улы бик шәп егет

                           Өйләнергә җыена.

                           Кызлар Сезне чакырабыз

                           Корольнең сараена.

                                     Король улы бик шәп егет

                                     Бии дә ул, җырлый да

                                     Аңа уңган кәләш кирәк

                                     Бармы сезнең арада.

Үги әни:  Кызларым, сез кайда? Әйдәгез, Сезне бәйрәмгә чакырдылар.

                 Әй, син, ахмак, әйберләр алып кайттыңмы?

                                                          (Көлкәйнең әтисенә җикеренә)

1нче кыз:   Әни, кидем күлмәгемне

                  Кайда минем калфагым?

                  Көлкәй, китер чүәгемне

                  Кайда минем балдагым?

Әнисе:      Яшел дуга черки куна

                  Черки түгел кигәвен.

                  Мә калфагың, бизәү бизән

                   Король  булсын кияең.

                                                (кызын такмаклар әйтеп киендерә)

2нче кыз: Көлкәй,  китер сумочкамны

                 Кайда минем кершәннәр?

                 Әйдә, тизрәк чәчемне җый

                 Мине бәйрәмгә көтәләр.

Әнисе:     Ә, син, Көлкәй, беркая да

                Чыгып китмә өеңнән.

                Идәнне юу, ташы су да

                Сыер кайтыр көтүдән.

Көлкәй:   Әни эшләрне бетергәч

               Мин дә барсам ярыймы?

               Читкә генә барып басып

               Карап торсам ярыймы?

Әнисе:    Бу эшләр генә җитмәсә

               Менә сиңа тагын эш.

              Син боларны чүпләгәндә

              Без кайтып та җитәрбез.

         (төрле ярмаларны идәнгә сибә)

               Киенегез, бизәнегез!

               Матурларым кызларым

               Ә син ахмак, катма басып

               Әзер булсын атларың.

                        Китәләр.  

Фея керә: - Көлкәй, нишләп елап утырасың?

 Көлкәй:    - Бәйрәмгә барасым килә.

Фея:        Әйдә, Көлкәй, син дә җыен

           Корольнең зур залына.

           Тик кайтып китә генә күр

           12 не сугуга.

           Патша  өендә.

Кызлар:    Алын алырсыз микән?

            Гөлен алырсыз микән!

            Кайсыбызны шул арадан

            Сайлап алырсыз икән.

Патша улы: Алларын да алырбыз

               Гөлләрен дә алырбыз

               Күңелебезгә кайсы ошый

               Шунысын сайлап алырбыз.

            Таныштыру  музыкасы

Патша: Биюләрне башлыйбыз

             Кәләшләрне сайлыйбыз.

                  Маэстро, көйне башлагыз!

                        “Вальс”        

            (Сәгать сукканы ишетелә).

Көлкәй:Онытканмын, соңга калдым.

            Ничек чыгып китәргә?

            Апаларга белдертмичә

            Өйгә кайтып җитәргә.

           (Көлкәй чыгып йөгерә, туфлие төшеп  кала.)                              

Патша  улы:  

           Хәзер генә шунда иде

           Кая китте бу гүзәл?

           Исемен дә беләлмадым

           Шунысы бигрәк тә җәл.

Патша:Таралыгыз һәммәгез дә    

            Бу матурны эзләгез.

            Табып кайталган кешегә

            Булыр зур бүләгебез.

    (Туфлине кызларга кигезеп карыйлар)

Шут:  Көлкәйне эзләп таптылар

          Аннан соң бәйрәм үтте

          Ышаныгыз балдан – майдан

          Миңа да өлеш тиде.          

  Көлкәйне алып кайталар,җыр-бию, бәйрәмне дәвам итәләр.

ӘЛИФБА  БӘЙРӘМЕ

1.  Күч  безнең  күңелгә

      Җыр  яме,  җир  яме!

      Рәхим  ит,  түрдән  уз,

      Әлифба  бәйрәме!

                            Җыр: ,,Әлифбам”

          З.Туфайлова сүз., Л.Хәйретдинова  көе.

 2.         Әлифбабыз  тәмам  булды

             Без  җыелдык  бәйрәмгә.

             Шатлыгыбыз  эчкә  сыймый

             Ничек  сезгә  сөйләргә.

 3.  Шатлык  балкый  бүген  йөзебездә

      Моңсулык  бар  күзебездә.

      Беренчедән  соңгы  биткә  кадәр

      Зур  юл  үттек  үзебез  дә.

 4.          Бөтен  хәрефләрне  белдек

              Алардан  сүзләр  тездек.

              Тукталып  уйлап  куябыз-

              Бик  тиз  өйрәндек  диеп.

 5.  Безне  белемле  итте,

      Безне  әдәпле  итте,

      Безне  чын  кеше  итте

      Сөйгән  китап - Әлифба!

6.  Хәрефләрне  тиз  өйрәндек,

      Сүзләр  төзеп  уйнадык.

      Укуы  авыр  булса  да,

      Мәктәптән  һич  туймадык.

Җыр: „Хәрефле шакмаклар“

 7.         ,,Әни”  дип  телем  ачылган,

              Әни  сөйгән,  назлаган.

              Кайсыбыз  соң  дәфтәренә

              Ә хәрефен  язмаган?

 8.  Күктә  йолдызлар кабынгач

      Аяз  буласын  беләм.

      Йолдызның  һәр  почмагында

      Л хәрефләрен  күрәм.

 9.          И  хәрефе  ипидә  бар

              Бар  ул  ил  һәм  иректә.

              И  хәрефе  икелегә

              Укымаска  өйрәтә.

 10. Ябалакның  зур  күзләре

       Ялтырый  караңгыда.

       Ф  хәрефенә  охшаган

       Туп-туры  караганда.

11.       Бәр  барабан,  уйна  быргы!

            Бар  кешеләр  ишетсен!

            Б дан  башка  бәйрәм  югын

            Барчасы  белеп  торсын!

12.   А  тора  Әлифбаның

        Иң  мактаулы  җирендә.

        А  дан  башка  әйтеп  булмый

        Ата-ана  сүзен  дә.

13.       Һәммәсенең  үз  урыны

             Барысы  да  кирәкле.

             Безне  Әлифба  китабы

            Дус  булырга  өйрәтте.

 Әлифба  керә: Нәни  дусларым!

           Рәхмәт  сезгә  дә

           Әлифбаны  нык  үзләштергәнгә.

           Белем  серләрен  керергә  ачып

           Сезнең  кулларда  хәзер  бар  ачкыч.

           Һәркайсыгыз  да  бик  күп  укысын!

           Китап  иң  якын  дустыгыз  булсын!

14.   Әлифба,  син  алып  кердең

        Безне  белем  иленә.

        Тырышлык  та, ялкаулык  та

        Шушы  илдә  беленә.

15.        Әлифба,  күңелләр  

             Гел  сиңа  ялгансын.

             Син  безгә  хәерле

             Юл  теләп  каласың.

16.   Иң  якын  дусларың

        Булдык  гел  без  синең.

        Һәр  хәреф  елмаеп

        Әйтте  үз  исемен.

17.         Һәм  алар  бик  матур

              Сүзләргә  әйләнде.

              Сүз  төзеп  укуы

              Кызык  һәм  күңелле.

18.   Әлифба,  Әлифба,

        Китәсең  бит  инде.

        Җыр  итеп  җырлыйбыз  

        Иң  соңгы  битеңне.

                       Җыр: ,,Әлифба”

               Р.Вәлиев сүзләре, М.Мухин  көе.

Әлифба: Китәм  сездән,  балалар,

         Шатланып,  горурланып.

         Укуның  да,  язуның  да

         Төп  нигезен  бирдем  дип.

         Минем  белән  алмашка

         Ике  дәреслек  килер

         Дуслашыгыз,  балалар,

          Күп  итеп  җимеш  бирер.

Хор  белән: Рәхмәт  сиңа, Әлифба,

                    Хуш,  хуш,  Әлифба!

Туган  тел  белән  татар  теле:

            Уку:  Мин  туган  тел  буламын.

            Язу:  Мин  татар  теле  булам.

            Уку:  Көн  дә  бергә  йөрербез.

            Язу:  Бик  күп  белем  бирербез.

            Уку:  Мине  укып  сөйләрсең.

            Язу:  Мине  язып  көйләрсең.

            Уку:  Минем  белән  сөйләшеп  

            Язу:  Минем  белән  серләшеп

            Уку:  Бик  күп  юллар  үтәрсең

            Язу:  Хыялыңа  җитәрсең.

19.  Татар  теле - туган  тел

       Безгә  газиз  булган  тел.

       Атаң-анаң,  әби-бабаң

       Сине  сөя  торган  тел.

20.        Туган  тел - иң  әйбәт  шигырь.

             Туган  тел - иң  әйбәт  җыр.

             Туган  тел - иң  әйбәт  китап.    

             Туган  тел - иң  якын  тел.

                      Җыр: ,,Туган  телем”

       Э.Мөэминова  сүз.,  М.Минһаҗев  көе.

Математика: Ана  телен  белгән  кебек

             Исәп – хисап  та  кирәк.

             Шуның  өчен  минем  белән

             Дуслашмаганы  сирәк.

             Мин  дә  менә  бүген  сездә

             Бәйрәм  буласын  белдем.

             Зирәкләргә,  тапкырларга

             Мәсьәлә  алып  килдем.

                       ( Мәсьәләләр  әйтә)

Ишек  шакып  ,,5”ле  керә:

             Исәнмесез,  саумысез

             Минем  нәни  дусларым.

             Кемнәр  авырлыктан  качмый

             Яратам  мин  шуларны.

             Кемнәр  тырышып  укый,

             Дөрес  һәм  матур  яза,

             Тәртипле  һәм  эшкә  җитез

             Шулар  минем  дусларым.

21.  Укыгач – укы

        Алгач  ,,5” ле  ал.

        Әйдә  ,,5” ле  дус

        Мәңге  бездә  кал.

,,4” ле  керә: Мин  дә  ,,5”ле  белән

                       Гел  янәшә  йөрим.

                       Һәр  эшнең  яхшы

                       Булуын  телим.

22.  Әйдәгез, 4 ле  дус,

       Түрдән  узыгыз!

       Бездән  китмәгез!

       Бездә  торыгыз!

,,3” ле керә:

       Мин  дә 4 ле  белән  гел  янәшә  барам

       Ләкин  2 гә тәгәрәп  барам.

       Әгәр  дә көчем  биреп  тырышсам

       Мин  дә  4 легә  тиңләшә  алам.

Бергә:  Укучы  булгач, 3 ле  алмыйбыз.

       Без  синең  белән  килешә  алмыйбыз.

,,2” ле  һәм  ,,1” ле  керә:

       Без  нәрсә  әйтик сезгә  иптәшләр

       Берни  белмибез – авыр  безнең  хәл.

       Укыйсы  килми,  язасы  килми,

       Өй  эшләрен  дә  үтисе  килми.

       Уйнап  йөрибез, гел эштән  качып

       Ә  ашаганда  кирәк  зур  кашык.

 Бергә: Хәзер  үк  моннан

             Чыгып  китегез!

              2 ле  һәм  1 легә

              Иптәш  түгел  без!

23.  Безнең  илгә  белемле  һәм

       Намуслы  кеше  кирәк.

       Туган  ил  өчен  яшәрбез

       Үсик  кенә  тиз(е)рәк.

24.         Күктә  йолдыз  якты  янар

              Төннәр  аяз  булганда.

              Безнең  тормыш  матур  булыр

              Тырышып  белем  алганда.

25.  Хыяллар  безнең  канатлы,

       Хыяллар  гаҗәп  матур.

       Киләчәктә  һәммәбез  дә

       Булырбыз  кыю, батыр.

26.         Дус, тату, матур  яшәүнең

              Серенә  төшенербез.

              Бик  тырышып  укыганда

              Уңышка  ирешербез.

27.  Укыганда  укыйбыз

       Эшне  тырышып  эшлибез.

       Җырлыйбыз  да,  биибез  дә

       Бик  күңелле  яшибез.

                             Күмәк бию, уеннар

     ГАИЛӘ БӘЙРӘМЕ

1. Мәктәп бүген гөрләп тора,

Шаулап тора, күрегез.

Без бит бәйрәмгә җыелдык

Әллә шуны белмисез?

2. Кадерле әтиләребез,

Сөйкемле әниләребез!

Бәйрәм белән котлый бүген

Сезне ул һәм кызларыгыз.

3. Дөньядагы барлык матурлыкны

Килә сезгә бүләк итәсе.

Бәйрәмнәрдә  генә түгел, һәрвакытта

Килә сезне хөрмәт итәсе.

4. Сезгә булган олы хөрмәтебез

Урын алсын йөрәк түрендә.

Саулык-сәламәтлек, ак бәхетләр

Юлдаш булсын сезгә мәңгегә.

5. Гомер юлларыгыз озын булсын,

Тигез тормыш аны бизәсен.

Яшәү дәвере якты көннәр бирсен,

Авырлыклар мәңге килмәсен.

Җыр: ”Әтием”

6. Әти кеше, гел яхшылык тели
Гаебебез булса, кичерә.
Гомер буе калыйк тугрылыклы
Әти дигән изге кешегә.

7. Әти безнең терәгебез,

Әти безнең яклаучы.

Авырлыклар китермичә

Давыллардан саклаучы.

8. Иң эшче куллар,
Иң көчле иңнәр
Тик әтиләрдә
Юк аңар тиңнәр.

9. Әтиләр бирә
Иң дөрес киңәш.
Әтиләр була

Иң яхшы сердәш.

10. Ул зирәк тә, шаян да.

Акыллы да,  гаҗәп тә

Кем дисезме, ул кеше?

Минем әти, әлбәттә.

11. Барыбызга да булыша.

Үзенең дә күп эше.

Әнигә, миңа, энемә

Әти- иң кирәк кеше.

12. Яшәсен кадерле әтиләр

Сәламәт һәм шат булып.

Кызларының, улларының

Кадерлеләре булып.

Җыр:” Иң кадерлем син минем”

13. Ана булу – изгелекнең таҗы,
Дөньяда иң олы дәрәҗә.
Ана кеше hәрбер баласының
Бәхетенә ача тәрәзә.

14. Ана сиңа гел яхшылык тели
Гаепләрең булса — кичерә,
Турылыклы калыйк гомер буе
Ана дигән күркәм кешегә.

15. Газиз әнкәй!
Йомшактыр кулларың,
Татлыдыр сүзләрең,
Җылыдыр карашың.

16. Газиз әнкәй!
Иң сөйкемле күзләр – синеке!
Йомшак, җылы куллар — синеке!
Иң – иң татлы сүзләр — синеке!
Җан изрәткән җырлар- синеке!

17. Синсез дөнья күрмәс идек!
Синсез берни белмәс идек
Синсез берни кылмас идек,
Синсез кеше булмас идек!

18. Айдай, кояштай кадерле
Син – ул әнием.
Иң ягымлы, иң сөйкемле
Син ул- әнием.

19. Әни дигән ягымлы сүз
Безнең йөрәк түрендә.
Сакланыр ул мәңге- мәңге
Һәрчак безнең күңелдә.

20. Сәламәтлек ташламасын Сезне
Һәр көнегез үтсен шатлыкта
Яшәү яме, дөнья иминлеге
Юлдаш булсын Сезгә картлыкта.

Җыр: “Һәрвакыт булсын  кояш!”

     БАСАМ   ВАРИС  САФЫНА

1.  Яз кояшы күктән көлеп карый

     Яз кояшы нигә сөенгән?

     Бөтен җиһан бәйрәм көткән кебек

     Кояш нурларына күмелгән.

2.  Җырлый кебек хәтта тургайлар да

     Бәхетле дип безнең замана.

     Күктән кояш үзе ява төсле

     Яңгыр тамчылары тамганда.

3.  Эшкә аша теләкләрем

     Басам варис сафына.

     Тантаналы вәгъдә бирәм

     Иптәшләрем каршында.

4.  Ил алдында ант итәм мин

     Бу антым изге булсын.

     Муенымдагы галстугым

     Гел хәтерләтеп торсын.

5.  Тыныч чакта һәрбер җирдә

     Безнең девиз бер.

     Игелекле эш башкарырга

     Һәрвакыт әзер.

6.  Җирдә тынычлык, туганлык

     Безнең уебыз.

     Ватан биргән зур антка

     Һәрчак тугрыбыз.

7.  Таза буын алмаш булып

     Килә бер сафта.

     Ул әзер эшкә, көрәшкә

     Һәм әзер сакка.

8.  Һәрвакыт уяумы, әзерме?

     Чакыра варислар быргысы.

     Безгә бит бу чорны төзисе

     Заманның җырларын җырлыйсы.

     ,,Варислар вәгъдәсе” җыры

 Р.Курамшин музыкасы.      Ш.Галиев сүзләре.

    Очраштык без мәктәпләрдә,

     Бастык бердәм сафларга –

     Милләтебезне якларга,

     Туган телне сакларга.

                 Кушымта:

              Сүз бирәмен:

              Вәгъдә - иман.

              Иманым камил –

              Тугры калырмын гомергә

              Шушы сафка мин.

       Тарихлар кичкән бабайлар,

       Авыр юллар үткәннәр,

       Бетмәбез, дәвам килер дип,  

       Алар безне көткәннәр.

                  Кушымта.

       Ышаныгыз әти - әни,

       Ышансын милләттәшләр –

       Улларыгыз, кызларыгыз

       Офтанырлык итмәсләр.

                  Кушымта.

9.    Без уяу, без әзер

       Йөрәкләр һәрвакыт ялкынлы.

       Җәлилләр, Алишлар ялкыны

       Мәңгелек ут булып балкыды.

10.  Бәхеткә юл ярып барганда

       Юлдаш ит һәрвакыт халкыңны.

       Яшь калсын йөрәкләр мәңгегә

       Сүнмәсен варислар ялкыны.

11.  Без өйрәндек варисларның

       Данлы үткән елларын.

       Әтиләр һәм әниләрнең

       Канлы көрәш юлларын.

12.  Без гасырларга сузылган

       Озын сафлар башында –

       Бурычлы да, җаваплы да

       Һәрчак алар каршында.

13.  Хыяллар безнең канатлы,

       Хыяллар гаҗәп матур.

       Киләчәктә һәммәбез дә

       Булырбыз кыю, батыр.

14.  Белемле булу өчен,

       Тырышып уку өчен

       Бик күп, бик күп баскыч бар.

       Бик күп, бик күп ачкыч бар.

15.  Белем кирәк ерак юлга,

       Белемле меңне ега.

       Диңгезләрнең төбен күзләп

       Зирәкләр юлга чыга.

16.  Белем иле кайчак миңа

       Никтер серле урман кебек.

       Ә юллары кызыктырып

       Гел чакырып торган кебек.

17.  Сукмакларны әйткән дә юк

       Мең тармаклы имән кебек.

        Тик шулай да бу илдә мин

        Һич адашып йөрмәм кебек.

18.  Кайсы фәнне өйрәнсәм дә

       Тормышка юл салган кебек.

       Әллә шуңа дөнья миңа

       Гел яктыра барган кебек.

19.  Кешеләргә без гел яхшылык эшлик!

       Эшләмәсәк – гарьлек.

       Тик яхшылык эшләү җиңел түгел

        Ул – зур фидакарьлек!

20.  Бирешмибез җил – давылга,

       Ярсу безнең йөрәкләр.

       Хезмәт белән илне зурлап

       Яшәү безнең теләкләр.

21.  Тормыйк көтеп яхшылыкны

       Безгә эшләр диеп кемдер.

       Яхшылыклар эшлик! Күңелеңнән

       Син дә үз – үзеңне күндер!

22.  Безгә - варисларга

       Ил - әнкәбез ышана.

       Без аларга әйтәбез:

- Кара алтын чыгарырга без әзер!

       - Ком – чүлләрне сугарырга без әзер!

       - Марска да юл алырга без әзер!

       - Яңа чыганаклар корырга без әзер!

       - Ватан сагында торырга без әзер!

       - Ил төзүчеләр булырга без әзер!

23.  Бөтен отряд каршысында

       Без сүз бирәбез:

       Өйдә һәм мәктәптә һәрчак

       Үрнәк булырбыз!

       Бар эшкә дә, көрәшкә дә

       Әзер торырбыз!

       Чын варислар булыр өчен

       Тырышып укырбыз!

           ,,Яшь алмаш җыры”.

      Р.Миңнуллин сүзләре.   Ф.Әбүбәкеров музыкасы.

       Без укуда сыналабыз

       Зурлар эштә сынала.

       Илебез кушкан эшләрнең

       Без әзер барсына да.

                       Кушымта:

            Илебезгә дан җырлыйбыз.

            Үскәчтен дә җырларбыз.

            Илебезне зурларбыз,

            Җиребезне нурларбыз

            Без – балалар бүген генә,

            Ә иртәгә зурлар без.

       Өлкәннәрдән өйрәнәбез

        Ничек иген урырга,

        Ничек галәмгә менәргә,

        Ничек батыр булырга.

                         Кушымта.

        Саклашырбыз тынычлыкны

        Иртәгә дә, бүген дә

        Күгәрченнәр генә очсын

        Илебезнең  күгендә.

                          Кушымта.

                      БӨЕК ҖИҢҮ БӘЙРӘМЕ

1. 20 нче гасырның иң дәһшәтле афәте – икенче бөтендөнья сугышы.Ул безнең илгә бетмәс-төкәнмәс бәла-казалар китергән.  27миллион гомерне өзгән, меңләгән шәһәр, авылларны хәрәбәгә әйләндергән.

2. Тоташтан янган авыл урынында

    Үлем кыравы - көл генә калган.

    Тыңлагыз, көлдә

    Йөрәкләр тибә,

    Меңләгән күзләр

    Карыйлар аннан.

3. И, Җир-Ана!

    Мондый мәхшәрне син

    Күргән идеңмени моңарчы?

    Күкрәгеңне сыер-үгез җигеп,

    Тол хатыннар, картлар ермачлый.

4. Хәлсезләнгән куллар көч-хәл белән

    Җир куенына бөртек төшерә.

    Хат йөртүче кара кайгы ташый,

    Хәсрәт өстәп, хәсрәт өстенә.

5. Сугыш килде бездән сорамыйча

    Шакымыйча керде ишектән.

    Тешебезне кысып, җавап бирдек

    Без түзәргә тиеш ничек тә.

6. Көрәшләргә чыктык, ил чакыргач,

    Газиз башлар ниләр күрмәде!

    Нинди генә суны кичмәдек тә,

    Нинди генә утка кермәдек!

7. Борчылмагыз, дуслар, намус белән

    Без үтәрбез Ватан кушканны,

    Без үтәрбез илнең чикләреннән

    Тар-мар итеп явыз дошманны.

8. Мин сугышка керсәм, дошманымның

    Йөрәгенә терәп атармын.

    Үзем үлсәм, балаларым кала-

    Минем гомерем булып, Ватаным.

9. Егет үткән юлда сафлар сынды,

    Туплар ауды, танклар ватылды.

    Кайдан алды егет мондый көчне,

    Кайдан алды мондый ялкынны?

  М.Җәлилнең ,,Кызыл ромашка” шигыренә композиция.

10. Иртәнге таң нурыннан

     Уянды ромашкалар.

     Елмаеп, хәл сорашып,

     Күзгә-күз караштылар!

     Назлады җил аларны,

     Тибрәтеп ак чукларын.

      Таң сипте өсләренә

      Хуш исле саф чыкларын.

      Чәчәкләр, кәефләнеп,

      Җай гына селкенделәр.

      Һәм кинәт шунда гаҗәеп

      Бер яңа хәл күрделәр.

      Ерак түгел моңаеп

      Утыра ромашка кызы,

      Тик чуклары ак түгел,

      Кан шикелле кып-кызыл.

      Ромашкалар бар да ак,

      Аерылмый бер-береннән,

      Ничек болай берүзе

      Ул кызылдан киенгән?

  Барысы бергә:

      Син, сеңелкәй,

      Ник үзгәрдең? Нишләдең?

      Нигә кызыл чукларың?

      Нинди алсу төсләрең?

11. Төнлә минем яныма

      Ятып батыр сугышчы

      Атты дошманнарына.

      Ул берүзе сугышты

      Унбиш укчыга каршы;

      Чигенмәде, тик таңда

      Яраланды кулбашы.

      Аның батыр ал каны

      Тамды минем чукларга,

      Минем кызыл күлмәгем

      Бик ошады Чулпанга.

      Егет китте, мин калдым

      Канын саклап чугымда,

      Көн дә аны сагынып

      Балкыйм мин таң нурында.

12. Сугышларда яраланган чакта

      Көчле рухын солдат җуймаган.

      Ул яңадан баскан утлы сафка,

      Фашистларны ярсып кыйнаган.

13. Корбаннар бәрәбәренә яуланган Җиңү   көнен илем халкы менә инде 70 еллы гын билгеләп үтә.

14. Җиңү көне, Җиңү көне!

      Аңлатырга сүз җитмәс...

      Шатлыклы да, кайгылы да

      Күзләрдә яшьләр кипмәс!

     Җыр:,,Балаларның көлүләре”

   Балаларның көлүләре

   Тынычлыкның җыры сыман.

   Ул көлүгә балачакның

   Әллә күпме җыры сыйган.

             Балаларның көлешкәнен

             Ишетсен Җир, тыңласын Җир!

             Балаларның көлүеннән

             Берчакта да тынмасын Җир!

   Көлү безне дуслаштыра,

   Көлү безне берләштерә.

   Бәхетле дә, көчле дә без,

   Бергәләшеп көлгәч кенә!

         Ә балалар көлә икән

         Илебездә, Җиребездә,

         Димәк, Җир дә исән әле,

         Имин, димәк, илебез дә!

15. Бу көнне без һәлак булган изге җаннарны хәтергә төшерәбез, исәннәрне бу бөек бәйрәм белән ихлас күңелдән котлыйбыз.

16. Кайтмаганнар  уйда сакланалар

      Җырда ятланалар кайтмаганнар...

      Исемнәре данга төрелгәнгә

      Һәйкәл булып басты кайтмаганнар!

17. Һәйкәл булып баса җиңүчеләр,

      Һәйкәл булып баса батырлар,

      Ә батырлар ике тапкыр үлми,

      Җирдә алар мәңге балкырлар.

18. Һәйкәлләрне җансыз дия күрмә,

      Һәйкәлләрнең җаны таш түгел.

      Һәр һәйкәлдә күпме солдат җаны?

      Һәйкәлләргә сыкрау хас түгел.

19. Зур сынаулы еллар килгән чакта

      Беленә икән кемнең кемлеге.

      Бер минутлык тынлык белән

      Искә алыйк бүген без сезне.

20.     Нәбиева Зилә:   Бабам  истәлегенә

      Кабат  мәртәбәләр  киләмен  мин

      Бабаемның  рәсеме  каршына.

      Ниләр  күрде,  күпме  хәсрәтләр

      Төште  икән  аның  башына.

      Бабам,  бабакаем  минем,

      Күрмәдем  мин  нурлы  йөзеңне.

      Әниемнән  дә  артыгырак  итеп

      Ишетәсе  иде  назлы  сүзеңне.

      Беләмен  мин  каһармандай  сугышып

      Саклагансың  туган  илеңне.

      Сугыш  беткәч,  исән-имин  кайтып

      Сөендергәнсең  әти-әниеңне.

      Сокландыргыч  тормыш  юлы  үтеп

      Киткәнсең  син  безнең  арадан.

      Нигә  киттең бабам  иртә  үлеп

      Матур  өйләр  салдык  бурадан.

      Илебезнең,  өебезнең  матурлыгын

      Күрә  алмассың  инде  беркайчан.

      Туган  илдә  куйган  батырлыгың

      Онытмаслар  аны  һичкайчан.

      Кәлимулла  бабам,  минем

      Төшләремә  һәрчак  керәсең.

      Авырлыклар  килгән  әмәлдә  дә

      Яшәргә  син  күп  көч  бирәсең.

      Ышан  миңа,  чиксез  рәхмәтебез

      Сакланалыр  безнең  күңелдә.

      Тыныч  йокла,  бабам,  без  барында

      Тыныч  булыр  илем  күгендә.

21. Беребез дә теләмибез кабат

      Сугыш утларына керергә.

      Менә шуңа күрә кирәк безгә

      Тынычлыкның кадерен белергә!

22.  Бабаем медальләрендә

       Кояш нурлары уйный.

       Аның шикелле үк мин дә

       Батыр булырга уйлыйм.

       Ләкин сугышны яратмыйм,

       Килми аны күрәсем.

       Килми минем япь-яшь килеш

       Яу кырында үләсем.

       Бабама охшыйсым килә,

       Хыялым ерак китә.

       Хезмәт батыры булырмын,

       Тынычлыкка ни җитә!

23.  Яшибез гел шулай кояшлы

        Һәм тыныч көннәргә сөенеп.

        Һәркемнең күңелендә бер теләк

        Иминлек! Иминлек! Иминлек!

24.   Гүзәл якты дөнья,

        Ул бит синең кулда!

        Синең кулда аның язмышы.

        Тыныч яшәү өчен

        Көрәш, көрәш, кешем!-

        Гамьсез яши күрмә ялгышып.

25.   Күгәрченнәр очсын уйнап,

        Дуслык йөрсен илләр буйлап.

        Зәңгәр күктән үлем түгел

        Нурлар яусын җиргә муллап.

  Җыр ,,Һәрвакыт булсын кояш!”

СӘЛАМӘТЛЕК  АЛАНЫ

                                           Беренче күренеш.

Урман.  Кошлар  сайрый. Тиен гөмбә җыя, ә  Керпе  алмалар тоткан.

Тиен:     Исәнме, Керпе дускай,

               Ни эш бетерәсең болай?

Керпе:   Алма җыеп балаларга

               Ашатырга уйладым.

               Сәламәт һәм сылу булып

               Үстерсеннәр буйларын.

Тиен:     Мин дә менә гөмбә җыям

               Кышка азык күп булсын.

               Витаминлы ризык белән

               Гәүдәм бик сылу булсын.

Керпе:   Сәламәтлек  һәркем өчен

               Булсын тик изге теләк.

Тиен:     Шүрәле хәленә калмау

               Безнең өчен бик кирәк.

Керпе:   Ә, ни булган Шүрәлегә?

               Сөйләп бирмәссеңме икән?

Тиен:     Борын – борын  заманда

               Кәҗә  команда,

               Саескан  сотник,

               Үрдәк  урядник

               Булган  урманда

                   Бик  елак  та  булмаган,

                   Бик  тәртип  тә  бозмаган,

                   Бик  ялкау  да  булмаган

                   Бер  Шүрәле  яшәгән.

               Яшәгән,  ди  бу  Шүрәле,

               Бик  зур  газап  кичереп,

               Бөтен  тәне  сызлавыннан

               Яшәгән, ди  ул,  интегеп.

                   Китапларны  ятып  укып

                   Күзләре  кысылып  беткән.

                   Бармаклары  кәкре – бөкре,

                   Тешләре  череп  беткән.

               Хәле  начар  булганлыктан,

               Бөтен  күңеле  тулган,  ди.

               Чөнки  бу  Шүрәле  белән

               Менә  нәрсә  булган, ди.

Икенче   күренеш

Урман. Шомлы музыка астында хәлсез Шүрәле керә, авыртуына түзә

алмыйча кычкырып җибәрә.

         Зур газап эчендә бүген кызарып туды таңым,

         Сызлыйдыр бармак,тәннәрем.

         Кем соң дәвалар мине?

         Аһ, үләм. Харап булдым ич,

         Коткарыгыз сез мине.

         У – у – у. Үләм.

Шулвакыт  Төлке  күренә, Шүрәлене күрә һәм куркып:   Син  кем?

Шүрәле: Курыкма  син, өрекмә  син,

                 Мин  явыз  Шүрәле  түгел.

                 Өстерәлеп  кенә  йөрим,

                 Сәламәтлегем  нык  түгел.

Төлке: Шүрәле, нинди Шүрәле?

            Мондый Шүрәле була димени?

            Бармакларың кәкре – бөкре,

            Күзләрең  кысылып беткән,

            Тешләрең дә исән түгел,

            Барысы да череп беткән.

            Әллә инде бөкрең дә бар?

            Кит инде, шул яшеңнән!

            Дәваланырга  кирәк  сиңа

            Кичекмәстән, күптәннән.

Шүрәле: У – у – у. Әйтәм ич, мине берсе дә танымый. Нишлим соң, Төл-

            ке дус. Киңәш бир.

Төлке: Менә миңа син кара,

            Бармакларга, колакка.

            Күзлегем дә юк бит минем,

            Буй – сыным  да бик зифа.

Шүрәле: Хәлләр начар, Төлкекәй,

            Берәр  серен  әйтчекәй. (аягына барып егыла, тезләнә)

Төлке: Я, я, ярый инде, ачам, ачам серемне. Мин былтыр бик матур алан-

            га  килеп  чыккан  идем.

Шүрәле (бүлдереп): Ә - ә - ә (куркып). Былтыр, былтыр дисеңме? Мин кур-

            кам  аңардан. (Кача  башлый)

Төлке: Юк  ла  инде. Синең  нинди  былтырың  булсын. Теге  елны  дип

            әйтүем. Сиңа  дәваланырга  кирәк. Кичектермәскә.

            Серле  алан  мәктәбендә

            Бик  күңелле  ди  анда

            Шуңа  күрә  беркемнең  дә

            Кайтасы  килми  аннан.

           Анда  иң  кирәкле  нәрсә

            Исәнлек  яши  икән.

            Сәламәтлек  ачкычы  да

            Шушында  яшеренгән.

Шүрәле: Белсәң  иде, белсәң  иде

             Минем  сызланганымны.

             Әйдә  ашыгыйк, көтеп  тормыйк

             Тагын  кемдер  чыкканны.

Төлке:  Ярый, әйдә  киттек,

             Тик  минем  бер  шартым  бар:

             Уйнамасаң  гына  кети

             Чыгардым  шундый  карар.

Шүрәле: Юк, юк, кытыкламыйм.

(Китәргә җыеналар.Тик Шүрәле  кузгалмый, утыра).

Төлке (артына борылып): Тор, әйдә  нәрсә  утырасың?

                                                Нәрсә  көтеп  торасың?

Шүрәле: Автобус.

Төлке:  Хәрәкәттә - бәрәкәт, дип

              Әйткән  бит  синең  бабаң.

              Саф  һаваны  сулый – сулый

              Барабыз  әле, туган.

              Раз, два, раз, два,

              Һаваны  иркен  сула. (китәләр, агачларны әйләнәләр)

Музыка  яңгырый. Икенче  яктан икешәрләп җәнлекләр  чыгалар.

Төлке:   Чү, тукта. Карыйк  әле,

              Болар  кая  баралар?

Җәнлекләр  җырлый:

1нче пар:     Иренмичә  беркайчан  да

                     Иртә  торып  басабыз.

                     Кояш  нурларын  каршылап,

                     Тәрәзәләр  ачабыз.

 2нче пар:        Иртәнге  салкын  һаваны

                         Сулыйбыз  иркен  итеп.

                         Әйдә,  дибез,  физзарядка,

                         Кулны  канаттай  җилпеп.

 3нче пар:    Сәламәтлек  аланына

                      Нык  басып  киләбез  без.

                      Кемнәр  тели  чыныгырга,

                      Әйдәгез, диябез  без.

Төлке:   Менә  күрдеңме, Шүрәле,

              Алар  кая  талпына?

              Әйдә, без  дә  соңга  калмыйк,

              Барыйк  алар  янына.  (Чыгып  китәләр).

Өченче   күренеш.

Урман  аланы. ,,Сәламәтлек мәктәбе” дигән  плакат  эленгән. Кыңгырау шалтырый, җәнлекләр (музыка астында)  зарядка  ясыйлар.

Төлке  Шүрәлене  алып  керә. Җәнлекләр  аларны  чолгап  ала.

Төлке:  Дусларым, исәнмесез,

             Хәерле  көннәр  сезгә!

             Менә  күрегез  дустымны,

             Дәвалау  кирәк  безгә.

Җәнлекләр (барысы  бергә):

             Булышабыз, булышабыз,

             Бик  теләп  булышабыз.

1нче  җәнлек: Тик безнең табышмакларның җавабын тапса гына.

(Һәрберсе  берәр  табышмак  әйтә).

        1.  Кечкенә  генә  кунача

             Утыз  ике  кодача

             Утыралар  кунакта.   (тешләр)

        2.  Үзе  шома, күбеккә  күмә

             Хуш  исле  ул, я, ни  була?   (сабын)

        3.  Аркасында  сөяге,

             Сөягендә  мыегы.

             Ак  койманы  агарта,

             Мыегы  белән  чистарта.   (теш  щеткасы)

        4.  Битне,  кулны  корыта

             Чисталыкны  ярата.     (сөлге)

                               (Шүрәлене  тәртипкә  китерәләр).

1нче куян:  Курыкмасаң салкын суны

                     Син өстеңә коярга.       (өстенә су сибә)

                     Чыныгырсың, авырмассың,

                     Яшәрерсең тагын да.    ( сөлге белән корыта)

Аю:         Иптәш булсын сабын белән

                Гади теш порошогы.     ( сабын, порошок бирә)

2нче куян:  Ялкаулык бәхет китерми

                      Истә тот шуны бары!    ( кулларын хәрәкәтләндерә)

Керпе:    Саулык – зур байлык икәнен

                Без инде белеп алдык.

                Сәламәт яшәү рәвешен

                Зур максат итеп алдык.

Төлке:     Куркытмый безне салкын да,

                Көчле җил дә, буран да.

                Без сәламәт һәм бәхетле

                Барыбыз бергә булганда.

Тиен:      Кышын да синең табыннар

                Хәтерләтсен җәйләрне.

                Еш куллан син яфраклардан

                Кайнатылган чәйләрне. ( кәрзинен бирә)

Шүрәле: Шушындый  дуслар  булганда

               Яшәүләре  күңелле.

               Яхшы  киңәшләре  белән

               Тазарттылар  үземне.

Музыка  уйный  башлый, җәнлекләр  җырлыйлар:

        1.   Иртә  белән  торабыз,

              Битебезне  юабыз,

              Сабын  белән  юынгачтын

              Бигрәк  матур  булабыз.

                       Кушымта: Авыртуны  белмибез,

                                         Ялкаулыкны  сөймибез.

                                         Чисталыкны  яратабыз,

                                         Шапшакларны  сөймибез.

        2.    Аш  алдыннан  һәрвакыт

               Кулыбызны  юабыз.

               Чиста  итеп, пөхтә  булып,

               Ашарга утырабыз.

                       Кушымта.

        3.   Иртән  зарядканы  да

              Бик  теләп  башкарабыз.

              Чыныгабыз, коенабыз,

              Кояшта  кызынабыз.

                       Кушымта.

        4.   Көнгә  ике  тапкыр  без

              Тешләрне  чистартабыз.

              Җемелдәп, ялтырап  тора

              Таза, нык  тешләребез.

                       Кушымта.

        5.   Кичен  аякларны  да

              Сабын  белән  юабыз.

              Юынырга  яратабыз,

              Без  бик  чиста  торабыз.

                       Кушымта.          

Барысы  бергә:  Күрдегезме,  бу  тамаша

                           Гыйбрәтле  һәм  хикмәтле.

                           Саклагыз  сез,  кадерләгез

                           Изге  сәламәтлекне.

СӘЛАМӘТЛЕК ТЕАТРЫ

Беренче күренеш

Әни: Кызым, тор инде, лагереңа соңга каласың бит. Сиңа әйтәм, уян.

Кыз: Кит әле-е... Башым авырта.

Әни: Беркая да китмим. Тор, әйдә, тор!

Кыз: Бәйләнмәле..  Эчем авырта.

Әни: Ничек инде бәйләнмә! Ничек инде бәйләнмә! Шулай буламыни? Соңга каласың ләбаса.

Кыз: Калса соң...

Әни: Иптәшләрең күптән әзердер инде. Әйдә тор, сумкаңны да тутырдым.

Кыз: Бәйләнмәле-е. Йокым килә.

Әни: Эшкә кушсаң - бәйләнмә, укырга кушсаң – бәйләнмә. Нинди бала булдың соң син?!

Кыз: Ике аяклы, ике куллы...

Әни: Кулларың да, аякларың да, башың да юк синең. Башың булса, бераз уйлар иде,  аяк – кулларың бераз селкенер иде.

Кыз: Булмаса соң. Бик кирәкләре бар иде.

Әни: Ничек инде? Аяк кирәкмимени, кул кирәкмимени, баш кирәкмимени?

Кыз: Бәйләнмәле, тешем сызлый.

Әни: Кызым, тор инде. (күтәреп диярлек аягына бастыра) Нишлим соң инде синең белән? (елый)

Кыз: Җыламале – е..

Әни: Бик җыламас идем дә, җылатасың. Җылатыр өчен туган бала син.

Кыз: Мин тумаган – үзең тудырган.

Әни: Аны беләсең, башканы белмисең. Бар инде, балам, зинһар өчен дип сорыйм, бар.

Кыз: Барам ич инде...

Әни: Менә шулай, балам, менә шулай. И минем үскәнем (киенергә булыша), и минем тәтием, и минем алтыным, и минем бәләкәчем.

Кыз: Җитте-е.

Әни: Булды,булды, бар балам (чыгарып җибәрә). Китте, бара. (залга) Менә шулай инде безнең төпчегебез. Сезнең арада андыйлар юктыр. Төпчек дип иркәләп ташладык шул. Аның көенә биедек. Ә хәзер безне биетә. (сәгатькә карый) Һай, үзем дә соңга калам бит. Кызымның рәхәт аның-ашарына әзер, кияренә  бар. Безне бит эшләмәсәк ашатучы да, киендерүче дә юк. (чыгып китә)

Икенче күренеш.  Җәнлекләр аланда уйныйлар.

Тиен керә:

                     Ботактан ботакка

                     Сикерәм мин һаман.

                     Мин җитез, мин шаян.

                     Кем мине тота ала?

                     Шуңа миннән бүләк-

                     Яшелчә бер чиләк.

Төлке: Кемгә ул бүләк? Нәрсә ул яшелчә? Җиләк-җимеш нәрсә була?

Тиен: Яшелчә һәм җиләк-җимеш - витаминнар хәзинәсе. Аларны нык яратсаң,

           һәрчак таза булырсың. Мин аларны җәйдән үк әзерлим. Мин барлык  

           җәнлекләрне   кунакка чакырам. (Җәнлекләр тиен янына җыелалар).

Тиен: Исәнмесез, дусларым. Әйдәгез табынга.

1 куян: Без бит әле гимнастика ясамадык. Сәламәт булу өчен көнне гимнастикадан

               башларга кирәк. Төлке, тиен, әйдәгез безнең янга. (Куяннар биюе.)

 Төлке:

              Безнең Аю дустыбыз

              Нигә күренми икән?

              Көн уртасы җитеп килә

              Әллә тормады микән?

             (Аю өне янына килә)

- Аю, Аю, тор тизрәк,

Без җәнлекләр бик зирәк

Бергә-бергә уйнарбыз

Син кусаң, без качарбыз.

(Өненнән аю чыга)

Аю: Йоклый идем өнемдә

        Кемдер шаулый урманда

        Өнемме бу, төшемме?

        Күрәм, ахры, төшемдә.   (Кире кереп ятмакчы була).

Төлке: Алай ярамый, Аюкай. Тор, әйдә, бездән калма. Без сәламәтлек  аланына

         барабыз.

Аю: Уф, арыдым, башым авырта, аякларым сызлый, муенга чыдар хәл юк. Миңа сезнең аланыгыз кирәкми. Сез миңа шоколад, чупа-чупс, киндер-сюрприз бирегез. Шуларны ашасам рәхәтләнеп йоклар идем.

Тиен: Аю дус, тыңла әле. Көне буе йоклау зарарлы, төнге  йокы  гына сәламәтлеккә файдалы

Киндер-сюрприз, кәнфитләрне

 Күп ашарга ярамый.

Саулык-сәламәтлек өчен

Яшелчәләр файдалы.

2 куян: 

Җиләк-җимешләр ашасаң

 Һәрчак таза булырсың.

Саф һавада озак йөрсәң

Чыныгырсың, ныгырсың.

 Төлке: 

           Йөгер, сикер, мәтәлчек ат,

           Иренмә син уенга.

           Бөгәрләнеп йоклап ятсаң

           Тоз утыра муенга.

 1 куян: 

 Бер дә сызламасын дисәң

 Һәр көн тешеңне чистарт.

 Йокың  тыныч булсын дисәң

 Аягыңны юып ят.

Бүре: 

          Иртән тәнне язар өчен

          Тиз-тиз зарядка ясыйм.

          Җәй булса да, кыш булса да

          Бармак суырып ятмыйм. (гер күтәреп сөйли)

          Спортны яратканга

          Чөеп йөртәм герләрне.

          Кыршау әйләндерәм һәр көн

           Шуңа нечкә билләрем. (Кыршау   әйләндерә.)

Хор  

            Бел син, Аю, бик файдалы

            Спортның һәрбер төре.

            Чирдән шулай саклана

            Җәнлекләрнең һәрбере.

            Менә безгә карап тор.

(Дәртле көй астында җәнлекләр төрле күнегүләр ясыйлар. Соңыннан аю да аларга кушыла)

              Җыр

1. Сәламәтлек аланына

    Дуслар, рәхим итегез.

    Яшелчә, җиләк-җимештән

    Әйдә авыз итегез.

2. Һәр көнне кишер ашасаң

    Кан йөреше яхшырыр

    Бананын да ашап куйсаң

    Тазалыкны арттырыр.

3. Сарымсак та бик файдалы-

    Исеңнән чыгарма син.

    Кәбестә хәтергә яхшы

    Файдасын онытмассың.

4. Чөгендернең бик файдалы

    Икәнен беләсездер.

    Сугандагы витаминның

    Күплеген сизәсездер.

5. Хәрәкәтне яратабыз

    Сәламәт булыр өчен.

    Иртәнге зарядка ясау

    Арттыра беләк көчен.

                                                Өстерәлеп кыз керә.

Кыз: (сумкасын тотып ата. Җәнлекләр куркышалар һәм чыгып китәләр.)  

          Ашыйсым килә, эчәсем килә. Мин бик арыдым. Иптәшләр дә күренми.

         Адаштым ахры. Әнием! (утыра ,елый)

Шүрәле чыга:

                     Курыкма син, өрекмә син,

                     Мин хәзер явыз түгел.                      

                     Өстерәлеп кенә йөрим,

                     Сәламәтлегем нык түгел.

Кыз: Шүрәле, дәваланырга иде сиңа урман җәнлекләре кебек.

Шүрәле: Соңга калдым шул. Яшь вакытта синең кебек ялкау булдым, әниемне тыңламадым. Гел тәм-томнар гына ашадым. Юынмадым, кызынмадым, зарядка ясамадым. Кешеләргә этлек кенә эшләп йөрдем. Хәзер лагерь балаларына карыйм да ... Терсәкне тешләп булмый шул...

Кыз: Алай бик бетерешмә әле. Синең турыда бер җыр башкарам, бәлки кәефең кү-тәрелеп китәр. (“Шүрәле” җырын башкара)

Шүрәле: Әйдә, мин дә бер яхшылык эшлим үзеңә, иптәшләрең янына илтим. (җитәкләп алып китә) -Бар, бүтән адашып йөрмә! Әнә,үзләре дә күренә. Мин алар-га күренмим инде. Хуш.

Кыз: Уф, алҗытты бу урман пәрие (утыра)

Эш кораллары тоткан балалар“Яшь туристлар җыры” көенә җырлап чыга-лар

1.   Хезмәт һәм ял лагерен

      Һәр ел көтеп алабыз.

      Бергә эшләп, күңел ачып

      Якыная арабыз.

                     Кушымта:

              Авыртуны  белмибез,

              Ялкаулыкны  сөймибез.

              Чисталыкны  яратабыз,

              Шапшакларны  сөймибез.

 2.  Иртә  белән  торабыз,

      Битебезне  юабыз,

      Сабын  белән  юынгачтын

      Бигрәк  матур  булабыз.

 3.   Аш  алдыннан  һәрвакыт

       Кулыбызны  юабыз.

         Чиста  итеп, пөхтә  булып,

         Ашарга утырабыз.

   4.   Иртән  зарядканы  да

         Бик  теләп  башкарабыз.

         Чыныгабыз, коенабыз,

          Кояшта  кызынабыз.

   5.   Көнгә  ике  тапкыр  без

         Тешләрне  чистартабыз.

         Җемелдәп, ялтырап  тора

         Таза, нык  тешләребез.

   6.   Кичен  аякларны  да

         Сабын  белән  юабыз.

         Юынырга  яратабыз,

         Без  бик  чиста  торабыз.      

1бала: Зилә, нишләп елап утырасың?

Кыз:  Дусларым, бик кызыктым әле мин сезгә. Минем дә сезнең кебек була-сым килә. Алыгыз мине үз яныгызга. Төзәлергә сүз бирәм. Ни кушсагыз шуны эшләрмен.

1бала: Кечкенәдән өйрән яшәү серенә,

             Яшәү сере-дусларыңның иңендә.

2бала: Ялкаулык бәхет китерми беркайчан,

             Истә тот шуны син һәркайчан.

Барысы  бергә:  Күрдегезме,  бу  тамаша

                              Гыйбрәтле  һәм  хикмәтле.

                              Саклагыз  сез,  кадерләгез

                              Изге  сәламәтлекне.

СОҢГЫ  КЫҢГЫРАУ

Укытучы: Хәерле көн, хөрмәтле кунаклар, әти - әниләр,  укытучылар  һәм башлангыч сыйныф  укучылары! Бүген  без  һәрберебез өчен иң  тантаналы, иң истәлекле  көннә-ребезнең  берсе – Соңгы кыңгырау  бәйрәменә  җыйналдык.  Бүгенге  кыңгырау  чыңы  укучыларым белән  хушлашу авазы булачак. Әле генә  нәни  кулларына  зур  чәчәк  бәйләме  тоткан  укучыларым  бүген минем белән  саубуллаша. Сизелми  дә  үткән  дүрт  ел  эчендә  алар  намуслы,  кешеләргә  карата  шәфкатьле,  мәрхәмәтле  булырга,  ныклы  белем  алуга аңлы  караш,  үз  көчләренә  ышаныч  уята  алдылар. Инде ,,Без  зур  үс-тек,  бишенчегә  үк  күчтек” – дип  сөенеп  әй-тә  алалар. Әйдәгез, сүзне  үзләренә  бирик.

 1.   Бүгенгедәй  күз  алдымда  тора

        Очар  коштай  йөргән  чакларым.

        Сумка  тотып,  белем  алырга  дип,

        Борма  сукмак  буйлап  атлавым.

  2.   Зәңгәр  күктә  кояш  елмайгандай

        Чакырдың  син,  мәктәп,  үзеңә.

        Һәм  беренче  сүздән,  хәрефтән  үк,

        Кереп  калдың  минем  күңелгә.

  3.   Күз  алдымда  минем  бүгенгедәй

        Бусагадан  үткән  эзләрем.

        Якты,  матур  залда  тезелешеп

       Яңгыраткан  тәүге  сүзләрем.

    Җыр: ,,Өйрәтәләр  мәктәпләрдә”.

    М. Пляцковский  сүзләре,   В. Шаинский  музыкасы.

  4.  Исемдә  алтын  сукмакка

       Тәүге  аяк  баскан  көнем.

        Һәм  тормышым  китабының

        Тәүге  битен  ачкан  көнем.

 5.   Апамның  сөйкемле  карашы

        Һәркемне  үзенә  каратты.

        Салмак  һәм  ягымлы  тавышы

        Борчыган  уйларны  таратты.

  6.  Яңа  көч,  яңа  дәрт  туплап  без

       Мәктәпкә  ашкынып  атладык.

       Күп  төрле  китаплар  актарып,

       Алда  ни  көткәнен  аңладык.

  7. Һәр  көнне  мәктәпкә  ашкындык

       Бик  күпне  беләсе  килгәнгә.

       Әлифба  китабын  бетердек

       Без  Яңа  елга  ук  кергәндә.

                     Җыр: ,,Әлифбам”.

                     З.Туфайлова  сүзләре,  Л.Хәйретдинова көе.

 8.   Кызыклы,  күңелле  дәресләр,

        Керттеләр  тылсымлы  дөньяга.

        Күп  төрле  чаралар,  кичәләр

        Илттеләр  чиксез  киң  дәрьяга.

 9.    Күпме  көч,  күпме  тир  түгелгән

         Безне  чын  кешеләр  итәргә.

        Югалып  калмыйча  сынаудан,

        Четрекле  тормышны  көтәргә.

10.   Укытучым,  эшең  җиңел  түгел,

        Мәшәкатьле  синең  язмышың.

        Сабырлыгың  җыеп  яшь  буынның

        Төзәтәсең  күпме  ялгышын.

11.   Уртаклашыр  өчен  кайгысын  да,

        Шатлыгын  да  вакыт  табасың.

        Салкыннарда  җылы  сүзең  белән

        Йөрәкләргә  учак  ягасың.

12.   Онытмабыз,  апа,  Сез  бит  безгә

        Әниебездәй  якын  булдыгыз.

        Кирәк  чакта  безгә  иң  беренче

        Ярдәм  кулын  Сез  бит  суздыгыз.

13.   Сездән  күргән  барлык  яхшылыкка

        Ничек  итеп  рәхмәт  әйтәсе.

        Сез  бит  безгә  бик  кадерле

        Килми  безнең  Сездән  китәсе.

                        Җыр: ,,Укытучыма”.

                       Н.Хашимова сүзләре,  Р.Курамшин көе.

14.  Укытучы.  Әни.  Бу  ике  сүз

       Күңелемдә  булыр  янәшә.

       Йөрәгемнән  чыккан  изге  хисләр

       Әни,  бүген  сиңа  эндәшә.

15.  Минем  өчен  җирдә  иң  кадерле

       Кешем  бит  син  минем  әнием.

       Белем  иленә  дә  зур  баскычтан

       Алып  мендең  бит  син  әнием.

16.  Рәхмәт, әни,  сиңа  барысы  өчен

       Сабырлыгың  белән  үрнәк  син.

       Минем  өчен  син  бит  газиз  кеше,

       Минем  өчен  син  бик  кирәксең.

                         Җыр: ,,Рәхмәт  сезгә”.

                        Ф.Яруллин  сүзләре,  В.Әхмәтшин  көе.

17.   Шарлар  оча,  карагызчы  күккә

        Һәрбер  шарда  хыял,  өметләр.

        Бөтерелеп  күккә  омтылалар

        Алар  бар  да  безнең  кебекләр.

18.   Шарлар  оча,  күктә  бигрәк  матур

        Аллы – гөлле чәчәк  төркеме.

        Киләчәктә  матур  эшләр  белән

        Куандырырбыз  без  һәркемне.

19.   Балачак  истәлекләре

        Күңелләрдә  мәңге  сакланыр.

        Мәктәптә  алган  белемнәр

        Изге  эшләр  белән  акланыр.

       Җыр: ,,Хуш,  балачагым”.

       З.Минһаҗева  сүзләре,  М.Минһаҗев  көе.

20.   Балачактан  аерып  безне

        Бүген  үзгә  чыңлый  кыңгырау.

        Шул тавышка  кушылсын  тик  бары

        Шат  тавышлар,  серле  яңгырау.

21.   Кыңгырауның  нигә  бүгенгесе

        Китмәс  һаман  минем  күңелдән.

        Нигә  бүген  шулай  моңсу  чыңлый

        Һәм  ул  чәчәкләргә  төренгән?

22.   Аның  шулай  яңгыравы

        Дәшә  безне  олы  юлга.

        Балачактан – үсмерчакка

        Алып  чыга  туры  юлга.

23.   Кыңгырауның  серле  яңгыравы

        Еллар  узгач  та  колакта  чыңлар.

        Апабызның  яхшы  киңәшләре

        Моңлы җыр булып йөрәктә чыңлар.

                      Җыр: ,,Кыңгыравым”.

                      Я.Абдрахманова  сүзләре,  И.Гыйлаҗетдинов  көе.

 Барысы  бергә:  

                Сау  булыгыз,  якын  дуслар,

                 Хәерле  юл  безгә  теләгез.

 Котлау  өчен  сүз  3 нче  сыйныф  уку-чыларына  бирелә.  Алар  4 нче  сыйныф  укучыларына  багышлап  чыгарылган  шигырьләр башкаралар:        

  1.   Уңган  кыз  ул,  булган  кыз  ул,

        Матур  кыз  ул – Гөлчәчәк.  

        Башкарылган  һәрбер  эше

        Нәкъ  менә  тере  чәчәк.

  2.   Күктә  генә  түгел  икән,

        Сәхнәдә  дә  бар  Йолдыз.

        Укуда  да,  хезмәттә  дә,

        Ул  яктыртучы  йолдыз.

  3.   Тапкыр  сүзле,  нурлы  йөзле,

        Бик эшчән бала Инсаф. 

        Ялганны ул һич яратмый,

         Күңеле аның һәрчак саф.

 4.      Нинди  эшкә  тотынса  да

          Ерып  чыга  Ралия.

          Бии,  җырлый,  рәсем  ясый,

          Ныклы  белемгә  ия.

       5.    Пөхтәлекне,  чисталыкны

               Рәмзил  бигрәк  ярата.

               Киң  күңелле  һәм  ярдәмчел

               Без  дә  аңа  карата.

         6.   Ике  бите  алма  кебек,

                 Күзе  зәңгәр  күк  йөзе.

                Бик  сөйкемле  һәм  ягымлы

                 Зилә  исемле  үзе.

           7.  Спорт  белән  шөгыльләнеп

                Илфар  үзен  таныта.

                Хәрәкәттә - бәрәкәт  дип,

                Ялкаулыкны  оныта.

           8.  Иң  сабыры  һәм  тыйнагы

                Мөгаен,  ул  Ләйсәндер.

                Тәртип  бозмый, һич  рәнҗетми

                Тәмле  телле  була  гел.

            9. Сезне  бик  тә  яраттык  без.

                Үрнәк  безгә  һәммәгез.

                 Ак  бәхетләр, зур  шатлыклар

                 Тели  сезгә  һәммәбез.

          10.   Бишенчегә  күчтек  диеп

Алай  бик  ирәймәгез!

Башлангычтан  киттек  диеп

Дуслык  җебен  өзмәгез!

           11. Төрле  җиргә  таралгач  та,

                Дусларны  сез  югалтмагыз!

                Сезгә  тырышып  белем  биргән

                Апагызны  онытмагыз!

            12. Гел  уңышлар  юлдаш  булсын!

Сынатмагыз  берегез  дә!

Бәхетле  һәм  һәрчак  көләч,

                  Якты  булсын  йөзегез  дә.  

                            Җыр: ,,Елмай”.

                            В.Хәйруллина  сүзләре,  З.Минһаҗева  көе.

Укучылар  үзләренең  ,,Иң  истәлекле  көнем” исеменә  язган  иншаларын укыйлар.

Сүз әти - әниләргә,  мәктәп дирекциясенә  бирелә.

 Укытучының  йомгаклау  сүзе: Кадерлеләрем  минем! Сезне  4 нче сыйныфны  уңышлы  тәмамлавыгыз белән  чын  күңелемнән  котлыйм.  Киләчәктә  дә гел яхшы билгеләренә  генә укып, үзегезне  һәр  җирдә  үрнәк  тотып,  чын  кешеләр  булып үсеп  җитүегезне  телим.  Һәм  сезгә  истәлек  бүләкләремне  тапшырам. 

,,Рәхмәтләрнең иң олысы сиңа булсын, укытучым!”

Катнашалар:     Сарык,   Кәҗә,  Шүрәле, Укучылар                                                

(Музыка яңгырый)

 Кәҗә: Нишләп җыелыштыгыз монда? Нишләп утырасыз? Быел яңа уку елы булмаячак. Бөтенләй булмаячак. Көтмәгез дә, кәҗә дустыгыз әйтте диярсез, сезгә башка китап-дәфтәрләр дә кирәкмәячәк, укытучылар да, директор абый да сезне башка борчымаячак. Мин моңа быел юл куя алмыйм.Карагыз әле миңа! Мондый идеммени мин былтыр? Күз төбемдә менә бу җыерчыгым юк иде, бит алмаларым тагын да матуррак булып алмаланып торалар иде. Яңа уку елы башлангач, димәк мин тагын бер елга картаерга тиешмен. Әнә шул сентябрь ае килеп җитә дә, туйганчы йоклап та, ял итеп тә, урман-кырларга да, су коенырга да, балык тотарга да йөреп булмый. Тагын шул китап-дәфтәрләргә күмелеп, авыр-авыр мәсьәләләр чишеп, тел әйләнмәслек инглиз телен укып, зур-зур әсәрләр укып, сочинениеләр язып утырасым килми әле. Беләсезме мин нишлим... мин... (арлы-бирле йөренә. Сарык керә)

Сарык:     Исәнме, мәктәп, исәнме!

                  Без сине сагынып беттек.

                  Сентябрь ае җиткәнен

                  Түземсезләнеп көттек.

Кәҗә: Син нәрсә, авызыңны күтәреп, “исәнме,мәктәп, сине сагынып беттек” дип сөйләнеп йөрисең?

Сарык: Нигә?

Кәҗә:Чөнки быел Яңа уку елы да, мәктәп тә булмаячак.

Сарык: Син нәрсә уйлап чыгардың, кәҗәкәй? Алай буламы инде ул?

Кәҗә:  Әйт әле син миңа, хөрмәтле Сарыккай, менә синең башыңны ватып, мәсьәлә чишеп, шигырь ятлап, телеңне вата-җимерә инглиз телен өйрәнеп утырасың, тагын бер елга картаясың киләме?

Сарык: Менә җүләр, кемнең картаясы килсен дә, кемнең мәсьәлә чишеп, укып утырасы килсен инде?

Кәҗә: Сине кем картайтканын, кем башыңны катырганын беләсеңме син? Укытучылар картайта безне!

Сарык: Укытучылар?!

Кәҗә: Әйе, үзләренең бертуктаусыз өйрәтүләре, тикшерүләре, сораулары белән безне картайталар, башыбызны әйләндерәләр. У-ух мин аларны!

Сарык: Ни сөйлисең син?

Кәҗә: Әйт әле миңа, син унга кадәр саный беләсеңме?

Сарык: Беләм инде.

Кәҗә: Хәрефләрне таныйсыңмы?

Сарык: Бераз таныйм.                                                                                            

Кәҗә:  Шулай булгач, акча саный белсәк, иҗекләп булса да укысак, безгә тагын ни кирәк? Яңа уку елы җиткән саен безгә бит тагын да катлаулырак фәннәр укыта башлыйлар. Ә ул безгә нигә?                                                                                                      

Сарык: Әйе шул тагын да катлаулы фәннәр керәчәк. Чыннан да алар безгә нигә кирәк соң?

Шүрәле: (керә, җырлый)  Мәктәпкә барам, мәктәпкә!-

                                              Кем анда бармый калган?

                                              Әти-әни дә яшь чакта

                                             Мәктәптә белем алган!

                                             Мәктәпкә барам, мәктәпкә!

Кәҗә: Шүрәле, җүләрләндеңме әллә? Мәктәпкә барам дип җырлап йөрисеңме? Җүләр булсаң барырсың, ә без менә Сарыккай белән бармыйбыз.

Шүрәле: Ничек инде бармыйсыз?

Сарык:  Менә шулай бармыйбыз, бетте китте.

Шүрәле: Сәбәбе нидә?                                                                                                                                          

Кәҗә:  Шүрәле, неужели син җәйнең рәхәт чакларыннан туйдың? Неужели синең тагын шул парта арасына кереп утырып, укытучыларның нидер сөйләгәннәрен тыңлап утырасың килә? Җитмәсә, бу уку елында безгә тагын әллә нинди авыр фәннәр керә башлаячак.

Шүрәле: Әлбәттә, без бит инде үсә барабыз.

Кәҗә:  Вот именно үсә барабыз. Ягъни, кирәкмәгән фән укып, картая барабыз дигән сүз бит ул.

Шүрәле:  Ни сөйлисең син?

Кәҗә:  Ач әле авызыңны. Менә синең бу ике тешең бар идеме?

Шүрәле:  Бар иде, бар.

Кәҗә:  Димәк, быел да мәктәпкә барсаң, андагы мәхшәр фәннәргә кереп чумсаң, күр дә тор: тешең генә түгел, менә бу мөгезең дә сынып төшәчәк!

Шүрәле:  Кит инде булмаганны сөйләмә. Әнием миңа әйтте: мәктәпкә кергәндә сөт тешләре төшеп, яңа тешләр чыга диде.

Кәҗә: (сарыкка) Ай алла, киренең киресе булып чыкты әле бу.

Сарык: Тыныч бул, Шүрәле. Кәҗәкәй шаярта гына ул.

Кәҗә:  Әйе, дустым, шаярттым гына мин. Бар, син бара тор, хәзер без дә барып җитәрбез.

                 (Шүрәле чыгып китә)

Сарык:  Аңгыра баш, башта бармыйбыз дидең, ә хәзер барып җитәрбез, имеш.

Кәҗә:  Синең бу башың өч тиен дә эшләми. Үзең күрдең ич, Шүрәлене берничек тә безнең як-ка аударып булмаганын. Әнә тегеннән балалар килә, шуңа күрә җибәрдем мин Шүрәлене.Ә ба-лаларны без мәктәпкә җибәрмәскә тиеш. Бар син качып тор, мин үзем сөйләшәм алар белән.

  (Сарык кача. Балалар керә.)

1 бала:

Бүген шундый матур көн,

Шатлык күккә җиткән көн.

Балалар бакчасыннан

Мәктәпләргә килгән көн.

2 бала:

Беренче сентябрь− минем

Бәхет-шатлыклы көнем.

Сагынып белем учагын

Мин бүген сиңа килдем.

3 бала:

Мәктәп юлы – хөрмәт юлы

Киләчәккә илтә.

Котлы булсын уку елын

Башлаган бу иртә!

4 бала:

Үзебез нәни булсак та,

Безне зур дип санагыз.

Әти-әни эшкә бара

Без мәктәпкә барабыз.

5 бала:

Исәнме, мәктәбем дип,

Баш иябез сиңа бүген без.

Хәтерләп кал,мәктәп,

Беренче кат бүген синең

Бусагаңнан атлап керәбез.

Җыр” Өйрәтәләр мәктәпләрдә”

Кәҗә:  Исәнмесез, дусларым!  Матур шигырьләр сөйли-сөйли, димәк сез мәктәпкә барасыз.

1 бала: Исәнме, кәҗә. Әйе, без мәктәпкә барабыз. 1 сентябрь бәйрәме җитте бит.

К: Сезнеңчә, мәктәпкә бару зур бәйрәм. Ә минемчә, рәхәтләнеп йоклау, кояшта кызыну, уй-нау, тәмле ашау – менә монысы бәйрәм ичмасам.

2 бала:Юк, кәҗә дус, һәрнәрсәнең үз вакыты була. Вакытында белем алырга да кирәк. Ә моның өчен мәктәпкә йөрергә кирәк.

К: Алайса безгә дә мәктәпкә барырга туры килә мени инде? Әйдә, Сарык дускай, бер булса, җыеныйк без дә мәктәпкә. Бәйрәм икән, булсын зур бәйрәм!

С: Әнә куяннар да мәктәпкә барабыз дип сөенешеп бииләр.

        (“Куяннар” биюе )

А.б. Хәерле көн, кадерле укучылар, хөрмәтле укытучылар, килгән кунаклар! Без сезне бу залда күрүебезгә бик шат. Бәйрәм  иртәсе кояшлы да, болытлы да, яңгырлы да була. Әмма аларның һәрберсе күңелдә кояшлы булып сакланып кала. Ничек шулай булмасын? Чәчәктәй киенеп, кулларына чәчәк бәйләмнәре тотып, һәр бала мәктәпкә ашыга. Менә без дә бүген бу матур залга Укытучылар бәйрәме хөрмәтенә җыелдык. Хәзер бәйрәм                                                                                              белән котлау өчен сүзне мәктәп директоры Нәбиев Ришат Зәки улына бирәбез.

                  (Директор сүзе.)

А.б. Мәктәп еллары – кеше гомеренең кабатланмас бер мизгеле.Ул беркайчан да онытылмый. Шуңа күрә баланың мәктәпкә килү көне – ул зур бәйрәм. Бу бәйрәмне укытучыдан  башка күз алдына да китереп булмый.

Телебездә изге сүзләр бар: Туган ил, Әни, Тынычлык, Кояш, Икмәк. Алар арасында Укытучы сүзе дә бар. Ничә яшьтә булсак та, ул сүз беркайчан да онытылмас. Укучылар күңелен яулый алырлык укытучы булу өчен бик күп көч, сабырлык һәм белем кирәк.

Укытучым! Гүзәл бәйрәмеңә

Телим шигырь бүләк итәргә.

Күңелемдәге олы рәхмәтемне

Изге теләгемне әйтергә, дип 1 нче сыйныф укучысы Әүхәдиева Зәлия сәхнәгә чыга.

А.б.  Укытучы һөнәре − безнең илдә иң хөрмәтле һәм мактаулы хезмәтләрнең берсе. Укытучыга меңнәрчә шигырьләр, җырлар, китаплар багышланган. А.Фадеев “Яшь гвардия” романы геройларының берсе Матвей Шульга сүзләре белән укытучы эшчәнлегенә мондый бәя бирә: “Укытучы! Сүзе дә нинди бит!..Укытучы! Әйтергә генә җиңел! Бездә, һәр бала мәктәптә укы-ган илдә, укытучы− беренче кеше ул. Балаларыбызның, халкыбызның киләчәге – укытучы кулында, аның алтын йөрәгендә. Аны урамда күргәч тә без илле адым килеп җиткәнче үк хөрмәт йөзеннән баш киемебезне салырга тиешбез!”

 Димәк, һәр кешенең үз кече Ватаны, тормышка юллама биргән үз мәктәбе, рәхмәт хисләре белән, олылап искә ала торган укытучысы бар.  

Киңәйтегез түгәрәкне

Мәйдан булсын киңрәк.

Мәйдан булса киңрәк,

Биергә күңеллерәк.

 Сәхнәдә  “Дубыр-дубая” биюе.

А.б. Әйе, бала мәктәптә матурлыкка омтыла, якты киләчәгенә кул сузып  бара. Алдында биек үрләр, шул үрләрне яулый алса гына ул бәхетле булачак. Аңа шушы үрләрне яулауда, белем алуда укытучы ярдәмгә килә.

Укытучы!

Синдәдер ул йөрәкләрнең иң олысы,

Синдәдер ул йөрәкләрнең иң җылысы,

Һәркөн сиңа ничә сабый карап тора,

Алар сине әниседәй якын күрә.

Нәфис сүз белән яраткан укытучысын котлый Әүхәдиев Ринат.

А.б. Укытучы! Һәр кеше бу сүзнең мәгънәсенә төшенә. Укытучы, бөтен көчен биреп, барлык яхшылыкларны укучыларның күңеленә сеңдерергә тырыша: җирне, тормышны аңларга, аны яратырга өйрәтә.

Җырлар тыңлыйк, җырлыйк, отыйк,

Җыр күңелне җылыта.

Әйдә җырлап яшик, дуслар,

Җыр дуслыкны ныгыта.

Җырлый Линара Галимҗанова. “Матур гөл генә. ”

  А.б.  Залда безнең остазларыбыз, хөрмәтле хезмәт ветераннары утыра. Аларны котлап, ,,ромашка” чәчәк аткан. Әйдәгез, аларның яшь вакытларын искә төшереп, сораулар биреп алыйк.              

 Сораулар:

1. Беренче ,,2”лене кемгә куйганыгызны хәтерлисезме?

          Абажурлы зәңгәр лампасыннан

Өстәленә якты сибелгән.

Дәфтәрләр дә инде тикшерелгән,

Планнар да күптән төзелгән.

Ә ул һаман йокламаган,

Төн йокысын нәрсә алган соң?

Сәхнәдә үзенең шигыре белән Әүхәдиева Эльвира.

2. Ни өчен укытучы һөнәрен сайладыгыз?

Орчыксыз  җеп эрли ул,

Әрле – бирле йөри ул.

Бик оста итеп бии

Күз тияр дип тә белми.

 Безнең Миләүшә Закирова. Ул хәзер  барлык укытучылар хөрмәтенә  ,,Курчак бию”ен бүләк итә.

3. ,,Тукып – тукып та кермәгән” баланы нишләтер идегез?

                     (Мәктәп тормышыннан мәзәк)

   Укытучы:

   -Балалар, ,,Кыз бала ял итә” дигән җөмлә языгыз да аның фигылен табыгыз.

   -Монда фигыль юк бит, апа, - ди бер укучы.

   -Нигә?

   -Фигыль ,,Нәрсә эшли?”дигән сорауга җавап бирә, ә кыз бала бернәрсә дә эшләми, ял итә...

4. Класстан куып чыгарган укучыларыгыз булдымы?
5. Беренче дәрес бирүегезне хәтерлисезме?

Биюләр бит дусларым,

Витамин кебек алар.

Күңелләрне үстерә,

Йөрәкләргә көч бирә.

Үзенең биюе белән Фатыкова Илзия.

      6.Үз фәнегезне яратасызмы? Их, менә теге фәнне укытырга иде дигән вакытларыгыз булдымы?

          Насибуллина Алисә,,Әни кебек”

      7. Мәктәп директорына нинди киңәшләрегез бар?

            Шатлыклардан шатлык туа,

Әверелә матур җырга.

Бары тик бер шатлык кирәк

            Җир төренсен өчен нурга.

Җырлый Гөлназ Әхмәдиева. ,,Барган идем”

      8. Мәктәптә булган берәр кызыклы хәлне искә төшерегез әле?

Ә без арымадык әле,

Бу көн безнең тантана.

Гармунчылар керегез,

Бию уйнап бирегез.

Укытучылар бәйрәмендә

Ут чыгарып биибез.

Сәхнәдә “Барбарики” биюе.

А.б.

Укытучыларыбыз!

Туган якның ал таңнары сезгә

Бүләк иткән күңеп аклыгын.

Юлдаш итеп сайлагансыз яшьтән

Челтерәп аккан чишмә сафлыгын.

Вөҗдан күзе белән карыйсыз сез

Тормыштагы һәрбер мизгелгә.

Күпме изге гамәл энҗе булып

Гомер юлыгызга сибелә.

Рух ныклыгына таянасыз,

Нәкъ меңьяшәр имән төсле сез.

Чор сулышын ачык тоемлаучы

Зыялы һәм затлы кеше сез.

Сезгә карап сокланабыз һәрчак

Күңелләрдә туа горурлык.

Рәхмәт сезгә, әле ярый сез бар

Безгә үрнәк булып торырлык.

      Без барлык укытучыларга да,урталай киселгән открыткалар өләшкән идек,шуларны парлап барыгызны да биергә чакырабыз.

Тыпыр – тыпыр тыпырдатып.

Бергә каты басыйк без.

Уйнап – көлеп, җырлап – биеп,

Күмәк күңел ачыйк без.

                                          (күмәк бию)

    Шушының белән бүгенге кичәбез тәмам. Укытучыларга авыр һәм мактаулы эшләрендә уңышлар, гаилә бәхете, сәламәтлек, әлбәттә инде, тырыш, акыллы укучылар телибез!

Хәерле юл сезгә, хәерле юл,

Зур уңышлар шушы юлларда!

Онытмагыз:

Илнең генә түгел, хәтта Җирнең

Киләчәге сезнең кулларда!

11 НЧЕ СЫЙНЫФЛАРНЫ ОЛЫ ЮЛГА ОЗАТУ

 (1нче сыйныфлар чыгышы)

1.Менә  монда  мәктәп  бусагасы

Юл  башы  бу  алгы  көннәргә.

Безгә  әле  шунда  тукталырга

Сезгә  инде  ерак  китәргә.

2.Канат  ярган  нәни  кошлар  сыман

Талпынасыз  очып  китәргә.

Яшьтән  күңелегезне  җилкендергән

Хыялларны  чынлык  итәргә.

3.Чыгып  китәрсез  сез  алга  карап

Киң  дә  булыр  юллар, озын  да.

Адым  саен  чатлар  булыр  анда

Чатлар  саен  булыр  борылма.

4.Шул  юлларда  абынып  егылсагыз

Башыгызны  түбән  имәгез.

Егылып  калган  җирдән  горур  гына

Сез  торып  та  китә  белегез.

5.Аклык,  пакълек  сезне  сарган,

Юллар  чакырып  кулын  сузган.

Сез  чыгасы  олы  юлдан

Инде  күпме  меңнәр  узган?!

6.Аерыласыз  сөйгән  мәктәп  белән

Гомерегезнең  алсу  таңында.

Хәерле  юл  теләп  озатабыз

Саф  чәчәктәй  тормыш  язына.

7.Алда  сезне  күпме  юллар  көтә

Бәхетләргә  һәрчак  юл  урау.

Шул  турыда  искә  төшергәндәй

Яңгырар  ул  соңгы  кыңгырау.

8.Бүгенгесе  соңгы  кыңгырауның

 Саубуллашу  көнен  белдерә.

 Бүгенгесе  сезнең  күңелләрдә

 Мәңге  калачагын  сиздерә.

9.Шатлыклары – йөзләрендә,

Моң  бар  ләкин  күзләрендә.

Саубуллашу  җиңел  түгел,

Сизә  аны  үзләре  дә.

10.Гел  уңышлар  юлдаш  булсын!

 Сынатмагыз  берегез  дә!

 Бәхетле  һәм  һәрчак  көләч,

 Якты  булсын  йөзегез  дә.  

  11.Ялгышмагыз,  адашмагыз,

  Танымыйча  вак  җаннарны.

  Чайпалдырмый  шатлыкларны

  Каршылагыз  ал  таңнарны.

  12.Эшләрегез  һәрчак  уңай  булсын

  Изге  хисләр  безнең  йөрәктә.

  Хәерле  юл  абый – апалар

  Калабыз  без  шушы  теләктә.

  13.Хәерле  юл  сезгә,  хәерле  юл!

  Максатларга  барып  җитегез.

  Ашкынганда  гомер  юлларыннан

  Язмышны  да  узып  китегез.

 14.Уңышлы  юл  бирсен  Ходай  сезгә

  Бәхет  диңгезендә  йөзегез.

  Муллык, шатлык, сәламәтлек  белән

  Тулы  булсын  һәрбер  көнегез.

Җыр:

1.Чәчәк  тотып  кулыгызга

Һәр  ел  килә  идегез.

Инде  бүген  сез  мәктәпкә

Сау  булыгыз  диясез.

2. Соңгы  тапкыр  чыңлый  бүген

Сезгә  моңлы  кыңгырау.

Тормыш  дигән  олы  юлга

Озата  бу  кыңгырау.

3. Хәерле  юл  телибез  без

 Сезгә  абый – апалар.

Авырлыклардан  курыкмый

Каршылагыз  ал  таңнар.

4. Моңаймагыз  беркайчан  да

Елмаешып  яшәгез.

Үзегез  эзләп  тапкан  бәхет

Диңгезендә  йөзегез.

Вариант №2      Соңгы кыңгырау

(балалар аз булса)

1. Аерыласыз  сөйгән  мәктәп  белән

Гомерегезнең  алсу  таңында.

Хәерле  юл  теләп  озатабыз

Саф  чәчәктәй  тормыш  язына.

2. Алда  сезне  күпме  юллар  көтә

Бәхетләргә  һәрчак  юл  урау.

Шул  турыда  искә  төшергәндәй

Яңгырар  ул  соңгы  кыңгырау.

3. Бүгенгесе  соңгы  кыңгырауның

Саубуллашу  көнен  белдерә.

 Бүгенгесе  сезнең  күңелләрдә

 Мәңге  калачагын  сиздерә.

4. Гел  уңышлар  юлдаш  булсын!

 Сынатмагыз  берегез  дә!

 Бәхетле  һәм  һәрчак  көләч,

 Якты  булсын  йөзегез  дә.  

5. Алга таба да тырышып

Югары белем алыгыз.

Профессор, академик.

Фән докторы булыгыз.

6. Бүген сезгә истәлеккә

Бирәбез без бүләкләр.

Тик алар гади түгелләр,

Бар җирдә дә кирәкләр.

7. Зур юллар үткәндә,

Бик арып ял иткәндә.

Мәктәп суын эчегез,

Артып китәр көчегез.    

 (Сулы савыт бирә).

8. Монысы шар, кабартылган,

Сезгә махсус алынган.

Кирәк булыр, чөнки һава

Мәктәптән тутыртылган.    

 (Шарлар бүләк итәләр)

  9. Эшләрегез  һәрчак  уңай  булсын

  Изге  хисләр  безнең  йөрәктә.

  Хәерле  юл  абый – апалар

  Калабыз  без  шушы  теләктә.