Эки адару
материал по художественной литературе (младшая группа)

Эки адару 

Озодо Алтайда jердиҥ Кара адарузы ла айылдыҥ Сары адарузы jуртаган эмтир. Jердиҥ Кара адарузы бай jаткан, айылдыҥ Сары адарузы jокту jаткан. 

Бир катап курт-коныстыҥ кааны jылан эл-jонныҥ jадынын кӧрӧргӧ атанган. Не-немеге танытпаска тегин jылан болуп кубулып алган. 

Эҥ ле озо ол Кара адаруныҥ айлына кирди. Тегин jылан болуп кубулган каан jыланды Кара адару таныбады. Ол айылчыны кӱндӱлеерге курсак-тамагын кысканып турды. 

Кандый jадырыҥ, Кара адару? – деп, jылан сурады. 

Кара адару айы-бажы jок комыдай берди: 

- Jаантайын коркышту кӧп, коркышту уур иш иштейдим, ичим торо, айлым куру, курсагым ас, айылчы кӱндӱлеер аргам jок. 

- Айтканынча ла jат - деп, jылан айдала, jӱре берди. 

Jылан оноҥ ары барала, Сары адаруга кирди. Кубулала келген jыланды ол база таныбады. Jе солун айылчыга бары-jогын ӱзе ле салды. 

- Кандый jадырыҥ, Сары адару? – деп, тойгон-канган jылан сурады. 

- Бала-баркамныҥ кӧби коркыш, нак та, иштеҥкей де, а jиген ажым-тожымныҥ тогы сӱреен, jаткан jуртым ӧҥжук – деп, Сары адару айтты. 

- Салымыҥ санааҥды ээчизин, jадыныҥ тилиҥди ээчизин, айтканыҥча ла тойу-ток jат, бала- баркаҥ иштеҥкей деп, эл- jон мактазын. 

Мынайда каан jылан Сары адаруны алкайла, jӱре берди. 

Оноҥ ло бери Сары адару иштеҥкей, сӧс уккур, нак балдарлу болды, айылы-jурты байыды, jиир курсагы тӱгенбес, канча jылдарга ӱрелбес болуп, аргалу чакту jуртай берди. 

Каан jыланга каргаткан Кара адару дезе jалбагынаҥ jадар jалку болды. Конор уйазы тежик, jиир курсагы jок, оныҥ учун Алтай ӱстин аралап, jаантайын учуп jӱрет. 

Балдар, качан да болзо, бар болзо – jок деп карамданбагар. Jок болзо jок, деп комыдабагар.