«Балалар Һабантуйы»
план-конспект

Муниципаль автономлы

мәктәпкәсә белем биреү учреждениеһы

«Сулпылар» балалар баҡсаһы

                                                                                                                             «Балалар Һабантуйы»

                                                                                                                                                                         Музыка етәксеһе :

    Ғөбәйҙуллина Р.А.

                                                                                                                                                           Тәрбиәселәр:

      Дәүләтҡолова Н.Р.

                                                                                                 Сибай-2016

Һабантуй байрамы- йәй башында гөл-сәскәле аҡланда үткәрелә. Үткәреләсәк урынды билдәләп үтәләр,быны «яр һыҙыу» йә  “майҙан һалыу” тиҙәр. Ҡатын-ҡыҙҙар майҙан биҙәй : ағастарға таҫмалар бәйләй.

А.б.:

 Ер һыҙылды,майҙан әҙер,

Ҡағылған бейек ҡолға.

Таҫмалар, суҡтар тағылды,

Ҡунаҡтар сыҡты юлға.

           Көй яңғырай. Тирмәләр. Бер ҡыҙ малай флагтар тотоп инәләр.

Малай:  Нисек һыҙғыра ҡурай !

                Йыйылығыҙ ,тип һорай.

                Һаумы,һаумы һабантуй

                Бөтә эшең ҡуй бөгөн.

Ҡыҙ : Йыйылығыҙ майҙанға,

           Һабантуйҙы башларға.

А.б. : Башҡорт халҡы йылда яҙҙан

           Сәсеү башлар алдынан

           Уңған иген үҫһен тип,

           Матур йола  башҡарған.

           Йәшел ялан буйҙарында

           Йәмле байрам уҙғарған.

           Йырлаған да, бейегән дә,

           Көрәштә көс һынаған.

           Көндәр уҙған,йылдар уҙған

            Матур йола дан алған.

         Ҡайһы бала әйтер миңә

         Был йола нисек атала ?

Балалар: Һабантуй!

А.б: Афарин.Был байрам яҙғы  һабан, сәсеү эштәре бөтөү менән,тәбиғәттең йәшлеккә күмелгән ваҡытында үткәрелә. Олоһо ла, кесеһе лә һабантуйға ял итергә,күңел асырға йыйыла.

Бөгөн беҙҙә һабантуй байрамына йыйлдыҡ.Байрамға хөрмәтле ҡунаҡтарҙа килгәндәр: “Сулпылар” балалар баҡсаһы мөдире Нурия Әхәт ҡыҙы, ата-әсәләр,балалар баҡсаһы төркөмдәре.

                               Һәр төркөм менән таныштырыу.

Һаумыһығыҙ,һылыуҙар!Һеҙ ниндәй ырыу-заттан ?

Һаумыһығыҙ ҡыйыуҙар,килдегеҙ ҡайһы яҡтан ?

А.б:

Һабантуйҙа тирмә ҡорҙоҡ,

Ҡор йыйҙыҡ ҡунаҡтарға.

Йырлап күңел асайыҡ

Һабантуйҙа,байрамда.

                                    Тирмәләр менән танышыу.

А.б.:

Һабантуй булһын ҡотло,

Барыһы булһын йортло.

Әйҙәгеҙ,күңел асайыҡ,

Уйнап,йырлап алайыҡ !

                                               Йыр «Шаян йыр».

А.б.:

Беҙ башлайбыҙ ҙур алыш:

Һабантуйҙа ат сабыш.

Етеҙҙәр ҡушылығыҙ:

Көслөләр өсөн ярыш!

                                                       АТ САБЫШЫ

А.б.:

Ҡыҙыҡ уйын тапҡандар,

Ҡалаҡҡа йомортҡа һалғандар.

Йомортҡаны ҡалаҡта

Кем тиҙерәк килтерә.

                                       ЙОМОТРҠАЛАР МЕНӘН ЯРЫШ

А.б.:

Таянабыҙ бөйөргә,

Тотонабыҙ бейергә.

Тыпыр-тыпыр тыпырлап

Бейеп китәбеҙ бергә.

                                                     Уйын “Күләгә”.

                                   Көй аҫтында Ҡамыр батыр инә.

Ҡамыр батыр: Ниндәй шау-шыу бында? Миңә ял итергә бирмәйҙәр: йырлайҙар,бейейҙәр,күңел асалар.Ҡайһылай күп балалар йыйылғандар икән бында.Һаумыһығыҙ балалар,ҡунаҡтар!Мин-Ҡамыр батыр,һеҙгә тылсымлы әкиәттән килдем.Мин бик көслө,маһир әкиәт геройы,әйтегеҙ әле ниндәй байрамға йыйылдығыҙ?

Балалар: Һабантуй!

А.б.: Эйе,Ҡамыр батыр беҙҙә Һабантуй.Балалар ярышалар,көс һынышалар,күңел асалар.Әйҙә,һин дә беҙҙең менән көс һынашырға,уйындар уйнарға.Беҙҙең дә балалар көслөләр,етеҙҙәр,батырҙар.

Ҡамыр батыр : Шулаймы ни ?Ярай улайһа.Байрам булғас байрам булһын,тирә-яҡ гөрләп торһон.Һеҙҙең балалар нимә эшләй беләләр ?

Балалар: Йүгерергә,атта сабышырға,йырларға,бейергә.

Ҡамыр батыр :

Гөж-гөж килә бында майҙан

Уйын-ярыш,йырҙарҙан.

Һеҙҙең менән ҡалайым

Ярышта ҡатнашайым.

А.б.:

Әйҙә-әйҙә Ҡамыр батыр!

Хәҙер башлана ярыш.

Таҫтамалды ныҡ тотоғоҙ

Ҡаймылҡмаһын билегеҙ.

Ҡамыр батыр: Көрәш…. Уны мин беләм(бер бала менән көрәшеп ҡарай,еңә).Балалар,йә хәҙер һеҙ көрәшегеҙ,ә мин һеҙҙе ҡарап ултырайым.

                                                        КӨРӘШ

Ҡамыр батыр : Балаларға көслө булып үҫер өсөн бутҡа ашарға,иртәнсәк күнекмәләр эшләргә һәм спорт менән дуҫ булырға кәрәк.

                                   Түңәрәк уйын “Косилка-молотилка”.

Ҡамыр батыр: Афарин!Бигерәк матур йырлап-уйнайҙар. Ә һеҙ беләһегеҙме Һабантуйҙа тоҡ кейеп йүгергәндәрен?

                                                Бер мәрәкә булһын әле

                                                Йүгерәйек тоҡ кейеп

                                                Әсәйҙәребеҙ шатланһын

                                                Улдарыбыҙ уңған,тип.

                                              ТОҠ КЕЙЕП ЙҮГЕРЕҮ.

Ҡамыр батыр: Афарин!Һеҙ сос,етеҙ балалар икәнһегеҙ,миңә бик оҡшанығыҙ.Миңә китергә лә ваҡыт етте,һау булығыҙ балалар!

А.б.:

Әйҙә,уйнайыҡ әле,

Әйҙә бейейек әле.

Дуҫтарыбыҙ алҡышлаһын

Йырлап алайыҡ әле.

                                                Йыр «Йәй килде».

А.б.:

Үҙ-ара ярышабыҙ,

Арҡан тартышабыҙ.

Әйҙә,дуҫым,килә һал,

Байрамда көс һынап ҡал!

                                              АРҠАН ТАРТЫШЫУ.

А.б.:

Һабантуйҙа күңелле

Гөж килеп тора майҙан.

Кем һөнәрен күрһәтә?

Әйҙә сыҡ әле алдан!

                                        Көй аҫтында бейеүсе ҡыҙ инә.

Бейеүсе ҡыҙ : Һаумыһығыҙ балалар,мин бейеүсе ҡыҙ булам!Бик бейергә яратам.Һеҙҙәге байрам тауышын ишетеп килеп тә еттем.

А.б.: Әйҙә,әйҙә рәхим ит.

Ҡара әле-беҙҙең ҡыҙҙар бигерәк матур,

Матур сәскә кеүектәр.

Бергәләшеп һоҡландырып

Хәҙер беҙгә бейерҙәр.

Бейеүсе ҡыҙ,һин дә бергә бейеп ал.

                                                     «Ҡурай» бейеүе.

А.б.: Рәхмәт.

Бейеүсе ҡыҙ: Башҡорт халҡы үҙенең ҡунаҡсыллығы менән борондан айырылып торған.Килгән ҡунаҡтарын тәмле аш-һыу менән һыйлағандар.Балалар,һеҙ ниндәй милли аш-һыуҙар беләһегеҙ?

Балалар:Сәк-сәк,бәлештәр,бишбармаҡ,ҡымыҙ,тултырма,ҡаҙы …..

Бейеүсе ҡыҙ: Ниндәй шәп балалар йыйылғандар,афарин. Ә хәҙер мин һеҙҙе балалар әйткән һый янына тәмле сәй эсергә саҡырам.Рәхим итегеҙ.

А.б.:

Һабантуйҙы тамалап

Тағы нимә әйтергә?

Хушлашып шуны әйтәм:

Ныҡлы һаулыҡ барығыҙға,

Ауырымағыҙ,ҡартаймағыҙ,

Асыулана күрмәгеҙ.

Бөгөнгөләй йәш кенә

Ҡалығыҙ киләсәктә.

                              Ата-әсәләр һәм ҡунаҡтар менән сәй эсеү.