Беренче сыйныф баласының әти-әнисенә киңәшләр
консультация на тему

I сыйныф баласының әти-әниләренә киңәшләр

Баланы йокыдан тыныч кына уятыгыз. Күзләрен ачуга, ул сезнең елмаюыгызны күрергә, йомшак тавышыгызны ишетергә тиеш.

Баланы мәктәпкә ашыктырмагыз. Сезнең бурычыгыз – вакытны дөрес  бүлү.

Баланы мәктәпкә ашатмыйча озатмагыз. Өйдән чыгып киткәндә аңа уңышлар теләп калыгыз.

“Бүген син нинди билге алдың?” дигән сорауны онытыгыз. Баланы тыныч кына каршы алыгыз. Аңа хәл алырга мөмкинлек бирегез.

Әгәр бала кирәгеннән артык ярсыган булса, фикерләрен сезнең белән уртаклашырга теләсә, кулыгызны селтәмәгез, аны тыңлагыз.

Әгәр бала кәефсез булса, берни дә дәшмәсә, төпченмәгез, соңыннан ул үзе барысын да сөйләп бирер.

Укытучының тәнкыйть сүзләрен тыңлап, балага ачуланырга ашыкмагыз. Әңгәмәне бала катнашыннан башка алып барырга тырышыгыз, ике якны да тыңлагыз, бу сезгә хәлне ачыграк аңларга ярдәм итәр.

Мәктәптән кайтуга, баланы дәрес әзерләргә утыртырга ашыктырмагыз. Аңа 2-3 сәгать ял кирәк.

Дәрес әзерләгәндә бала янында утырмагыз. Балага мөстәкыйль эшләргә мөмкинлек бирегез.

Гаилә әгъзаларының бала белән аралашуында бердәмлек саклагыз. Фикер каршылыкларын бала катнашыннан башка хәл итегез.

Шуны онытмагыз: уку елының беренче дүрт атнасы, икенче чирек ахыры, кышкы каникуллардан соң беренче атна, дүртенче чирекнең уртасы бала өчен иң катлаулы, тиз арый торган чор.

Баланың: “Баш авырта, арыдым, үземне начар хис итәм”, - дип зарлануларына игътибарлы булыгыз. Болар – укудагы кыенлыклар нәтиҗәсе.

Хәтта “зур” балалар да йокларга ятар алдыннан әкият, җыр тыңларга, баштан сыйпатырга ярата. Бу аларны тынычландыра, киеренкелекне бетерергә, тыныч йоклап китәргә мөмкинлек бирә.