Сказка на татарском языке "Батыр үрдәк малае"
материал по развитию речи (старшая, подготовительная группа)

Татарстан Республикасы Әгерҗе муниципаль районы Әгерҗе шәһәре

7 нче “Бәләкәч” муниципаль бюджет мәктәпкәчә белем бирү оешмасы

БАТЫР ҮРДӘК МАЛАЕ

мәктәпкә әзерлек төркеменә йөрүче балалар өчен

сәхнәләштерелгән авторлык әкияте

 Татар телен өйрәтү буенча тәрбиячеләр:

Мухаметдинова Айгөл Айратовна,

Нургалиева Миләүшә Альбертовна

Батыр үрдәк малае

мәктәпкә әзерлек төркеменә йөрүче балалар өчен сәхнәләштерелгән авторлык әкияте

Максат: театр сәнгате аша татар телен өйрәтү.

Бурычлар: 1.Персонажларның сөйләмен сәнгатьле итеп сөйләргә өйрәтү;

                     2.Сүз байлыгын арттыру;

                     3.Дустанә мөнәсәбәтләр тәрбияләү.

Җиһазлау: Өй макеты, агачлар, кәрзин белән алмалар, койма, аудиоязмалар

Катнашалар: Үрдәк малае, Каз бәбкәсе (кыз бала), Ана каз, Әтәч, Тавык чебие, Күркә чебие, Төлке, Куян, Керпе, автор

Музыка (дәртле)

Автор: Җитәкләшеп үрдәк малае белән каз бәбкәсе (кыз) керәләр.

Каз бәбкәсе: Кара әле, дустым,нишләп бер кем дә юк икән?

Үрдәк малае: Әйе шул, кичә барысы да иртүк чыгарбыз дигәннәр иде.

Каз бәбкәсе: Әйдә, чакырыйк әле үзләрен. (сәхнә артына китеп чакыралар)

Үрдәк малае: Бак-бак-бак!!! Чыгыгыз тизрәк!!!

Каз бәбкәсе: Безгә зур үсәр өчен,

                       Йөгереп уйнарга кирәк.

Автор: Башка кошлар керә

Ана каз: Ягез, балалар, тату гына уйнагыз, яме!

Әтәч: Мин сезне койма башыннан карап торам.

Автор: Балалар йөгерешеп уйныйлар.

Тавык чебие: Мин арыдым. Әйдә бүтән уен уйныйк әле.

Каз бәбкәсе (үрдәк малаен җитәкләп): Әйдәгез, чума үрдәк, чума казны уйныйбызмы?

Күркә чебие: Ә мин йөзә белмим, чумарга куркам.

Үрдәк малае: Юююк, берәү дә чумарга җыенмый, уен бит ул.

Каз бәбкәсе: Я, әйдәгез, кара-каршы басабыз.

“Чума үрдәк, чума каз” уены

Автор: Үрдәк малае күбәләк куып чыгып китә. Башка кош-кортлар таралышырга өлгерми, әтәч кычкыра башлый.

Әтәч: Кикрикүүүк, кикрикүүүк!!! Төлке килә, качыгыз!

Автор: Барлык кошлар да качып бетәләр, каз бәбкәсе генә, барыр урын тапмый, басып кала.

Төлке: (ипләп кенә килә) Әһәә, эләктеңме, менә нинди йомшак син!!! (каз бәбкәсен эләктереп тә ала). – хәзер мин синнән аш пешереп ашыйм!

Каз бәбкәсе: (төлкедән ычкынырга теләп) Коткарыгыз, коткарыгыз, ярдәм итегез!!!

Автор: Кошлар башларын сузып-сузып карыйлар, чыгарга куркалар.

Төлке каз бәбкәсен алып китә.

Үрдәк малае килеп чыга, каз бәбкәсен эзли

Үрдәк малае: Дустым, син кая? Дустым?!

Әтәч: (күңелсезләнеп) Каз бәбкәсен төлке эләктерде. Без аңа ярдәм итә алмадык, курыктык. Ул аны урманга алып китте.

Үрдәк малае: Эх, дустым!..Ничек кенә сиңа ярдәм итим икән?..(бераз уйлап тора)  -мин сине эзләп табам, мин сине коткарам, - дип чыгып китә.

Автор: Читтәрәк агач төбендә куян калтыранып утыра.

Үрдәк малае: Исәнме, куян, син төлкене күрмәдеңме? Ул минем дустымны тотып, урманга алып китте.

Куян: Исәнме, күрдем, ул әнә шунда китте. (күрсәтә)

Үрдәк малае: Рәхмәт, куян.

Автор: Үрдәк малае юлын дәвам итә, керпене очрата. Керпе агач төбендә кәрзиненә алма җыя.

Үрдәк малае: Исәнме, керпе, син төлкене күрмәдеңме?

Керпе: Исәнме! Күрдем, ул әнә тегендә, өендә.

Үрдәк малае: Ярдәм ит зинһар, дустымны коткарырга булыш!

Керпе: Мин сиңа ярдәм итәм, әйдә минем арттан.

Автор: Төлкенең өе янына киләләр, үрдәк малае качып тора, керпе ишек шакый

Керпе: Төлке, төлке, тиз бул ,чык, балыксыз каласың, анда аю барлык җәнлекләргә дә балык өләшә.

Автор: Балык сүзен ишетеп, төлке чыгып чаба.

Каз бәбкәсе: Рәхмәт сезгә, мине коткардыгыз!

Үрдәк малае: Рәхмәт, керпе, ярдәмең өчен!

Автор: Керпегә кулларын болгап чыгып китәләр.

Керпе: Әйее, дус кайгыда сынала дип юкка гына әйтмиләр шул!