Заманча укыту-методик әсбаплар /УМК/ - әти-әниләр җыелышында чыгыш.
статья по развитию речи на тему

    Заманча укыту – методик  әсбаплар /УМК/

                     /әти-әниләр җыелышында чыгыш/

Саба №2 “Әллүки

балалар бакчасының

1 кв. категорияле

тәрбиячесе Шакирова

Эльвира Альфред кызы

Балалар бакчалары балаларны туган телендә дөрес, матур итеп сөйләшергә өйрәтү, аларның сөйләм телен үстерү өчен заман таләпләренә җавап бирерлек итеп төзелгән эзлекле, максатчан методик әсбаплар белән тәэмин ителде.

 Туган телендә дөрес сөйләшергә өйрәтү өчен, балаларны кызыксындыра алырлык аралашу даирәсе булдыру, сюжетлы уеннар оештыру,гомүмән, баланың актив сөйләмен үстерү зарур.

 Балалар белән эшчәнлектә заманча методик алымнар һәм чаралар куллану, татарча мультфильмнарны, электрон ярдәмлекләрне, аудио- һәм видеоматериалларны урынлы файдалану аеруча мөһим.

УМК “Туган телдә сөйләшәбез”  - 2 яшьтән 4 яшькә  һәм 5 яшьтән 7 яшькә кадәрге татар балаларын ана теленә өйрәтү өчен төзелгән комплектлар. Әлеге комплектларның төп максаты – балаларның ана телендә дөрес һәм эзлекле сөйләмен формалаштыру. Баланың кече яшьтән үк сөйләмен үстерү, аның аралашу, танып белү, әхлакый һәм рухи юнәлешләренең нигезен билгели.

 Балаларда тел системасының фонетик, лексик, грамматик структур дәрәҗәләрен формалаштыру; бәйләнешле сөйләм үстерү, тел һәм сөйләм күренешләрен аңлау (тоемлау) сәләте формалаштыру – “Туган телдә сөйләшәбез” өйрәтү – методик комплектының төп үзенчәлеге. 

 Туган телгә өйрәтүне һәм сөйләмне үстерүне танып белү, коммуникатив алымнар, матур әдәбият белән таныштыру аша гамәлгә ашырабыз. Бу юнәлештәге эшчәнлектә мультимедиа чаралары, ”бармак” уеннары, “җанлы” сүрәтләр, борып хәрәкәткә китерелә һәм “сөйләшә”  торган уенчыклар, мультфильмнар, сөйләм-хәрәкәтләнү күнегүләре, аваз ияртемнәре кергән уеннар, халык авыз иҗаты әсәрләре, сәхнәләштерү уеннары, иллюстрацияләр кулланабыз.

 Белем һәм тәрбия бирүдә файдалы һәм нәтиҗәле булырлык мульфильмнар коллекциясенең дә роле зур. Моның өчен:

• заман таләпләренә җавап бирерлек татарча мультфильмнар;
• булган мультфильмнарның татарчага тәрҗемә ителгәннәре;
• татар язучыларының баланың яшь үзенчәлегенә туры килгән әсәрләреннән мавыктыргыч мультфильмнар бар.

 Бүгенге көндә татар телендә укыту-методик әсбаплар, методик һәм күрсәтмә материаллар, балаларның танып белү һәм фикерләү сәләтен үстерергә ярдәм итәрлек заманча уеннар, эш дәфтәрләре бар һәм  аларны кулланып эшчәнлек уңышлы гына дәвам итә.

 Татарстан Республикасының белем бирү системасына куйган төп бурычы – иҗади фикерләүче, инициативалы, иҗтимагый тормышка актив катнашучы, белемле, ике дәүләт һәм чит  телләрдә дә иркен сөйләшеп аралашучы шәһес тәрбияләү.

 Бу укыту – методик комплектлар шушы бурычларны үтәргә ярдәм итәр дип ышанып калабыз.