Татарстан Республикасы көне
план-конспект занятия

Татарстан Республикасы көне.

Белем бирү өлкәсен интегральләштерү: физик тәрбия, сәламәтлек, куркынычсызлык, социализация, хезмәт тәрбиясе, танып белү, коммуникация, матур әдәбият уку, сәнгати иҗат, музыка тәрбиясе.

Максат: Туган илгә чын күңелдән бирелгәнлек хисе тәрбияләү. Герб, флаг турында белем бирүне дәвамитү. Балаларның Татарстан турында белемнәрен үстерү.

Методик алымнар: әңгәмә, күрсәтү, аңлату, сорау, нәфис сүз, бию.

Җиһазлау: Татарстан гербы, флагы төшерелгән рәсем, Казан шәһәре турында альбом, рус, татар милли киемнәре.

Татарча-русча сүзлек: герб – тугра, флаг – байрак.

Мөстәкыйль эш: гербның төсләрен ныгыту. (Гүзәл, Аделина, Камил)

Алдан эшләнгән эш: Казан шәһәренә, Татарстанга, Туган илгә карата шигырьләр ятлау; рус, татар, чуваш биюләрен өйрәнү.

Әдәбият: “Гөлбакча”, “Иң матур сүз”.

Белем бирү эшенең төзелеше:

1. Татарстан турында сөйләшү, Казан рәсемнәрен карау.

2. Герб, флаг – алардагы сурәт, төсләр турында сөйләү.

3. Сүз байлыгын үстерү.

4. Милли киемнәр карау.

5. Казан, Татарстан турында шигырьләр уку.

6. Татар, рус, чуваш биюләре бию.

Белем бирү эшенең эчтәлеге:

Тәрбияче: Туган җир, туган йорт, туган шәһәр, Ватан! Болар – җанга иң якын сүзләр. Татарстан Республикасы Идел һәм Кама елгалары кушылган урында урнашкан.

Без нинди Республикада яшибез?

Балалар: Без Татарстан Республикасында яшибез.

Тәрбияче: Безнең республикабызның баш шәһәре нинди шәһәр?

Балалар: Республиканың баш шәһәре – Казан шәһәре.

Тәрбияче: Казан шәһәре бик матур шәһәр. Аның 1000 еллыгын билгеләп үттеләр. Казан шәһәренең күренекле, истәлекле урыннары бик күп. Мин сезгә рәсемнәр күрсәтәм. (Рәсемнәр карау).

Тәрбияче: Балалар, 30 август көнен Татарстан Республикасы көне итеп билгеләп үтәләр. Бу көнне шәһәрләребез төрле матур чәчәкләргә төренә. Бу – Татарстан Республикасының байрагы (флагы). Флагтагы яшел, ак, кызыл төсләр нәрсәне белдерә соң? Хәзер шул турында Фәнис Яруллинның “Татарстан байрагы” дигән шигырен Ш.Камилә сөйләп китәр.

Бала: Җилфер-җилфер итә байрагыбыз,

           Ниләр сөйли соң ул җилләргә?-

           Көрәшүче татар халкыннан ул

           Сәлам әйтә азат илләргә...

           Өч төс балкый безнең бу байракта:

           Ак төс – безнең намус төсебез.

           Яшел төсе – безнең яшәү төсе.

           Кызылында чагыла көчебез.

Тәрбияче: Ә монсы – Татарстан Республикасының гербы. Татарчасы- тугра. (Балалардан кабатлату). Татарстан Республикасы гербы байрагыбыз төсләрендә. Барс – уңыш һәм үрчем символы.

Татарстан Республикасы халык саны ягыннан иң зур республикаларның берсе. Туксаннан артык милләте бар. Без нинди милләттән?

Балалар: Татар милләтеннән.

Тәрбияче: Хәзер без сезнең белән милли киемнәр карап китәрбез. Бу курчаклар нинди киемнән?

Балалар: Татар милли киеменнән.

Тәрбияче: Өсләренә нәрсәләр кигәннәр?

Балалар: Малай күлмәк, чалбар, камзул, түбәтәй, читек. Ә кыз бәбитәкле күлмәк, алъяпкыч, чигүле яулык, читек.

Тәрбияче: Әйе, бу курчаклар татар милли киеменнән.

Балалар: Рус халык киеменнән. Малай чалбар, күлмәк, кепка. Ә кыз сарафан, какошник кигән. (Балалардан кабатлату).

Тәрбияче: Хәзер, балалар, Казан, туган ил, Татарстан турында шигырьләр тыңлап китәрбез.

1 бала:                     Казан

                         И нурлы Казан-

                         Туган ил төсе,

                         Синең ташларда

                         Бабайлар эзе.

             И якты Казан,

             Синең нурларың

             Кыйбласы безнең

             Озын юлларның.

                                  Хәсән Туфан

2 бала:           Туган җирем – Татарстан.

             Идел ярларына нурлар сибеп,

             Матур булып ата бездә таң.

             Таң шикелле якты туган илем,

             Бәхет биргән җирем- Татарстан.

                                 Гөлшат Зәйнәшева

3 бала:               Минем бакчам.

             Иркен һәм матур да

             Безнең туган илебез.

             Урманга бай, суга бай

             Гөлбакчалы җиребез.

                                 Әминә Бикчәнтәева

Тәрбияче: Рәхмәт, балалар, хәзер сезгә зурлар төркеме татар биюен биеп китәрләр.

Зурлар төркеме татар, рус, чуваш биюләрен бииләр.