Өйрәнегез ныгытып, сез юл әлифбасын!
материал (старшая группа) на тему

Конспект: “Өйрәнегез ныгытып, сез юл әлифбасын!”

 Максат: Балаларның юл кагыйдәләре турында булган  белемнәрен тирәнәйтү, системалаштыру.Игътибарлы  булырга өйрәтүне дәвам итү, сөйләм телен үстерү. Юл кагыйдәләрен үтәргә кирәклеген тәрбияләү.

Җиһазлау:Кибет, мәктәп, күл күренеше.Светофор, зебра, автобус күкрәкчәләре, руль, юл билгеләре.

Барышы:

Акрын гына көй ишетелә.

Алып баручы: Шалкан чәчкән безнең бабай

                           Майның нәкъ унбишендә

                           Уңыш алырга уйлаган

                           Көзге көннең берсендә

Шул көйгә бабай өеннән чыга, шалкан тирәли әйләнә.Шалканны тартып карый.

Бабай:  Нихәл итим, көчем җитми

              Әллә картлык җиткәнме?

              Әллә инде шалканым соң

              Өлгереп җитмәгәнме?(тарта)

               Чыкмады шул шалканым

               Актарсам да балчыкны

                Чыгарырбыз бәлки икәү

                 Чакырыймчы карчыкны

                  Карчык, карчык, чык әле,

                   Шалканны тартыйк әле.

Алып баручы:  Балалар,ләкин   әби кибеткә киткән  булган.   Әйдәгез бабайга булышырга әбине чакырыйк әле.

Балалар:Әби, әбекәй кил әле. Бабайга булыш әле.

(Кибет куренеше. Кибеттән сумкалар күтәргән әби килеп чыга)

Әби: Мине чакырасызмы ,әллә балакайларым? Менә кибеттән кирәкле ашамлыкларымны алдым. Хәзер, хәзер кайтам өйгә.

Алып баручы: Балалар, өйгә кайтып җитү өчен нишләргә кирәк?

Балалар: Автобус  тукталышына барып, автобуска утырырга кирәк.(Әби  тукталышка бара)

Алып баручы: Балалар,  ә автобуста үзеңне ничек тотарга кирәк?

Балалар: Шофер белән сөйләшмәскә, чабып йөрмәскә, чүп ташламаска, кычкырып сөйләшергә ярамый.

(Машина тавышы ишетелә, автобус  булып киенгән малай  әбине утырта, өенә алып кайтып җиткерә)

Әби:      Исән-сау йөре, улым!

               Барган идем кибеткә

               Ник чакырдың карткаем?

Бабай:Тот шушыннан арканны

            Икәү тартыйк шалканны!

Алып баручы: Әби бабайга, бабай әбигә тотынып

                           Әй тарталар, тарталар

                           Шыбыр тиргә баталар.

Әби: Чыкмый бит шалкан.Чакырыйк соң оныкны.

Алып баручы: Балалар,Алсу мәктәптән кайтып җитмәгән.Әйдәгез чакырыйк Алсуны!

Балалар: Алсу, Алсу, кайт әле бабайга булыш әле.

(Алсу мәктәптән чыга да, юл кырыенда басып кала)

Алып баручы: Балалар, өйгә кайту өчен юл аркылы чыгарга кирәк. Алсуга нәрсә ярдәм итәр икән?

Балалар: Светофор

Алып баручы: Светофор ни өчен кирәк? Нинди урында куела? Кайсы төс нәрсә аңлата?(балалар  жавап бирә)

Светофор җырлый:   Светофор алдыгызда

                                     Чү, кызый, тукта. Тукта.

                                      Ашыгырга бер кемгә

                                      Ярамый кызыл утта

                                      Онытма син, бер кайда син

                                       Юл   йөрү кагыйдәсен.

Алсу:     Йә, нинди  эш инде бу

               Юл бирми сары утта

               Көтим мин сабыр гына

               Ашыкмыйм бер дә юкка.

Светофор: Онытма син, бер кайда син

                     Юл йөрү кагыйдәсен!

Алсу:  Яшел  ут дәшә миңа

            Кузгалыйм әйдә тизрәк!

            Әй, яшел ут,  яшел дус

             Син әйбәт икән бигерәк!

(Алсу юл аша чыга, өйгә кайтып җитә)

Әби:Алсу кызым, кайттыңмы?  Безгә булыш әле.

Тот, шушыннан арканны

Өчәү тартыйк шалканны.

Алып баручы:     Әй тарталар, тарталар

                             Шыбыр тиргә баталар.

                              Бик нык булса да аркан

                              Һаман чыкмый шул шалкан.

Алсу:   Бәлки Акбай булышыр,

             Сөяк бирсәң тырышыр.

             Акбай, Акбай кил әле

             Безнең хәлне күр әле.

Алып баручы:  Балалар, Акбай күл буенда балык тота икән. Әйдәгез, Акбайны чакырыйк әле.

Балалар: Акбай, Акбай кил әле

                 Бабайга булыш әле.

(Көй  уйный, Акбай йөгереп чыга. Тротуарда тәртипсезләнә, уйный)

Алып баручы: Балалар Акбай  дөрес эшлиме? Кеше йөри торган, тротуарда уйнарга ярыймы?Нинди урыннарда уйнарга кирәк? ( Балаларның җавабы).

Балалар Акбай белән бергәләшеп физминутка ясыйлар.

Тротуардан атлыйбыз ( бер урында атлап тору)

Кагыйдәне саклыйбыз(бармак белән яныйбыз)

Урам аша чыкканда(аякларны югары күтәрү)

Сулга, уңга карыйбыз.

Акбай: Кайтып җиттем, бабакай

              Нинди эш күрсәт давай!

Бабай: Тот, шушыннан арканны

             Дүртәү тартыйк шалканны!

Алып баручы:     Әй тарталар, тарталар

                              Шыбыр тиргә баталар.

                              Бик нык булса да аркан

                              Һаман чыкмый шул шалкан.

Акбай: Әйдәгез, ярдәмгә песи белән  тычкан   дусны чакырыйк әле!

             Песи, тычкан кайтыгыз әле,

              Эш гамәл  күрсәтегез!

Алып баручы: Балалар, песи белән тычкан юл кырыенда аптырап калдылар. Юл аркылы ничек чыгарга була?

Балалар: Җир асты юлы белән.

Алып баручы: Сез аны каян белдегез? Юл асты юлын ничек табып була?

Балалар: Билгесенә карап.( Песи, тычкан кайталар)

Песи, тычкан: Хәлегез бик мөшкелме?

                          Безнең өчен шалкан тарту

                          Ярты минутлык уен,

                          Песи, тычкан  арасында

                           Без беренче чемпион.

Алып баручы: Нык булды аркан

                          Чыкты – китте шалкан!

Бабай: Менә бит тырыша торгач, бергәләшеп шалканны тартып чыгардык. Шулай шул,  бөтен  эш бердәмлекне, ә  юллар   тәртипне  ярата!  

Кичә җыр белән тәмамлана “Юллар уңсын” Р. Харис сүзләре, Р. Ахиярова көе.

                                                                                                           Татарстан Республикасы

                                                                                           Чирмешән районы,  Чирмешән авылы

                                                                                   икенче санлы “Каенкай”  балалар бакчасы

                                                                             муниципаль бюджет мәктәпкәчә  белем  бирү

                                                                                       учреждениясенең  тәрбиячесе

                                                                              Шәфигуллина Фәридә Халил кызы.