Организованная образовательная деятельность по развитию речи в младшей группе «Домашние животные"
план-конспект занятия по развитию речи (младшая группа)

Эшчәнлек барышы.

Тема: “ Йорт хайваннары “

Бурычлар:Танып белү.

1.балаларның йорт хайваннары турындагы белемнәрен киңәйтү;

2. хайваннарның исемнәрен әйтергә күнектерү;

3. йорт хайваннарына карата кызыксыну тәрбияләү;

Сөйләм телен үстерү.

1. сүзләр хисабына сүзлекне баету һәм активлаштыру, тәрбияченең сорауларына җавап бирү;
2. мөстәкыйльлек һәм активлык күрсәтү теләген үстерү, тәрбияче күрсәтмәләрен үтәү осталыгы формалаштыру;
3. башкаларга ярдәм итү теләге, тыңлаучанлык, хайваннарга карата кайгыртучанлык тәрбияләү;

Сәламәтлек.

1. төз утырырга төз басып торырга күнектерү;
2. физкультминутка аша хәрәкәт эшчәнлеген ныгыту;

Сүзлек өстендә эш: бозау, бәрән, колын, кәҗә бәтие.

Индивидуаль эш: Мәлик, Максим тәрбияче артыннан сүзләрне дөрес итеп кабатлау.

Җиһазлар: тартмага салынган уенчык сыер, сарык, ат, кәҗә, бозау, бәрән, колын, кәҗә бәтие; йорт хайваннары сурәтләнгән рәсемнәр; “ Без атларны яратабыз” жырының аудиоязмасы.

Эшчәнлек барышы.

Тәрбияче: Балалар, әйдәгез әле, килгән кунаклар белән исәнләшик әле.

Балалар: Исәнмесез!

Тәрбияче:                               Әйдәгез, дуслар,җыелыйк,

Җитәкләшеп тезелик.

Түгәрәктә бергәләп

Күңелле уйныйк, көлик!

Зурлар безгә соклансын,

Читтән карап торсыннар,

Безнең дуслыкка сөенеп,

Бертуган дип белсеннәр.

Т.: Балалар, әйдәгез әле, без сезнең белән авылга кунакка кайтыйк. Көн матур,кояш елмая, күңелләр күтәренке.Автобуска утырыйк.Киттек. ( Автобуста барган кебек йөриләр.) Менә авылга да кайтып җиттек.  Балалар, бу безнең ишегалды.Ишегалдында йорт хайваннары бар. Әйдәгез әле, аларны карыйк. Зәринә, бу нәрсә?

Б.: Сыер.( Балалар һәрбер хайванны шулай атап чыгалар.)

Т.: Балалар, хайваннар балаларын югалтканнар икән. Әйдәгез, аларны табарга булышыйк әле. Булышабызмы?

Б.: Әйе.

Т.: Урамда хәзер яз.  Яз көне табигатьтә нинди үзгәрешләр була?

Б.: Кояш җылыта, кар эри, тамчылар тама.

Т.: Әйе, кояш җылыта, кар эри, яшел үләннәр чыга. Сыер, сарык, ат, кәҗә дә, яз килгәнен сизеп, үзләренең балаларын яшел чирәм ашарга алып бармакчы булганнар. Ә алар әниләрен көтеп тормаганнар, каядыр китеп югалганнар. Балалар, әниләргә әйтмичә генә китәргә ярыймы?

Б.: Юк.  

Т.: Әйе, әниләргә әйтмичә, бер җиргә дә китәргә ярамый. Менә хәзер сыер, сарык, ат, кәҗә балаларын югалтканнар да елыйлар да елыйлар. Әйдәгез, аларга балаларын табарга булышабызмы?

Б.: Әйе.

Т.: Әйдәгез, эзли башлаганчы , балалар,  ял итеп алыйк.

Физкультминутка: “ Без шулай ял итәбез”

Т.: Ә хәзер, әйдәгез, хайваннарның балаларын эзләп карыйк әле, бәлки, табылырлар. Кая киткәннәр икән алар, әниләренә әйтмичә! Менә нинди тыңлаусызлар! ( Тәрбияче һәм балалар бүлмә буйлап йөриләр һәм бозау, бәрән, колын, кәҗә бәтиен ширма артыннан табалар.) Менә алар! Сез адаштыгызмы? Әниләрегезне эзлисезме? Әниләрегезнең нәрсә икәнен әйтсәгез, балалар сезгә аларны табып бирерләр. Аида, кил әле, бозаудан сора әле, аның әнисе нәрсә икән? Аида, әйдә, бергәләп сорыйк:”Бозау, синең әниең бармы? Ул нәрсә?”

Б.: Сыер.

Т.: Бозау син әниеңне ничек чакырасың?

Б.: ” Му-му-му!”

Т.: Балалар, әйдәгез, бозау белән бергәләп аның әнисен чакырабыз.

Б.: “ Му-му-му! “

Т.: Булдырдыгыз! Мәлик, хәзер бозау белән бергәләп кабатлагыз әле: “ Му-му-му! Кайтсын минем бозау!” ( Балаларны  активлаштыру.Индивидуаль һәм күмәк кабатлаулар. Тәрбияче балаларга сарыкны күрсәтә.) Балалар , бу нәрсә?

Б.: Сарык.

Т.: Балалар, сарык: “ Бә-бә-бә! Тимәгез минем бәрәнгә!”-ди. Сарык нәрсә ди?  Сарык нәрсә эзли?

Б.: Бәрәнне.

Т.: Монда тагын нәрсә бар ? Әйе, ат. Ул болай ди:” Миһа-һа-һай, колынкаем, кил монда!” Әйдәгез, бергәләп кабатлыйк әле, бәлки, колын табылыр. ( Тәрбияче кәҗәне күрсәтә.) Балалар бу нәрсә?

Б.: Кәҗә.

Т.: “ Ми-ки-ки-ки, күрмәдегезме сез минем йонлач бәтине?” Әйдәгез, балалар бергәләп кабатлагыз әле. Балалар, кәҗә нәрсә эзли?

Б.: Кәҗә бәтиен.

Т.: Балалар, әйдәгез, бозауны, бәрәнне, колынны, кәҗә бәтиен әниләре янына куйыйк. Кабат беркайчан да әниләрегез яныннан читкә китмәгез! Бозау, бәрән, колын, кәҗә бәтие, бүтән беркайчан да әниләрегезне югалтмагыз. Югалтмас өчен , әниләрне тыңларга кирәк. Балалар, сыер, сарык, ат, кәҗә һәм бозау, бәрән, колын, кәҗә бәтие сезгә рәхмәт әйтәләр. Сез аларга зур ярдәм иттегез, бер-берсен табарга булыштыгыз. Бозау, бәрән, колын, кәҗә бәтие табылдылар. Ә хәзер  өйгә керик, бик арыдык, чәй эчеп алыйк. Әйдәгез, балалар, чәй әзер булганчы уйнап алсак та ярый. “ Без атларны яратабыз” уенын уйныйк.

Атларны без яратабыз,

Чистартабыз, ашатабыз.

И атым, атым, тукта,

Чиста су бирәм сиңа.

Атларны оста җигәбез,

Йөгәнләп тота беләбез.

И киттек без, атлылар,

Атлы кыю батырлар.

Т.: Афәрин, балалар! Сез бүген мине шатландырдыгыз. Сезгә дә шатлык-сөенечләр телим.

Физкультминут.

“Без шулай ял итэбез.”

Без әле бераз арыдык,

Ял итәргә уйладык.

Башны иябез алга,

Ә аннары – артка.

Уңга, сулга борабыз,

Аннан карап торабыз.

Иң өсләрен сикертәбез,

Кулларны биетәбез.

Бер алга, бер артка сузып,

Куңелле ял итәбез.