Мои стихи. Балыҡсы ирем минең
материал на тему

Балыҡсы ирем минең

 Зилдә Мәүлитова

Еңел түгел балыҡсыға

Балыҡ тотоу хеҙмәте.

Ҡорамалдар шәп булһа ла,

Бар уның мәшәҡәте.

Балыҡсылыҡ шөғөлөн ирем

Атаһынан өйрәнгән.

Балыҡсы менән йәшәргә

Миңә лә күнегелгән.

Ҡояш менән бергә тора –

Һеңгән ул ғәҙәтенә.

Сәй эсә лә ашыға

Йылғаға - үҙ эшенә.

Тыумыштан ғашиҡ йылғаға -

Ысын балыҡсы хатта.

Балыҡ тиһәң, ашау-эсеүен,

Йоҡоһон да онота.

Балыҡты тота бит әле

Эш араһында ғына.

Балыҡтан килә һалып,

Ултыра тракторына.

Ямғыр яуһа – ҡыуаныс,

Эштәре туҡтап тора.

Йә икмәккә, йә ҡамырға

Балыҡтарын ҡаптыра.

Ҡышын булһа палаткала

Мәке уйып ултыра.

Көнө буйы бер тишектән

Күпме балыҡ сығара.

Балыҡ тотҡан урынды, ти

Емләп алырға кәрәк.

Бәләкәсе тиҙ эләгә,

Ҙурҙары етеҙерәк.

Сабаҡ, ҡыҙылгүҙ, алабуға

Балығы ҡаба яйлап.

Сәләмәт йәшәү сараһы –

Балыҡ тотоу ҡармаҡлап.

Балыҡтар ҡайҙа йәшәй,

Нимә менән туҡлана.

Ҡылыҡ - фиғелен ул белә,

Шуның менән маҡтана.

Балыҡты үҙе ашамаһа ла,

Алып ҡайта күп итеп.

Тотоу процесы мөһим, ти,

Тәбиғәттә ял итеп.

Сабыр булыуы аптырата

Минең балыҡсы ирҙең.

Берәү ҙә эләкмәгән мәлдә лә,

Күреп  үҙ күңел түрен.

Ҡыҫҡаһы, балыҡ тотоуға

Етди әҙерлек кәрәк.

Шөғөлөңдө өнәп еткән

Уңған ҡатының кәрәк.

Тәмле еҫтәр сығарып

Балығыңды быҡтырһын.

Балыҡтан кәтлит яһап

Кеше эсен ҡыҙҙырһын.

Оҫта балыҡсыға көнләшә

Ҡармаҡ тота белмәгән.

Даланлыға уңыш юлдаш -

Ғүмерен шуға бәйләгән.

Балыҡ тотҡан туҡ булыр -  

Улымда  ла  был кәсеп.

Быуындан-быуынға һаман

Киләлер инде күсеп.

05.01.2017 йыл