Мероприятие "Сембодонге мазыняй"
план-конспект
Предварительный просмотр:
Сембодонга мазыняй!
- Шумбратада! (все хором)
Тядянь – авань шиське сай
Кяжи тялось тумс срхкась,
Ваймонц таргазе тундась.
Вармась лямбоста уфай,
Тядянь – авань шиське сай.
Кельме тялось курок сай
Вармась кельмоста уфай,
Мазы сёксесь тумс срхкась
Тядянь – авань шиське сась. (все хором)
Кулхцонт, тядяй, мезе азан,
Ульхть фалу шумбра и мазы.
Шкайнять пилец кулеза,
Яла тяфта улеза.
Тоньге, щавай аф юкстате,
Эрька, авань шиста шнате.
Эряк лама, лама киза,
И мзярдовок тят сизе.
Тядя
Шись кувака, таргави прокс киза,
А сон шары кудса мянь илядьс.
И аф сизи, вестенге аф сизи
Эрь шинь тевса тядянь лямбе кядсь.
Кизось кизоть мельге савор шашты,
Шуди пингсь, прокс веденза тундать.
Тядя, тядя! Шяярьхнень сон акшептсь,
Эрь, аф ламняс ваймак, тевцень катк!
А сон варжай ару-ару ванфса-
Эрек толнясь сельмосонза кштий.
Кда тядясь лямбоняста ваны,
Аф синдьсамазь кодамовок вий.
Тядянь кятть
Ня кяттне каннемазь нуласа
И повфнезь кельгома нюрямть,
Да куцю нярьса кайсезь ямть,-
Синь тяфта лезнесть тейне касомс.
Синь вачксесть стенат, керсесть вирьхтьке
И маштыхть панема од кшинь.
Ня кяттне золотада питнихть,-
Миндейнек максыхть эряф, ёнь!
Синь ёмланятнень ломанькс лихтихть,-
Ня кяттне, кельгома тядяй, тонь! (все хором)
Тясть юксне тядять
Кие лезды, мзярда стака,
Мзярда поват тон зиянц? Тядясь.
Сон аф ётай вакска,
Сон лихттянза виде янц.
Анок ваймонц инксот максомс,
Арьси колгат шить и веть:
Пара ломатть улест вакссот,
Паваз эряфсь кандоль тейть.
Тяк, тяк юксне тядять вестьке,
Эждьсы потмонц лямбе валсь,
Сяда вии ули эста
Тоньге кисот тядянь валдсь!
Лямбе вал
«Тядя» валсь пяк лямбе,
Эжни эсон най.
Эрь шиня кяльбрястон
Тёждяста лийкстай.
Тядязень пяк кельгса,
Сяс и лезняй най.
Кенярдян, мзярда
Маланязон сай.
Кандан панчфт лугаста,
Паласа трвас.
Сон пшкяди тейне:
«Оцюняста каст!»
Мархтот эрязь, тядяй,
Павазу эрь шись,
Аньцек афоль малада
Тееть сирешись.
Вестевок тят прафта
Ризфу сельмоветть.
Инксот пичефкс марян,
Тядяй, шить и веть.
Катк фалу тонь вельхкссот
Ули мани шись.
Катк най терди эсот
Шачем куду кись.
Тейть пшкядян, тядяй,
Вайгялезень кульхть:
«Шкайсь катк эсот ваны,
Павазуне ульхть!»
Тядязти
Тядяй, тядяй, кельгте пяк,
Эрька, кяднязень кундак.
Касан вакссот шинять ала,
Кеняртьфнят тон эсон яла.
Коса шачень, коса касонь,
Содань лямбонц стака тевть.
Сяда меле сембе вастса,
Тядяй, эряскодан тейть.
Пуромкшнихть и сраткшнихть китне,
Сотозь сембе масторлангть.
Аньцек сембодонга питни
Куд мргати вяти янць.
Песня: «Сембодонга мазыняй»
Тядянезе, панчфкязе,
Сельмаванянь панчсизе.
Ляпе вастонь ацайняй,
Валда ононь пацяняй.
Припев: Тядяй, тядяй – аваняй,
Маланязон сак.
Моронязень ладяйне
Лемозот исяк.
Ладяйне и мораса,
Мяльнецень аф коласа.
Тядянезе, шнайнязе,
Лямбоняста щайнязе,
Симдиняй и андыняй,
Тячиняй и вандыняй.
Припев:
Тядянезе, фкянязе,
Золотань кяднязе.
Види валонь азыняй,
Сембодонга мазыняй.
Бабазе
Бабазе ни сиреня,
Бабазень мон кельгса:
Фалу кштирди сюреня,
Фалу тевонц вельхксса.
Васце кштирди сюреня,
Сяльде ашкоды крня,
Меле сяконь содай -
Варяганят кодай.
А мон каршезонза аран
Или озан серцек.
Якайхть кяднянза сонь парста,
Спицанятне мельцек:
Килькш - килькшкя,
Килькш - килькшкя,-
Варяга и нинге фкя.
Кеворкшни крнясь кияксса,
Кяши уженяти.
- Ащек бабанязень ваксса,-
Корхтан мон крняти.
Лездан бабазенди най.
Кодамс - тевонц тиемс:
Спицанц максса, кда прай,
Ведня кандан симомс.
А сяс колган корхтайхть стане:
Шачфкя - бабанц лаца Таня!
Кельгса бабазень
Сярятькстсь бабазе, урмаясь:
Уле сельмонза лоткс ваясть.
И трванза марнек оласть,
Пиче ронгоц солазь солась.
Мяляфтса, сон эсон ваннесь.
Мяштенц ёженяса каннесь,
Куцюняса эсон аннесь,
Сязентьф панарнязень паннесь.
Тячи монга паронц пандса –
Сире ломанть мяленц ванца:
Ляпе вастоня мон ацан.
Мярьги – вакссонзовок ащан.
Лофца ямняда сонь андса,
Малазонза чайнянц кандса,
Катк сон курокста пчкяй,
Кровать лангста бабась стяй.
Бабазти
Эрька, бабай, тага ваксозт шаштан,
Ашкотте и пильгозт сюконян.
Лацот ляпста басяма аф маштан,
А тонь лямбе валхнень най кулян.
Мон ни, бабай, касонь идень щамста,
И аф порят тяни тейне порькс.
Эряфсь – ёфси пеезь лямбе ямса,
Кие кенерсь, сянди сон и повсь.
Касфтоть лама идь и лама унок,
Ётксост тонцьке одста марят пря.
Хоть и шамазт срмонят ни пуромсть,
Руця алот шяярце сия.
Щавазти
Щавай, фкявок ломань аяш лацот,
Сяда пара вайме ашень му.
Кулхцондсамак. Эрямс – ащемс лездат.
Кудстот вестьке мон афолень ту!
Эждят валса, эждят ару ванфса,
Эздот манить лаца манись сай,
И тя тёждя, лямбе – лямбе арусь
Вестенге ки лангстон аф юмай.
Келькте, щавай, сембонь коряс парат!
Келькте, кода кельгса мани шить,
Тон штатолнякс кизень лангса палат,
Валдсот валат эряфонь од кить.
Песня: «Шумбрат, школа»
Тячи лама эрек ванфта,
Нинге сяда лама панчфта,
Пусма канды эрь иднясь,
Таньфта пяшкодсь ушенясь.
Припев: Школав вятсамазь кинясь,
Сёксень Васенце шинясь,
Шумбрат, школа, шумбрат, школа,
Шумбрат? Васенце шинясь!
Маштомс ёратама лама,
Тевонь содайнякс ульхтяма,
Семботь ладясаськ, тисаськ,
Аньцек кастама, учсаськ.
Ёжу Петя (сценка)
Куду тядясь кандсь конфетат,
Путозень синь шра лангс.
Эсток кошардозе Петянь:
- Явить, цёраняй, дуганкс.
- Кода мярьготь, тядяй, явомс?-
Ашезь шарьхкоде иднясь.
- Явить стане, штоба сяволь
Сяда ламоня лиясь.
Петя арьсезевсь и савор
Лена аканц малас шаштсь:
Тон конфетатнень эрь явить,
Монцен асувозе аш.
Асу – ёнь вий, маштомши, эрьга.
Тнярс мокшень семьяса оцю сестрась ёмла брадонц лемнезе дуганкс. А ёмла браткясь оцю
сестранцты мярьгондель акай.
Келазсь и мацихне (ёфкс)
Сась весть келазсь ляйть малас, а тоса мацихть.
- Кодама куят мацихне, - арьсесь келазсь.
- Мон синь сембонь сивсайне.
А мацихне:
- Тон, келазь, добраят. Тямасть сиве, кадомасть, ужяльдемасть.
- Сифтядязь, - мярьгсь келазсь.
- Ну, эста ащек, сивомда инголе моратама. Аделасаськ мороньконь, эста ина сивсамасть.
- И мацихне ушедсть морама:
- Га-га-га! Га-га-га!
Тяфта целай ши морсесть, а келазсь ученды, мзярда моросна аделави. И тусть лиезь.
Келазсь стась врьгазти ор (ёфкс)
Моли врьгазсь вирьге. Няйсы, шякшатась карасы шуфтть, корхтай тейнза:
- Тон, шякшата, карат и карат, покодят, а куд эстейть аф тиеви.
Шакшатась корхтай:
- А тон, врьгаз, най учат салсят, а якат орфтома.
Арьсезевсь врьгазсь. Афкукс, шякшатась видеть корхтай. Мольсь келазти.
- Келазсь, стак тейне ор. Мон тейть учанят кандан.
Согласиндась келазсь.
Врьгазсь канни келазт учат: фкя, кафта, колма.., а ор аш. Келазсь сивольть сивсы, понатнень базарса мисыне. Врьгазсь весть кизефнесы:
- Мзярда, келазь, орсь ули анок?
Келазсь корхтай:
- Тячи иляденди орцень щасак, аньцек эряви ожатне стамс. Архт ломаттнень переснон фталу, тоса няят алаша. Сонь пулостонза сязят шяярьхть, синь пяк ладяйхть сюре вастс.
Мольсь вргазсь, няезе алашать. Маладсь тейнза фталда, аньцек ёрась пулостонза шяярьхть таргамс, алашась кодак польдятьсы коняти пильгса. И шавозе.
Песня: «Кизонь пиземсь»
Кизонь пиземсь, лямбе пиземсь
Эше ваймепожфса сай.
Пульса почетф нару кизень
Азоравакс нардай – штай.
Припев: Пиземнясь, пиземнясь,
Кизонь лямбе пиземнясь
Кизонь пиземсь, лямбе пиземсь
Кизонь лямбе пиземнясь.
Ару ванфса ваныхть панчфне,
Лангсост расанясь люкай,
Ну, а таньфсна, ну, а таньфсна
Седи потмаксс мянь сувай.
- - Тядя!..Мзяра тя валса лямбода, мзяра кенярдемада!
- - Тядянь лямбонясь эжнесы ломанть мянь сиредемозонза.
- - Тядясь – масторлангса инь мала ломанць.
- - Тядять кельгомац лихтибрять лаца аф коськи мзярдовок.
- - Тядяце тонь тонафтонзе корхтама, якама.
- - Тядяце тейть морафтозе васенце книгать.
- - Тядяцень вайгялец, лямбе сельмованфоц мзярдовок аф юкставихть
- - Тядясь макссь тейть эряф, ёнь.
- – Тядянь седись шида лац эжди.
- - Тят тиенде теенза ризф, сярятьф!
- Минь арсетяма теенть оцю паваз, васу моли тев. Уледа шумбрат! (все хором)