"Әбекәй, алтыным-минем иң якыным"
материал (подготовительная группа) на тему

                       “Әбекәй – алтыным, минем иң якыным”

                  (өлкәннәр көненә багышланган күңел ачу кичәсе)

Максат: Балаларны әби-бабайларга инсафлы – ихтирамлы булырга, матур сүзләр әйтеп, күңелләрен күрергә өйрәтү. Гаиләдә күрсәткән хезмәтләрен хөрмәтләү. Ямьсез эшләр белән аларны борчырга ярамаганлыгын төшендерү.

Алып баручы: Хәерле көн хөрмәтле кунаклар! Сөйкемле, ягымлы, йомшак күңелле әбиләребез! Бүгенге кичәдә сезнең барлык кайгы-хәсрәтләрегезне, сызлануларыгызны оныттырып, күңелегез белән яшьлек елларыгызга кайтара алсак, без бик шат булыр идек.

   Бу очрашу сезнең күңелләрдә матур истәлекләр калдырсын иде. Сезне ихлас күңелдән бүгенге бәйрәм белән котлап, җыр бүләк итәбез.

Җыр: “Минем әбием” (Г.Латыйп сүзләре)

                  Әбием күзлек кия,

                  Чәчләренә ак кунган.

                  Бер көн дә соңга калмый,

                  Иртүк тора йокыдан.

                      Әбекәй, алтыным,

                      Минем иң якыным.

                      Яратам, яратам,

                      Яратам мин аны.

                   Минем әби энемне

                   Бәй-бәй итә, пәп итә.

                   Ул йокыдан торганда,

                   Мәмие пешеп җитә.

Алып баручы: Әйе, балалар, сезнең  әби-бабаларыгыз бик уңган, ягымлы һәм тырыш. Ә аларның уңган, җитез куллары нинди эшләр башкара соң? (Җаваплар.) Күрдегезме, әби-бабайлар гаиләдә күпме эшләр башкара! Алар әти-әниләрне, сезне – оныкларны сөендерү өчен ничек тырышалар! Җылы оек – бияләйләр бәйлиләр; өйләрне җыештырып, бүлмәгә нур кертәләр; тәмле ашлар пешерәләр. Аларның эшләгән эшләре, иткән изгелекләре әйтеп-сөйләп бетергесез. Шуңа күрә без аларны хөрмәт итәргә, яратырга, кадерләргә тиеш.

Илнар: “Дәү әнием” (Ә.Бикчәнтәева.)

                 Әниемнең әнисе-

                 Әбием була минем,

                 Әби генә түгел әле,

                 Ул минем дәү әнием.

                    Тәмле ашлар пешерә,

                    Матур гөлләр үстерә.

                    Өебезнең нуры ул,

                    Барыбыздан олы ул.

                 Җылы оек, бияләй

                 Бәйли безгә көз җиткәч,

                 Мин дә аңа бүләкләр

                 Алырмын үсеп җиткәч.

Алып баручы: Балалар, әби-бабайларның иң зур шатлыклары – сез – оныклар! Аларга гел шәфкатьле булыгыз. Ә бүген аларга бер матур җыр бүләк итик.

Җыр: “Әбием-әбекәем” (Р.Бакиров сүзләре, Р.Сәрвәров музыкасы)

                 Балам, дия-дия безне

                 Кадерләп үстерәсең.

                 Әй, матур син, әбекәем,

                 Күзләр тия күрмәсен!

                     Кушымта:

                            Әй, әбием, әбекәем,

                            Кояш кебек күңелең,

                            Сәламәтлек бирсен Ходай,

                            Озын булсын гомерең.

                 Өебезнең нуры бит син,

                 Рәхмәт яусын үзеңә.

                 Бәхетлебез, әбекәем,

                 Син булган өчен генә.

Алинә:  Нигә бүген бөтен җирдә

               Чәчәкләр балкый бездә,

               Нигә кояш көлеп карый,-

               Беләбез һәммәбез дә.

                  Бүген - әбиләр бәйрәме,

                  Бүген җирдә тантана.

                  Кояш шуңа көлә бүген,

                  Гөлләр шуңа шатлана.

Рушат:   - Бәйрәм бүген, бәйрәм!-диеп,

                Бар дөнья көлеп торсын.

                Әби бәйрәме икәнне

                Әти дә белеп торсын,

                Әни дә көлеп торсын.  (З.Туфайлова)

Алып баручы: Аяклар тими идәнгә

                           Дәртләнеп биегәндә.

                           Йөрәкләр җырлый берләшеп,

                           Парлашып биик, әйдә!

                 Балалар парлы татар биюе башкаралар.

Алсу: “ Әбием”

                  Әбием минем матур,

                  Күзләре якты, көләч.

                  Шундый күңелле була,

                  Ул өйгә кайтып кергәч.

                       Мин елышам әбигә,

                       Әби миңа елыша.

                       Битләре аның кайнар,

                       Ә куллары йоп-йомшак. (Р.Харис)

Җыр: “Солдатта булган диләр”(Ш.Маннапов сүзләре, Г.Нигъмәтҗанов музыкасы.)

                  Билен кысып буган, диләр,

                  Бигрәк тә уңган, диләр;

                  Әллә каян күренеп тора-

                  Солдатта булган, диләр.

                     Кечеләрне кече итәр,

                     Олыны зурлар, диләр.

                     Әллә каян күренеп тора-

                     Солдатта булган, диләр.

                  Комбинезон алган, диләр,

                  Шинелен салган, диләр.

                  Шинелен салса да, солдат

                  Гадәте калган, диләр.

Раян: “Әбием килгән”

                    Өйгә кайтсам, өй балкыган-

                    Өйгә нур иңгән!

                    Ерак җирне якын итеп,

                    Әбием килгән!

                       Үзен ничек сагынганны

                        Белгән ул, белгән!

                        “Күрим әле улымны!”-дип,

                        Әбием килгән! (Ф.Зыятдинова)

Тимур: “Әби күзлеген эзли”

                    Кайда икәнен белми,

                    Әби күзлеген эзли.

                    Күзлеге бит кулында,

                    Әмма ул аны сизми.

                        -Әби, әби,-дим аңа,

                        Каршысына ук килеп,

                        Җайлы булыр эзләргә,

                        Күзлегеңне ки элек.

                     Әби күзлеген кия,

                     Үзе елмаеп көлә.

                     -Рәхмәт, табып бирдең. – ди.

                     Аркамнан сөя-сөя. (Н.Мадъяров)

Җыр: “Мин әтине яратам”(Р.Вәлиуллин сүзләре, Ә.Һадиева музыкасы)

                   Әтиемнең “йолдызы” мин-

                   Ул миңа шулай дәшә.

                   Тәмле кәнфит, чикләвек,

                   Уенчык алып кайта.

                          Кушымта:

                   Бер матур җыр бүләк итәм-

                   Әтием җыр ярата.

                   Лә-лә-лә...

                        Кулымнан тотып әтием

                        Иртән бакчага илтә.

                        Үзенең эше беткәч,

                        Алырга килеп җитә.

                   Кичен әкият укыйбыз

                   Әтием белән бергә.

                   Бик яратам әтемне,

                   Алдыннан төшмим бер дә.

Алинә: “Минем әби бик әйбәт”

                      Кемнең әбисе иң әйбәт?

                      Минем әби, әлбәттә.

                      Өйрәтә әби безне дә

                      Әйбәт, матур гадәткә.

                          Үзе бөтен эшкә оста,

                           Безне өйрәтә җайлап.

                           Мактый, күңелне күтәрә,

                           Иң кирәк сүзләр сайлап. (В.Хәйруллина)

Тимур: “Үсәсем бар”

                      Минем әни шундый әйбәт-

                      Мактап кына тора ул.

                      “Улым бигрәк уңган!”-диеп,

                      Миңа канат куя ул.  

                          Кушканны да көтми эшлим-

                          Бик үсәсем килә ич!

                          Көн дә үсәм, әниемә

                          Зур-зур егет кирәк ич!  (Ф.Зыятдинова)

Җыр: “Солдатлар”(К.Булатова сүзләре, М.Минһаҗев музыкасы)

                     Бабай да солдат булган,

                     Әти дә солдат булган.

                     Зур абый да солдат булып

                     Ил чикләрендә торган.

                         Кече абый солдат булып

                         Китте быел яз гына.

                         Мин үзем дә солдат булам.

                         Үсим генә аз гына.

Әмир: “Дәү әни”

               Дөньяда иң җылы әби-

               Безнең әби, беләбез.

               Шуңа күрә энем белән

               Куенына керәбез.

                     Дәү әнинең кочагында

                     Китәбез эреп кенә.

                     Яшәрбез әле, үскәч тә,

                     Кадерен белеп кенә. (Йолдыз)

Алып баручы: Ә хәзер кадерле әбиләребезнең яшь чакларын искә төшереп, татар халкының җырлы уены : “Чума үрдәк, чума каз” ны уйнап алыйк. Йөрәкләре җилкенеп, яшәреп китсеннәр әле әбиләребез.

Алып баручы: Сабыр, йомшак күңелле әбиләребез, бүгенге бәйрәмгә килүегезгә зур рәхмәт сезгә! Гел шулай якты йөзле, тәмле сүзле булып, оныкларыгызны сөендереп, озак яшәгез. (Балалар үзләре әзерләгән бәйрәм открыткаларын әбиләренә бүләк итәләр.) Ә хәзер бергәләп табын янында чәй эчеп алыйк. (Бәйрәм шуның белән тәмамлана.)