Минем гаиләм
план-конспект занятия по развитию речи (средняя группа) по теме

Нуреева Г.С. - тәрбияче

Түбән Кама шәһәре МБДОУ №76

“Минем гаиләм”

 Максат:

1. Гаилә  турындагы  белемнәрен  ныгыту, гаилә әгъзалары белән таныштыру, өлкәннәр дөньясына  кызыксыну  уяту.

2. Өлкәннәрне хөрмәт итәргә өйрәтү.

3. Бәйләнешле сөйләмне һәм мөстәкыйль фикерләү сәләтен үстерү.

Җиһазлау:

Өй  рәсемнәре,  фотоальбомнар,  гаилә әгъзаларының шәхси әйберләре.

Дәрес барышы:

Тәрбияче: Балалар, әйдәгез, килгән кунаклар белән  матур итеп исәнләшик.

Балалар: Исәнмесез.

(Тактага өй рәсемнәре эленгән)

Тәрбияче: Балалар, бу рәсемгә карагыз әле, анда нәрсә күрәсез?

Балалар: Өй.

Тәрбияче: Ә бу өйдә кемнәр яши?

Балалар: Кешеләр.

Тәрбияче: Ә кешеләр кемнәр алар?

Балалар: Әти, әни, бабай, әби, абый, апа, энем, сеңлем. (Рәсемнәр эленә)

Тәрбияче: Бик дөрес. Ә бер сүз белән аларны ничек итеп әйтеп була?

Балалар: Гаилә.

Тәрбияче: Шулай итеп өйдә кемнәр яши?

Балалар: Өйдә гаиләләр яши.

Тәрбияче: Нинди гаиләләр була?

Балалар: Зур һәм кечкенә гаиләләр.

Тәрбияче: Зур гаиләдә ничә кеше яши?

Балалар: Зур гаиләдә күп кеше яши.

Тәрбияче: Кечкенә гаиләләрдә ничә кеше яши?

Балалар: Кечкенә гаиләләрдә аз кеше яши.

Тәрбияче: Күп гаиләдә кемнәр яши?

Балалар: Әти, әни, бабай, әби, абый, апай, энем, сеңлем.

Тәрбияче: Аз гаиләдә кемнәр яши?

Балалар: Әти, әни, мин.

Тәрбияче: Ә сез нинди гаиләләрдә яшисез?

(Балаларның җаваплары: мин зур гаиләдә яшим. Безнең гаиләдә әти, әни, әби, бабай, сеңлем һәм мин яшим.)

Тәрбияче: Ә кечкенә гаиләләрдә яшәүче балалар бармы?

(Балалар җавабы: мин кечкенә гаиләдә яшим. Әти, әни, мин.)

Тәрбияче: Менә без сезнең нинди гаиләләрдә яшәгәнегезне дә белдек.

Тәрбияче: Ә хәзер  безнең балалар үзләренең әниләре белән эшләгән гаилә альбомнары белән таныштырырлар.

 (Балалар “Гаилә”альбомнары белән таныштыралар)

(Бу мин яшәгән өй. Без анда гаиләбез белән яшибез. Минем әтием-…, әнием-…(исеме), һ.б.)

Тәрбияче: Менә, балалар, сез бер-берегезне гаилә альбомнары белән таныштырып та киттегез.

Физкультминут

Тәрбияче: Әйдәгез бергәләп “Исемең кем?”дигән бармак уены уйнап алабыз.

Бу бармак – бабай,

Бу бармак – әби,

Бу бармак – әти,

Бу бармак – әни,

Бу бармак – нәни бәби,

Аның исеме Чәнти!

Балалар, бу өстәлдә  сезгә таныш әйберләр юкмы? Әгәр дә булса, үзегезнең кулыгызга алыгыз. Аларның кемнеке икәнен ачыкларбыз.

Дидактик уен: “Кем әйбере?”

(Балалар әти-әниләренең, әби-бабайларының әйберләрен дөрес итеп танып ала белергә тиеш).

Тәрбияче: Балалар, сезгә бүген уен-шөгыль ошадымы? Без нәрсә турында сөйләштек? (Балаларның җаваплары)

Бик дөрес. Әти, әни, әби, бабай, балалар – бу гаилә, чөнки болар барысы да гаилә әгъзалары. Әти-әни, әби-бабай – гаиләнең иң хөрмәтле кешеләре, чөнки алар сезнең турында уйлап, борчылып яшиләр. Шуңа күрә аларны яратыгыз, матур эшләрегез белән куандырыгыз, ягымлы сүзләрегез белән сөендерегез.

Тәрбияче: Ә хәзер без сезнең белән Роберт абый Миңңуллин сүзләренә язылган “Җирдә миңа ни кирәк “ дигән җыр белән уен-шөгылебезне тәмамлыйк.

Җирдә миңа ни кирәк?

Әти дә әни кирәк.

Җирдә миңа ни кирәк?

Без яшәгән өй кирәк,

Әти дә әни кирәк.

Без яшәгән өй кирәк.