Уенчыклар кибетендә
план-конспект занятия (младшая группа) на тему

             Уенчыклар кибетенә сәяхәт.

Балаларның яше: 2-3 яшь

Эшчәнлекнең төрләре: коммуникатив, уен, музыкаль сәнгать, танып белү, продуктив эшчәнлеге.

Максат: музыка һәм уен эшчәнлеге аша балаларның уенчыклар турында белемнәрен ныгыту.

Бурычлары:

Белем бирү - сүзлек байлыгын үстерү, түгәрәк буенча бер-бер артлы йөрергә өйрәтү.

Үстерү - балаларның музыкага туры китереп хәрәкәтләрен һәм җырлау сәләтләрен үстерү.

Тәрбияләү – балаларның транспортта үз-үзләрен дөрес тоту кагыйдәләрен тәрбияләү, уенчыкларга сакчыл караш, балаларда дуслык хисләрен тәрбияләү.

Тәрбияче: Балалар, бүген без сезнең белән “Уенчыклар” кибетенә барабыз.

Ә нәрсәгә утырып барабыз?(автобуска) Автобуска утырып барабыз.

                              “Күңелле сәяхәт” җыры яңгырый              

Тәрбияче: Менә без килеп тә җиттек. Автобустан төшәбез.

Карагыз әле, балалар,” Тылсымлы Уенчыклар” кибете. Монда сатучы апа юк, ә уенчыклар бигерәк тә күп! Күпме, балалар?

Балалар: Әйе, күп.

Тәрбияче: Бу нәрсә? Бу куян. Куян нинди?

Балалар: Куян матур, йомшак, кечкенә, ак төстә.

Тәрбияче: Без “Ак куянкай” уенын уйнап алабыз.

                       “ Ак куянкай” җырлы-биюле уен

                        Ак куянкай утыра

                        Колакларын селкетә,

                           Менә шулай, менә шулай

                           Колакларын селкетә.

                           Аңа тик тору кыен,

                           Җылыта ул тәпиен,

                           Менә шулай, менә шулай

                           Җылыта ул тәпиен.

                           Куян тик торса туңа,

                           Сикергәли ул шуңа,

                           Менә шулай, менә шулай

                           Сикергәли ул шуңа.

Тәрбияче: Бу нәрсә? Бу туп. Туп нинди?

Балалар: Туп матур, зур, түгәрәк.

Тәрбияче: Ә хәзер туп турында җыр җырлыйбыз.

                                           “Туп” җыры

                                    Туп! Туп! Матур туп,

                                  Сикер, сикер, матур туп!

                                     Бер! Ике! Бер! Ике!

                                   Сикер, сикер, матур туп.

Тәрбияче: Балалар, әйдәгез туплар кебек сикереп алабыз(балалар сикерәләр)

Тәрбияче: Карагыз, кемдер безгә елмаеп карап утыра. Бу нәрсә? Бу курчак?

Курчак нинди?

Балалар: Курчак матур, чиста. Курчакның күзләре, колаклары, куллары, аяклары бар.

Тәрбияче: Карагыз, курчакның тик утырасы килмий. Курчак сезнең белән биергә тели.

                                     “Курчак белән бию”

                                       Курчак биергә тели,

                                       Үзенә иптәш эзли.

                                        Алсу янына килә,

                                        Матур итеп баш ия.

Тәрбияче: Балалар, карагыз, ниндидер тартма тора. Ә тартмада пазллар ята.

Әйдәгез әле, тәртипкә китерик. Пазлларны дөрес итеп җыеп алыйк.

(балалар пазлларны җыялар)

Тәрбияче: Ә хәзер кибеттән уенчыкларны алып, кире балалар бакчасына кайтырбыз. Нәрсәгә утырып барырбыз? Автобуска утырып!(тезелеп утыралар)

                                   “Күңелле сәяхәт” җыры яңгырый

Тәрбияче: Менә балалар бакчасына да килеп җиттек. Балалар, сезгә уенчыклар кибетендә охшадымы?

Балалар: Бик охшады.