Музейда бүлекләр эшчәнлеге. ТАТАР ӨЕ КҮРЕНЕШЕ
статья по теме

Милләтнең, халыкның гасырлар буе сакланып килгән яшәү рәвеше, көнкүреше, гореф-гадәтләре белән без әлеге бүлектә бик яхшы таныша алабыз. Халыкның рухи, мәдәни хәзинәләренә таянып үзебезнең милләтебезгә карата ихтирам, горурлык, сөю хисләре тәрбияли алабыз. Халыкның үткәне, тарихы белән кызыксыну безне тагын да күбрәк мәгълүмат эзләргә, тирә-юньне күзәтергә, гамәли һәм әдәби чыганаклар, интернет ресурслар белән эшләргә этәрә. Шуңа күрә дә без һәрвакыт хәрәкәттә.

Татар хатын-кызлары ситсыдан яки сатиннан тегелгән бала итәкле күлмәк, аның өстеннән чигүле алъяпкыч яки камзул кигән. Башларына ак яулык бәйләгән яки калфак кигән. Ә ир-атлар озын күлмәк өстеннән камзул яки бишмәт, чапан, башларына түбәтәй кигәннәр. Аякларында - читек-кәвешләр булган.

Һәр халык үзенең гореф-гадәтләре белән бай. Татар өенең интерьеры һәм борынгы заманда файдаланылган эш кораллары, халыкның көнкүреш әйберләре белән дә без әлеге бүлектә таныша алабыз.

Сезнең каршыгызда кул тегермәне. Аның белән бөртекләрне он хәленә китергәнче тартканнар, ягъни тегермәннең ташын кул белән әйләндерү нәтиҗәсендә бөртек вакланган һәм оны иләк аша аска коелып барган.

Шулай ук кулдан ясалган пычаклар, пычкылар, кашыклар да безнең мәктәп музеенда зур байлык булып саклана.