"Йомшаккай" бездә кунакта
план-конспект занятия по развитию речи (младшая группа) по теме

                                               “Гомуми үсеш бирүче № 7 Актаныш балалар

                                                   бакчасы”ның  югары категорияле тәрбиячесе                                                                                                                                                            

                                                 Халимова Рузалия Рифкать кызының эш  тәҗрибәсеннән.

“Йомшаккай” бездә кунакта

                         ( I кечкенәләр төркемендә сөйләм үстерү  шөгыле)

Максат: Кешеләрнең исемгә, яшәү урынына хокуклы булуын балаларга җиткерү; сүзлек запасын баету, сөйләшү осталыкларын үстерү; музыкаль әсәрнең эчтәлеген аңларга, үз исемнәрен әйтә белергә өйрәтү; балаларның яз турындагы белемнәрен киңәйтү;  төзү осталыкларын үстерүне дәвам итү;   балаларда әхлак тәрбиясе тәрбияләү.

Җиһазлар: магнитофон, куян өчен киемнәр, кош оялары, иҗади сәнгатьле төзү өчен геометрик фигуралар, өй төзү өчен төсле картоннан өчпочмаклар, шакмаклар, салютлар, төсле кулъяулыклар, вак уенчыклар.

Шөгыль барышы :

1. Исәнләшү,”Хәерле иртә!”

2. Магнитофон язмасыннан “Яз килә” җырын тыңлау. Җыр нәрсә турында ?

3. Әңгәмә. Хәзер елның кайсы вакыты? Көннәр нинди? Кояш ничек  яктырта, җылыта? Карлар нишли? Түбәләрдән нәрсә тама? Бүген көн нинди?  һ.б. сораулар бирү.

4.Физкультминутка “Яз килә”(хәрәкәтләр белән)

   Киң итеп җәеп колач

   Килә яз, килә яз....

5. Сюрприз . Куян кызы елап керә.

- Ник елыйсың, син, куянкай ?

- Ничек инде еламаска, төлкенең өе боздан, минеке агачтан иде. Яз җиткәч, төлкенең өе эреп бетте, төлке мине өйдән куып чыгарды.

- Елама куянкай, безнең балалар сиңа ярдәм итәрләр.

- Ярдәм итәбезме балалар?

- Балалар, әйдәгез башта куян белән исәнләшик, танышыйк әле.

- Исәнме, куян!

- Куянкай безнең балаларыбызның матур-матур исемнәре бар, без аларга ягымлы итеп исем белән эндәшәбез.

    Әйдәгез, балалар, куянны таныштырыйк әле үзебез белән.

- Минем исемем....(Һәр бала кул биреп, исемнәрен әйтә)

- Куян – Исемнәрегез бигрәк матур икән, рәхмәт сезгә. Ә сезнең балалар бакчасының исеме ничек соң?

-“Алтынчәч” балалар бакчасы.

- Балалар, безнең куянкайның исеме юк икән бит. Аңа нинди исем бирәбез соң? Ул нинди?

- Куркак, озын колаклы, ак, йомшак...

- Куянга “Йомшаккай” дигән исем бирәбезме?

(Сүзлек өстендә эш.”Йомшаккай”)

- Балалар, кунак килгәч аңа нәрсә бирергә кирәк? (Утырырга урын)

- Әйе, мә Йомшаккай, монда утырып тор, ял ит.

- Балалар әйтегез әле, без кайда яшибез?

- Өйләрдә.

- Безнең өйләребез нәрсәдән ясалган (агачтан,кирпичтән һ.б.)

- Әйе, балалар һәр кешенең дә яшәү өчен үзләренең өйләре була. Хайваннарның, кошларның да өйләре бар. Балалар әйтегез әле кошларга ояны кемнәр ясый? (Сыерчыкларга кешеләр ясый, каргалар үзләре ясыйлар – ояларны күрсәтү)

- Әйдәгез куянга өй ясарга өйрәтик әле (иҗади сәнгатьле төзү) Кем төзергә тели? (Бер бала чыгып өй төзи, икенчесе - кояш, өченчесе - агач куя).

Йомшаккай – Ай нинди матур өй! Кояш та яктырта. Күңелле булып китте.

- Балалар, әйдәгез хәзер барыбыз да өстәл янына барып өйләр төзик әле. (Балалар  өй төзиләр. Алардан өйләрнең нинди төсләрдән ясалуын сорап чыгу).

- Синең өең нинди төстә ?

- Йомшаккай, безнең балалар ясаган өйләр сиңа ошадымы ?

- Әйе балалар, рәхмәт сезгә. Бик матур итеп өй төзедегез. Мин дә хәзер өй төзергә өйрәндем инде. Иптәшләремне дә өйрәтермен. Сезгә үземнең бүләкләремне калдырам. Сау булыгыз!

- Сау булыгыз!

- Карыйк әле, нинди бүләкләр микән? (урыннарга утыру)

- Карагыз, нинди матур салютлар (күрсәтү, аттыру - эченнән вак уенчыклар чыга)

- Бу нинди төстә? (Төп төсләрне аеру)

- Салютлар “арттыру”. Уенчыкларны алу, шатлану. Йомгаклау. Анализ. Сезгә шөгыль ошадымы?

- Нәрсә ошады? (җаваплар бирү).