"Кулъяулыгым"(кечкенәләр төркемендә эшчәнлек)
план-конспект занятия по окружающему миру (младшая группа)

                           Кулъяулыгым (кечкенәләр төркеме)

Тәрбияче -Балалар кунаклар белән исәнләшик әле.

(нурларсыз кояш күрсәтеп ): - Кояшыбыз бүген нишләптер ямансу.Нишләп икән? Аның нурлары юк икән бит. Әйдәгез, кояш елмаеп балкып торсын өчен без аңа нурларын бирәбез. Ләкин нурларны тылсымлы сүзләр белән бирергә кирәк. (һәр бала 1 тылсымлы сүз әйтә, тәрбияче  нурларны беркетеп бара)

-Балалар менә безнең кояшыбыз да елмайды.Ул һәрвакыт безне шушында җылы нурлары белән иркәләп торсын.(беркетәм)

Шулвакыт бүлмәгә, елап, Куян керә. Аның бите пычранган.

Тәрбияче.Балалар, безгә кем килгән соң? Әйдәгез исәнләшик әле.

Балалар. Исәнме Куянкай.

Тәрбияче.Куянкай син нишләп елыйсың?

Куян.Сезнең янга килгәндә, бер машина пычрак чәчрәтеп китте (битендәге пычракны күрсәтә).

Тәрбияче. Ә сиңа аны кулъяулыгың белән сөртеп алырга кирәк иде.

Куян. Кулъяулыгым юк шул минем. Әни бирергә оныткан.(елый)

Тәрбияче. Нигә үзең сорап алмадың?

Куян. Белмәдем.

Тәрбияче. Елама Куянкай, без сиңа кулъяулык бүләк итәбез. Әйдә, битеңне әйбәтләп сөртик әле.(тәрбияче  Куянның битен сөртә). Ә хәзер балалар, әйдәгез, Куянны матур сүзләр әйтеп юатыйк.

Балалар Куян янына килеп, аны сыйпыйлар, яраталар, матур сүзләр әйтәләр. Куянкай, матурым, йомшагым, аппагым, куркагым, кечкенәм.

Тәрбияче.Менә Куян башка еламый инде.Матур сүзләр ишеткәч, туктады. Ягымлы сүз ишетү һәркемгә дә рәхәт шул. Балалар, ә сезнең кулъяулыкларыгыз бармы соң?(балалар күрсәтәләр)

Балалар. Әйе  бар.

Глафира .Әбием өч яшь тулгач,

           Кулъяулык бүләк итте.

           Кулъяулыгым шундый матур-

          Дулкын, дулкын һәр чите.

Сафия. Кулъяулыгым пөхтә итеп

          Төреп салдым кесәмә.

          Борынымны сөртергә дә

          Кулъяулыгым бик жәл лә.

Альмира. Кулъяулык биргәндә әби:

          -Кызым, чиста йөр, -диде.

          Тыңлармын әбием сүзен,

          Мин бит бик зур кыз инде.

Тәрбияче.Менә безнең кызлар кулъяулыкларын ничек кадерләп йөртәләр. Ә син Куянкай , кулъяулыкны ничек йөртәсен беләсеңме соң?

Куян.Беләм, беләм. Менә шулай итәләр дә кесәгә тыгып куялар.(Йомарлап, кесәсенә тыга)

Тәрбияче. Балалар, Куян дөрес эшләдеме?

Балалар. Юк.Кулъяулыкны башта әйбәтләп төрергә, аннан соң гына кесәгә салырга кирәк.(Тәрбияче Куянга күрсәтә)

Куян.Мин әле кулъяулыклар турында бию дә беләм.

Тәрбияче.Безнең балалар да белә.

Куян.Әйдәгез, алайса, бергәләп биибез.

Балалар “Без яулыклар юабыз” биюен башкаралар.

 Куян.Рәхмәт балалар, сез миңа чисталык, әдәплелек турында бик әйбәт тәрбия бирдегез. Мин башка куяннарга да сезнең киңәшләрегезне барып әйтим әле.Алар да һәрвакыт чиста-пөхтә йөрсеннәр, әдәпле булсыннар.

Тәрбияче. Сау бул Куянкай.

Тәрбияче. Балалар без сезнең белән бүген Кояшны да терелттек, Куянга да булыштык, биедек тә. Шигырь дә сөйләдек. Һәрвакыт кулъяулык чиста, пөхтә булып, ә без үз чиратыбызда әдәпле, тәрбияле балалар булсак иде. Безнең дә төркемебезгә кайтыр вакытыбыз җитте. Кунаклар белән саубуллашыйк.