Проект “Киемнәр дә безне бизиләр”
проект (старшая группа) на тему

Проект “Киемнәр дә безне бизиләр”

Миронова Г.Р. –

Казан шәһәре Мәскәү районының “Татар телендә тәрбия һәм белем бирүче

184-нче катнаш төрдәге балалар бакчасы” муниципаль автономияле мәктәпкәчә

белем учреждениесенең  I квалификацион категорияле тәрбиячесе

Балалар бакчасында тәрбияче һәм балаларның үзара эшчәнлегенең проект формасында оештырылуы бик уңайлы. Гадәттә, бер тема бер атна дәвамында өйрәнелергә тиеш. Бер яктан бер атна күп, икенче яктан аз кебек. Тик шулай да ачык һәм төгәл планлаштыру ярдәмендә теманы атна эчендә өйрәнеп, кирәкле сүзләрне актив сүзлеккә кертеп, логик фикерләү һәм продуктив эшчәнлектә камилләшеп өлгерү мөмкин. Проектның эчтәлеге атнаның бар көнендә һәм режим моментларының мөмкин кадәр һәр берсендә чагылырга тиешле. Болай эшләү хәтердә калдыруны яхшырта, кыска вакытлы булуы белән балаларны талдырмый дип уйлыйм. Элек өйрәнелгәннәр, булган белем һәм күзаллаулларга нигезләнеп яңаларны булдыру һич тә авыр түгел. Бүген сезнең игътибарга “Киемнәр дә безне бизиләр” проектының презентациясен тәкъдим итәм.

Проект 5-6 яшьлек балалар белән эшләүгә планлаштырылган.

Проектның максаты: Татар теленә кызыксыну уяту, аралашу теләге тудыру.

Проектның бурычлары:

1. Балаларда киемнәргә карата зәвык, сакчыл караш тәрбияләү.
2. Тәрбияче биргән сорауларга төгәл җавап кайтара белү күнекмәсен, балаларның логик фикерләү сәләтен, сөйләм телен үстерү.
3. Милли киемнәргә кызыксыну уяту, үзләренә генә хас булган үзенчәлекләрен ачыклау, төсләрнең берләшүенә игътибар итү.
4. Кул моторикасын, продуктив эшчәнлек барышын ныгыту.

Проектта катнашучылар: өлкән төркем балалары, тәрбиячеләр.

Проектның эш планы

Эшчәнлек төрләрен проект аша тормышка ашыру

Әлеге проект ахырына рус телле балаларда күлмәк, чалбар сүзләре актив сөйләмгә керде. Төп төсләр (сары, яшел, зәңгәр, кызыл),  нинди, ничә, бер, ике, өч, дүрт, биш, алты  сүзләре ныгытылды. УМК буенча тәкъдим ителгән “Курчакны киендер”, “Курчакны чишендер”, “Курчакны йоклат” дидактик уеннары уен ситуацияләрендә кулланылды. Аудиоязмалар аша сүзлек камилләште.

Балалар “Киемнәр дә безне бизиләр” проекты аша кием- салым турында белем- күзаллаулларны үстерделәр. Cюжетлы- рольле уеннар вакытында бу бик ачык күренә. Рус телле балалар чалбар һәм күлмәк сүзләрен генә түгел, башка төр киемне белдерүче сүзләрне дә кулланалар.

Шулай ук балаларда кием- салымга игътибар, үз килеш- кыяфәтләренә кызыксыну дәрәҗәсе үсте. Балаларның көзгегә карап пөхтәләнү, кием- салымны рәткә китерү гадәте активлашуы бик сөендерә.

Балалар белән милли кием темасына аралашу аларда соклану да, кызыксыну да уятты. Кайбер балалар хәтта ник без хәзер шулай киенмибез икән диеп сораштылар. Китаплардан, милли киемле курчаклардан карап алар чапан, бала итәкле күлмәк, калфак, түбәтәй, алъяпкыч, чулпы, билбау кебек сүзләрне атыйлар. Рәсемнәрендә милли кием кигән кешеләрне сурәтләп карарга омтылалар.

УМК проектларының  бар төр эшчәнлеккә үтеп керүе бик отышлы. Чөнки темаларны һәр өлкәдә дә җиңел кулланырга, ныгытырга, үстерергә мөмкин.