Уйынсыҡ ниндәй талаптарға яуап бирергә тейеш?
консультация

Уйынсыҡ ниндәй талаптарға яуап бирергә тейеш?

Медицина  һәм экологик талаптар

    Уйынсыҡтың нимәнән яһалыуына, зарарлы матдәләр һәм ағыулы буяуҙар  менән ҡулланмауына иғтибар итегеҙ. Сөнки бәләкәстәр, ғәҙәттә, уйынсыҡты ауыҙына ҡабырға, ҙурыраҡ балалар, мәҫәлән, ҡыҙҙар, ҡурсаҡтарын үбергә, йоҡлағанда үҙҙәре менән алып ятырға ярата.

Педагогик талаптар

       Машина, самолет, өй кеүек нәмәләр ҡора торған, тегеләй – былай бороп, төрлө һындар  эшләп булған  уйынсыҡтар  бәләкәстәрҙе күңелләндерә, уйларға өйрәтә. Пирамида сыҙамлылыҡты һәм хәрәкәт координацияһын камиллаштыра, туп – Физик яҡтан нығыта.

Психологик һәм әхлаки талаптар

      Яңы уйынсыҡ балала төрлө тойғо уята: нескәлек, агрессивлыҡ, кемделер хәстәрләү йәки ҡулындағы уйынсыҡ пистолеттан атыу… Ғөмүмән, бер нисә бала бергә уйнай алырлыҡ уйынсыҡтар күпкә файҙалыраҡ. Миҫалға спорт уйындарын йәки конструкторҙарҙы алырға мөмкин. Бындай  уйындар балаларҙы бер –береһе менән хеҙмәттәшлек итергә өйрәтә.

Эстетик талаптар

     Оло кешенең уйынсыҡ формаһындағы бүләге балала яҡшы сифаттарҙың формалашыуна булышлыҡ итә.  Шуға, күңел йылыһын һалып, үҙ ҡулығыҙ менән  эшләгән, теккән уйынсыҡ, һатып алынғанына ҡарағанда ҡәҙерлерәк булыр.

Уйынсыҡ һайлауҙың ҡағиҙәләре:

• Уйынсыҡтар бик күп булырға тейеш түгел. Ике йәшкә тиклемге балаға бер юлы өс- биш уйнсыҡты бирергә ярамай. Сөнки тәтәйҙәрҙең күплеге баланың иғтибарын тарҡата, концентрацияһының үҫешенә,әйберҙәрҙе ентекле өйрәнеүенә ҡамасаулай. Артыҡ уйынсыҡтарҙы йәшереп торорға кәңәш ителә. Бер айҙан бала уларҙы яңы итеп ҡабул итер.
• Уйынсыҡтар бер –береһен  тулыландырырға тейеш, улар тағы ла ҡатмарлыраҡ                      сюжетлы уйындарға ҡыҙыҡһыныу уята. Әгәр малайығыҙҙың ҙур йөк машинаһы бар икән, тейәп  йөрөтөргә кубиктар, шофер урынына ултыртырлыҡ ҡурсаҡ йә йәнлек, шулай уҡ гараж яһарлыҡ ҡап та булһын.
• Бәләкәй балаларға тәғәйенләнгән уйынсыҡтар ысын предметтарға оҡшаһын. Йәғни ҡурсаҡтарҙы кейендереп, сисендереп булһын, машина йөрөһөн, краны күтәрелһен, ишектәре асылып – ябылһын, һүтелеп – йыйылһын. Уйынсыҡ ни тиклем күп деталдәрҙән торһа, файҙаһы шул тиклем күберәк.
• Төрлө материалдарҙан эшләнгән уйынсыҡтары булһын. Әйтәйек, пластмасса менән бер рәттән ағас, тире һәм резина, төрлө туҡымалар, керамик, металл һәм хатта таш уйынсыҡтар.

Белгестәр фекеренсә, балаларҙың йәшенә ҡарап, һайланылған уйынсыҡтар уларҙың дөрөҫ  тәрбиәләнеүенә һәм үҫешенә булышлыҡ итә.