Рахматуллина Гюзелия Исламовна

                                                                 Гомеремдә җыйдым гыйлем –

                                                                 Мөгаллимнәр бирде белем.

                                                                  Күңелемә якын итеп

                                                                  Алган сабак – туган телем.

                                                                                   Илдус Гыйләҗев

    Кеше тормышында аның бөтен гомере буена аерылгысыз төшенчәләр, кешеләр, әйберләр була. Шуларның берсе – аның туган теле. Ул – кешенең дөньяга аваз салган минутыннан соңгы сулышына кадәр янәшә.

   Кеше дөьяга аваз салу белән , аны тудырган ана үзенең сабыена туган телендә “балам” дип эндәшә. Баланың беренче әйткән сүзе дә туган телендә яңгырый. Кеше үзенең иң саф хисләрен бары тик туган телендә генә белдерә ала. Бөек Тукай юкка гына үзенең иң кадерле кешеләре әти - әниләренә рәхмәт сүзләрен, алар рухына багышлаган догаларын туган телендә белдермәгән.

                             И туган тел! Синдә булган

                             Иң элек кыйлган догам:

                             Ярлыкагыл, дип, үзем һәм

                             Әткәм - әнкәмне, Ходам!

   Безнең халкыбызның күңел җәүһәрләре бары тик туган телдә генә сакланып калган. Бары тик туган телдә генә алар күңелнең иң нечкә кылларын тирбәтә алалар.

    Бүген татар теле җөмһүриятебездә тдәүләт теле дип беркетелгән. Шуңа күрә аның кулланылыш даирәсе дә киңәя. Ул инде хәзер -  кешеләр арасында үзара аралашу коралы гына түгел, дәүләт эшләрендә дә хокукка ия булган тел.

                              Ул булганда адашмабыз –

                              Юлым туры нурлы көнем. 

                              Күз карасы кебек саклыйм

                              Анам телен – татар телен.

И. Гыйләҗев.

Авылымның гүзәл табигате

Әсир итте мине үзенә.

Сүнмәс сөю дәрте уятамын

Балаларда туган телемә.

Сиңа булган  изге хисләремне,

Сөю, мәхәббәтнең кайнарын

Мин тапшырыр өчен буыннарга

Укытучы эшен сайладым.

Мин бәхетле әгәр балаларым

Сөйләсәләр ана телендә.

Кайгыларын,шатлыкларын бергә

Бүлешсәләр татар телендә.

 Минем туган телем – татар теле. Шагыйрь Н. Нәҗми аны “җырдай моңлы”, Р. Фәйзуллин “тыйнак, басынкы, түзем”И. Гыйләҗев “тәмле, күркәм, өстен”, ә Х. Туфан исә “күкрәүләр теле, батыр һәм җәүһәр мирас” дип атый.

И туган тел, и матур тел,

Әткәм - әнкәмнең теле!

Дөньяда күп нәрсә белдем

Син туган тел аркылы.

Үзенең туган телгә мәхәббәтен татар халкының бөек шагыйре Габдулла Тукай әнә шулай матур итеп әйтеп биргән. Чынлап та, туган телне чын мәгънәсендә ярату – туган илеңне, әткәң - әнкәңне ярату белән бер. Туган телне юкка гына ана теле дип атамаган шул халык!