Бармаҡ уйындары
материал

Бармаҡ уйындары 

Бутыр-бутыр бутҡа бешә, 
Ҡарға бутҡа бешерә. 
Баш бармаҡ әйтә: 
-Әйҙә бутҡа бешерәйек. 
Имән бармаҡ әйтә: 
-Утын ҡайҙан алайыҡ? 
Урта бармаҡ әйтә: 
-Күршенән алып торайыҡ. 
Сығанаҡ бармаҡ әйтә: 
-Бурысты нисек түләрбеҙ? 
Сәтәкәй бармаҡ әйтә: 
-Ашайыҡ та ҡасайыҡ.

Атһыҙ бармаҡ атта саба, 
Сәтәкәй бармаҡ сәй эсә.

Баш бармаҡ, 
Имән бармаҡ, 
Урта бармаҡ, 
Ибей- себей, 
Бәләкәй бәпәй.

Һанашмаҡтар

Ҡыш китте, яҙ килде,
Өйрәк менән ҡаҙ килде,
Тау баштары асылды,
Аҡ таштары сәселде,
Һайрайҙар турғайҙар,
Шылдырай һуҡа-һабандар,
Моңая сыйырсыҡ,
Һин тор , һин сыҡ.

"Йәшерәм яулығымды". Балалар түңәрәк яһап ултыралар. Берәү яулыҡ йәшереүсе итеп һайлана. ("Гөргөлдәк" йә шуның кеүек уйындарға һанап һайланған кеүек). Күмәкләп йырлайҙар,яулыҡ йәшереүсе йыр барышында түңәрәкте тыш яҡтан әйләнеп йөрөй ҙә һиҙҙермәй генә берәүҙең артына яулыҡты һалып китә. Йыр туҡтағас, яулыҡ кем артында икәнен белергә тейештәр. Әгәр дөрөҫ әйтһәләр,артында яулыҡ ятҡан бала яулыҡ йәшереүсене түңәрәк буйлап баҫтырып тоторға тейеш. Ҡасып барыусы баҫтырыусының урынын алырға өлгөрөргә тейеш. Өлгөрмәһә,тотолһа,яңынан ҡала,фант бирә. Өлгөрһә, баҫтырыусы яулыҡ йәшереүсе була. Уйын шулай дауам итә,һуңынан фант уйнатыла. Түңәрәктә ултырыусылар; "Йәшерәм,йәшерәм яулығымды йәшел ҡайын артына,һиҙҙермәйсә ташлап китәм бер иптәшем артына ,"-тип йырлайҙар.