Конспект итогового занятия в 1 младшей группе "Көзге урман"
план-конспект занятия по развитию речи (младшая группа)

                           Белем бирү эшчәнлегенең барышы.

Тәрбияче. Балалар, карагыз әле,бүген бездә кунаклар, әйдәгез әле кунакларыбыз белән исәнләшик :

Балалар. Исәнмесез! Хәерле иртә сезгә!

Тәрбияче: (тәрәзәдән шакыган тавыш ишетелә) Кемдер тәрәзә шакый, карыйк әле. Кем бар анда? (балаларга да сорарга тәкъдим итә). Кем шакыды икән- тыңлагыз әле:

Үтеп китте матур җәйләр,

                                             Көзләр килеп җиттеләр.

                                             Ак каеннын яфраклары

                                             Саргаешып киттеләр.

Тәрбияче: Балалар, сүз нинди ел фасылы турында бара?

Балалар: Көз фасылы турында.

Тәрбияче: Димәк, тәрәзәгә көз шакыган. Безнең төркемгә дә көз килгән. Карагыз әле балалар, аяк асларыгызда нәрсә ул?

Балалар: Яфраклар.

Тәрбияче: Нинди төстә алар?

Балалар: Сары, яшел, кызыл төстә.

Тәрбияче: (яфракны әйләндерә, артында язу) Көз безне урманга кунакка чакырган икән, шуңа тәрәзә шакыган. Сез кунакка барырга яратасызмы?

Балалар: Әйе, Яратабыз.

Тәрбияче: Ә кунакка нәрсә белән барып була?

Балалар: Автобуска утырып.

                Машинага утырып.

Тэрбияче: Балалар, без сезнең белән урманга нәрсә белән барабыз? (балалар сайлыйлар, автобус булса: бер –берсенә тотынып,...утырып урманга китәләр).

Тәрбияче: Менә, балалар, без сезнең белән урманга килеп тә җиттек. Карагыз әле, безнен урман нинди матур! Бу рәсемдә көзге урман сүрәтләнгән. Көз коне яфраклар саргая, салкын җилләр исә, яңгырлар ява, агачлардан яфраклар коела, кошлар җылы якларга очып китәләр. Я әйтегез әле, көз көне табигатьтә нинди үзгәрешләр була?

Балалар: Көз көне яфраклар саргая, салкын җил исә, яңгырлар ява, агачлардан яфраклар коела, кошлар җылы якларга очып китәләр.

Тәрбияче: Балалар, бу агачка карыйк әле, аның яфраклары коелып беткән. Әйдәгез ярдәм итәбез агачка, яфракларын ябыштырабыз.

Балалар: Балалар агачка яфракларын ябыштыралар.

Тәрбияче: Булдырдыгыз, балалар.

                   Балалар, безнең урманда төрле кыргый хайваннар яши. Карагыз әле, бу нинди хайван?

Балалар: Аю.

Тәрбияче: Аю нинди төстә?

Балалар: Коңгырт төстә.

Тәрбияче: Аю нәрсә ашарга ярата?

Балалар: Җиләкләр, җимешләр, гөмбә.

Тәрбияче: Әйе. Көзен аю күп ашый. Ул үзенә май туплый, кышын йоклар өчен өнен әзерли. Балалар әйдәгез әле уйнап алабыз. Уеннын исеме “Аю килгән урманнан”.

Аю килгән урманнан,

Ерак диеп тормаган,

Алгы тәпиләрен уйната,

Арткы тәпиләрен күтәреп ала,

Биеп ала,

Аннан соң алгы тәпиләре белән шатланып, чәбәк чәбәк итә.

Тәрбияче: Балалар, әйтегез әле урманда тагын нинди хайваннар яши .

Балалар: куян.

Тәрбияче: Ул нинди төстә?

Балалар: куян соры.

Тәрбияче: Куян кышка әзерләнгәнме?

Балалар: Юк

Тәрбияче: Дөрес, куян тунын ак төскә алыштырмаган. Ул кыш көне ак төстә, ә хәзер соры төстә. Куяннын ак төскә керүе – дошманнарыннан саклау өчен кирәк. Ул кар өстендә дә качып кала ала. Ак тун соры тунга караганда җылырак шуңа кышын куян өшеми. Тун җылымы?

Балалар: Тун җылы.

Тәрбияче: куян нәрсә ашарга ярата әле?

Балалар: кишер, кәбестә, үлән, агач кайрысы кимерә.

Тәрбияче: Әдәгез әле, куянкаебызга уен уйныйк.

Хәрәкәтле уен “Ак куянкай утырган”.

Ак куянкай утырган

Колакларын селкетә,

Менә шулай, менә шулай,

Колакларын селкетә.

Куян туңа башлагач

Аякларын җылыта.

Тәрбияче: Афәрин. Булдырдыгыз, балалар. Менә без сезнең белән бүген кыргый хайваннар турында сөйләштек. Карагыз әле монда, агач артында нәрсәдер бар. Әәә, кәрзин икән. Ул буш түгел! Анын эчендә алмалар. Монда хат та бар әле. “Урманга килгән кунаклар өчен” диелгән. Әйдәгез әле укыйк: “Хөрмәтле кунаклар. Гафу итегез, сезне каршы ала алмадык. Хәзер бит көз җитте, без кышка әзерләнәбез, сезгә күчтәнәчебезне калдырабыз”.

Тәрбияче: Нәрсәләр безгә күчтәнәч калдырганнар икән?

Балалар: Әйе, хайваннар.

Тәрбияче: Безгә кайтарга вакыт. Утырабыз да кайтабыз.

                  Менә балалар кайтып та җиттек. Ә хәзер урыннарыгызга утырыгыз. Балалар без кая бардык?

Балалар: Урманга бардык.

Тәрбияче: Урманда нәрсәләр яши?

Балалар: Аю, куян.

Тәрбияче: Болар барсы да кыргый хайваннар. Әйдәгез әле, бергәләп әйтик.

Балалар: Кыргый хайваннар.

Тәрбияче: Шуның белән безнең эшчәнлегебез тәмам. Кунакларыбыз белән саубуллашыйк.

Балалар: Саубулыгыз!