Сабантуй в детском саду с участием родителей
методическая разработка (подготовительная группа) по теме

                     “ Сабантуй бәйрәме”

Бәйрәм  буласы мәйдан бәйрәмчә бизәлә. Балалар бүләкләр җыялар. Бүләкләр  җыелып беткәч, балалар  мәйданга җыела.Уртага ике алып баручы чыга.

1 алып баручы: Шатлыклар күңелебездә

                              Ал кояш күгебездә

                              Килегез деслар кунакка:

                              Сабантуй бүген бездә

2 алып баручы : Җилферди чиккән сөлгеләр

                               Бүләкләр күбебездә

                               Көрәшик тә , узышыйк та

                               Сабантуй бүген бездә.

1 алып баручы: Без җырлыйбыз Сабантуйда

                              Иң матур  җырлар сайлап

                              Безнең  җырга зәңгәр күктән

                              Кошлар кушыла сайрап.

 Бала:

                           Җыр “Күнелле безнең  сабантуй”

          Г.Зәйнәшева сүзләре, Л. Батыр – Болгари музыкасы.  

1 алып баручы : Кадерле балалар, хөрмәтле кунаклар! Хәерле кич ! Бүген без татар халкының олы бәйрәме – Сабан туена җыелдык.Сабантуй ул – хезмәт бәйрәме.Сабантуй ул – дуслык бәйрәме.Сабантуй ул – һәркемнең көтеп алган изге бәйрәме!

2 алып баручы: Аның бик  борынгыга киткән тамырлары бар. Шуңа ул буыннардан буыннарга күчеп  яши, һаман яшь,  һаман матур булып кала бирә. Котлы булсын Сабан туйлары! Кадерле балалар, сезгә тыныч балачак , ныклк сәламәтлек  телибез! Алдагы көннәрегез  дә бүгенге кебек ямьле, күңелле  булсын! Өстәлләрегездә ризыклар мул булсын.

              Кашыкчылар ансамбле “Татар көйләренә тезмә”

Кыз бала :   Чәчәккә күмелгәч тугайлар

                     Июньнең  иң матур көнендә

                     Болынның иң матур җиренә

                     Килегез Сабантуй күрергә!

Малай бала: Күңелле Сабан туйлары,

                      Бүген бәйрәм, зур бәйрәм

                      Матур җырлар  җырлый- җырлый

                      Уйныйбыз әйлән- бәйлән.

1 алып баручы: Балкып тора түбәтәйләр

                         Энҗе бөртекләре белән

                         Алар монда килгән гүя

                        Чын  әкият иленнән.

                             Җырлы- уен “Түбәтәй”.

2 алып баручы: Сабан туенда уеннар

                         Төрле була, күп була.

                         Уеннарсыз сабан туе

                          Булмаган да күк була.

Тәрбияче: Кемнәр өлгер, кем җитез

                  Минем янга килегез.

                  Әйдә, карыйк ярышып -

                  Капчык киеп чабышып.

                   “Капчык киеп йөгерү.”  

Тәрбияче:  Мактана дип  уйламагыз

                   Мин урынлы мактанам

                   Чөнки менә бу чүлмәкне

                    Күрмичә дә ваталам.

                     “Күз бәйләп чүлмәк вату.”

Тәрбияче: Кашык кабып йөгерәм дип,

                  Мактанырга ашыкма.

                  Ә син менә йөгереп кара

                  Күкәй салып кашыкка.

                     “ Кашыкка күкәй салып йөгерү. “

Мәйданга этешә - төртешә Камырша белән Батырша керә.

Икесе бергә : Исәнмесез балалар ! Исәнмесез кунаклар!

Камырша: Таныш булыйк. Бу минем туганым Батырша була.

Батырша: Ә бу минем җан дустым Камырша.

Алып баручы:Безнең бәйрәмгә килүегезгә зур рәхмәт , кунаклар. Әйдәгез, бергәләп күңел ачыйк. Уеннар  уйныйк. Узышыйк та, көрәшик тә.

Камырша: Я, йөгерә кайсыгыз,

                   Зур кәлүш киеп

                   Курыкмагыз, егылудан,

                   Йөгереп артта калудан

                   Ансыз булмый Сабантуй

                   Колагыңа киртләп куй.

                    “ Кәлүш киеп йөгерү.”  

1 алып баручы: Сабантуй елга бер килә,

                         Күңелле олы бәйрәм!

                         Нур өстенә нурлар сипсен

                         Биеп алыйк,ичмасам!

                          Татар халык биюе.

Батырша: Балалар , ә сез бәйрәмгә шигырьләр өйрәндегезме?

Ф.Яруллин “Сабантуй”

Бала: Бүген бездә Сабантуй

          Эшләреңнең барын куй.

          Тизрәк йөгер мәйданга

          Бәйрәм башлана анда.

                         Булмаса Һөнәрегез

                         Читтән карап йөрегез

                         Картлар чүлмәк ватканын

                         Көрәшчеләр  бер – берсен

                         Җилкә аша атканын.

          Карасагыз  - бәйрәм бар,

          Сусасагыз - әйрән бар.

          Ял итәрсез арсагыз

          Үкенмәссез барсагыз.

Э.Шарифуллина”Сабантуй”

Бала: Сабантуймы, сабантуй-

          Уеннар туе бит ул,

          Тәм – томнар сые бит ул,

          Җиңүчеләр уе бит ул.

                         Чаптар өстендә чабып,

                          Катыктан тәңкә табып,

                          Колга башына менеп,

                          Узышлыга йөгереп

                          Һәм татарча көрәшеп

                          Аркан белән сөйрәшеп

                          Ватмый йомырка ташып,

                          Тапкырлыкта сынашып

          Җиңсәң әгәр

          Сабантуй

          Эчкә шатлык

          Сыймас туй!  

Батырша: Булдырдыгыз балалар ,нинди матур шигырьләр ятлагансыз.

Камырша: Балалар, безгә берәр матур җыр җырлап күрсәтегез әле.              

                Җыр “Сабан туе” М.Садри сүз. татар халык көе.    

Камырша: Менә сиңа сулы чиләк

                  Көянтә ал иңеңә.

                  Йөгер тизрәк, иң алдан кил,

                  Егыла гына күрмә!

            “ Көянтә - чиләк белән су ташу” (балалар аерым, өлкәннәр аерым уйный)

Батырша: Булдырдыгыз! Ә без сезгә бүләкләр алып килдек.Камырша, кая соң  безнең бүләкләр белән капчык?

Камырша: Мин белмим, син бит аны күтәреп бара идең?

Батырша: Эх, кайда онытып калдырдым микән инде тагын?(башын кашып )

Камырша белән Батырша капчык эзлиләр.

Олы капчык тартып алып киләләр.

Камырша: Менә капчык та табылды бит! Хәзер без аны чишеп карыйк.

Капчык селкенә башлый.

1 алып баручы: ай-яй, сезнең капчыгыгыз тылсымлы бугай?

Батырша: чынлап та безнең капчык белән нәрсәдер булган?(бер – берсенә карашалар).

Камырша:Батырша! Капчыкны барыбер ачып карарга кирәк.

Капчыкны ачуга аннан Шурәле сикереп чыга.

Батырша: карагыз әле, бу ниндидер дию пәрие.

Шурәле: мин дию пәрие түгел ,мин Шурәле.Иң матур, иң акыллы , иң зирәк.(Кесәсеннән көзге алып үзен карый).Ә сез мине таныдыгызмы кадерле дуслар?  Мине шундый күңелле бәйрәмгәдә чакырмагансыз.Шуның өчен мин сезнең бәйрәмегезнең ямен җибәрәм.Бүләкләрегезне яшердем инде. Ә хәзер бөтенегез белән кети- кети уйныйм.

Камырша : Кара әле Шурәле. Безнең  бүләкләрне хәзер үк бир!

Шурале: ха-ха-ха. Мин бит иң акыллы , зирәк , көчле Шурале.

Батырша:Әйдәле Шурәле көч сынашып карыйк. Алып кил Камырша арканны.

Шурале белән Батырша көч сынашалар.

(Шурәле җиңелә, җиргә егыла).

Батырша: кем җиңде балалар?

Балалар ........

1 алып баручы: син Шурәле  мактанчык кына икән.

Шурәле (елап сөйли) мин бит үземне иң көчле дип саный идем, ә  батырша мине җиңде. Ләкин  мин иң акыллы!

Камырша: тагын мактанасыңмы?

Шурале: юк,юк.  Сез мине гафу итегез инде. Минем дә сезнең белән бергә бәйрәм итәсем ,күңел ачасым  килә.Ә капчыгыгызны мин әнә теге агач артына яшердем.

2 алып баручы: калдырабызмы Шуралене?

Балалар.............

1 алып баручы: Шурале , ә син безнең белән уйныйсың мы?

Шурале: бик шатланып уйныйм .Менә сезгә кашыклар

                                                         Ягез әле, тотыгыз.

                                                          Сабан туенда ярышып

                                                          Бүләк алып китегез.

                  “Кашык белән су ташу уены”( 2 мл.гр)

Тәрбияче : Менә сезгә үткен кайчы,

                   Ягез әле тотыгыз.

                   Сабантуйда күз бәйләп

                    Бүләк кисеп алыгыз.

          “Күз бәйләп әйбер кисү уены”  (ср.гр)

1 алып баручы: Яланнарда сабантуйлар гөрли

                              Яшь егетләр сыза гармунын

                              Уйнаклатып җилләр алып китә

                              Еракларга гармуннар моңын.

   Музыкаль – композиция”Су юлында”

2 алып баручы: Колга тора мәйданда-

                              Биегрәк айдан да

                              Әтәч – колга башында

                              Кызыктыра барысын да.

                  “Колга башына менү”

1 алып баручы: Кемдә нинди һөнәр бар?

                             Йөгерергә кемнәр бар?

                             Кызганмый табаннарны,

                             Урагыз мәйданнарны.

                      “Йөгерү ярышы”.

Батырша белән Камырша: бик күңелле икән сездә! Балалар , сезнең  тагын нинди һөнәрләрегез  бар?

1 алып баручы: Җыр биюсез бер бәйрәм дә

                              Узмый шуны белегез.

                              Балаларыбыз бик булган

                              Концерт карап  китегез

                                               Тыпыр- тыпыр итәсез

                                               Җилдәй җитез үтәсез

                                               Сөбханалла, күз тимәсен

                                               Бигрәк булган икәнсез.

              Җырлы – биюле уен “Челтәр элдем читәнгә”.

Бала: Г.Латыйп “Иртәгә Сабан туе”

            Авыл гөҗ килеп тора

            Килә  безгә кунаклар   

            Районнар, күрше авылдан

            Әллә каян ерактан

                          Урамда бүләк җыялар

                          Сыгыла колга башы

                           Кайчакта такмак әйтешеп

                           Алалар кара –каршы.

           -Әй бүләге, бүләге,

            Атлас икән күлмәге

            Шул бүләкне алам дип,  

            Тибә батыр йөрәге

                           Мактыйлар бүләкләрне

                           Уены- чыны бергә

                           Без ияреп йөрибез

                           Калу юк инде бер дә.

           Урам тулып җыр йөри

           Көндезен , кичен, иртән

           Ник бу сабантуйлары

           Көн саен булмый икән?

1 алып баручы:Малайлар алып килгәннәр

                          Иң җитез юртакларны

                          Үзләре дә сынатмыйлар

                          Читтә торсын атлары.

  Агач атларга атланып “Атлар чабышы “ үткәрелә  .  

Камырша белән Батырша: Бик зур рәхмәт балалар, бик күңелле бәйрәм ясадыгыз , безгә бик ошады, киләсе елга да килербез.     

2 алып баручы: Җырлый – җырлый, бии – бии

                              Бәйрәм иттек бүген дә

                              Яз бәйрәме гөрләп шулай

                               Калсын безнең күңелдә

                               Җәйләр килсен мул булып

                               Иген уңсын кыр тулып

                               Дуслар булсын һәр җирдә

                               Тынычлык булсын илдә.

1 алып баручы: Кадерле балалар, хөрмәтле кунаклар! Барыгызга да саулык – сәламәтлек, гаилә бәхете телибез! Киләсе елга да шулай исән – имин булып мәйдан тутырып җыелерга язсын.

2 алып баручы: Бик күңелле, бик тә рәхәт

                             Дуслар җыелган җирдә

                             Менә шулай бергә-бергә

                             Яшик без туган илдә.

                         “Мин яратам сине Татарстан”   

                        Р. Рәкыйпов сүз. Р. Андреев муз.