"Айыу менән терпе"әкиәте
материал по художественной литературе

Минең әкиәт

Баймаҡ ҡалаһының “Әкиәт” балалар баҡсаһы тәрбиәсеһе Йосопова Гөлирә Разаҡ ҡыҙы

Жанр :хайуандар тураһында әкиәт

                     Ниңә терпе менән айыу ҡышын йоҡлай?

 Борон заманда ер йөҙөндә тик ике миҙгел генә ,йәй һәм ҡыш , йәшәгән ти.Бер-береһен еңә алмай бәхәсләшә торғас,был икәү хайуандарға мөрәжәғәт итергә булғандар,уларҙың ниндәй хөкөм сығарыуын көткәндәр.Хайуандар иһә миҙгелдәрҙең алмашлап һәм тигеҙ ваҡыт араһын биләүҙәрен һораған,үҙ-ара тауыш биреү ойошторғандар ти.

  Бына,ниһәйәт,ҡыш менән йәй өсөн тауыш биреү туҡтаған һәм күпселек тауыш менән ике миҙгелдең дә бер тигеҙ,алмашлап килеүен теләп ҡарар сығарғандар.Тик айыу менән терпе  генә ҡышты яратмағандар,һәр саҡ йәй булыуын теләгәндәр,ҡышты ҡыуырға тотонғандар ти.Ҡыш  бик асыуланған,үпкәләгән һәм уларға үс һаҡлап ҡалған.

 Ҡарар буйынса миҙгелдәр тигеҙ ваҡыт араһын биләгәндәр,ергә тәүҙә йәй,унан ҡыш килгән.Ҡыш үҙен ҡыуған айыу менән терпене туңдырған,өшөткән.Уларҙы бөтөнләй күрергә теләмәгән.Шуға күрә үҙе килгән арала ,айыу менән терпене юҡ итәсәкмен,тип хәбәр ебәргән.Айыу менән терпе ныҡ ҡурҡҡан,ҡыш килеүгә үҙҙәренә өң әҙерләп ,шунда боҫҡан.Шул ваҡыттан алып ,ҡыш яҡынлай башлау менән,айыу менән терпе үҙ өңдәрендә йоҡоға сума икән,ҡыш китеп,көндәр йылынғас ҡына килеп сығалар ти.