Иң күңелле көн
план-конспект занятия (старшая группа)

                                                                           Сабирова Чулпан Ризван кызы,

                                                                            Саба районы Сатыш авылы

                                                                            “Кояшкай” балалар бакчасы

                                                                             тәрбиячесе

                                        ИҢ КҮҢЕЛЛЕ КӨН

                   ( Балалар бакчасында туган көн бәйрәме )

         Зал бәйрәмчә бизәлә.Музыка яңгырый.2 алып  баручы чыга.

1 А.б.: Хәерле көн,кадерле балалар!Кәефләрегез ничек? Сезнең шат йөзләрегезне күргәч, сөекле шагыйребез Г.Тукайның менә бу шигыре искә төшә:

         Бар күңеллелек бөтен дөньяда, бар бер ямь бүген,

         Нәрсәдән бу?-Мин беләм: бәйрәм бүген, бәйрәм бүген!

Әйе, бүген бездә бәйрәм-Туган көн бәйрәме!Иң күңелле көн ул! Чөнки күп кунаклар килә,тәмле ризыклар белән өстәл әзерләнә,бүләк бирәләр.

2 А.б.: Әйе, балалар, сезнең һәрберегезнең туган көне өйдә матур итеп уздырыла.Әйдәгез, бүген бездә дә шундый матур бәйрәм уздырыйк әле!

1 А.б.: Без сезне, балалар, һәрберегезне бәйрәм белән котлыйбыз! Акыллы, тәртипле, әти-әнинең сүзләрен тыңлаучылар, аларга булышучылар булып үсегез!

2 А.б.:Балалар,сез берәр тавыш ишетмисезме? Ишек шакыйлар түгелме?

1 А.б.: Кем бар анда?

Залга Белмәмеш килеп керә.

Белмәмеш: Исәнмесез! Мине таныйсызмы? Мин-Белмәмеш булам.Бу “Кояшкай” балалар бакчасымы? Сездә туган көн бәйрәме дип ишеткән идем.

Мине дә катнаштырыгыз әле.

2 А.б.: Әйдә,рәхим ит,Белмәмеш.Безнең балаларыбыз бик тәртипле, бик акыллы. Алар белән бергә күңел ачарсың.

Белмәмеш:Рәхмәт!

1 А.б.: Габдрахманова Алия, Шафиков Ислам,Төхбәтов Әлфис апрель аенда үзләренең туган көннәрен билгеләп үтәләр.Аларга уңышлар, сәламәтлек, бәхет телибез.Әйдәгез, бергәләп җыр җырлап алыйк.

           (Җыр башкарыла).

Белмәмеш:Мин сезгә берничә табышмак алып килдем. Җавабын белерсезме икән?

-Типтем-очты биеп-биеп,

  Суга төште- батмады.

Җавап: Туп.

- Ул булса, көн була;

Ул булмаса, төн була.

Җавап: Кояш.

- Ашамый, эчми

Көне – төне эшли .

Җавап: Сәгать.

-Мәкальләр беләсезме икән? Мин бер өлешен әйтәм.Белсәгез, калганын әйтеп бетерегез:

-Аз сөйлә,.........күп тыңла.

Сүз бирдеңме-..........үтә.

Иптәшең үзеңнән............ яхшы булсын.

2 А.б.: Ә хәзер әйдәгез, Габдрахманова Алия, Шафиков Ислам,Төхбәтов Әлфисләрне бирегә чакырыйк.Алар үзләренең сәләтләрен күрсәтсеннәр әле.

                        (Бию,шигырь,җыр башкарыла).

Белмәмеш: Сезгә бик зур рәхмәт!Миңа китәргә вакыт инде.Чыннан да,монда балалар бик тәртипле,сәләтле,оста икән.Кабат бәйрәм белән сезне!

1 А.б.: Үзеңә рәхмәт,Белмәмеш.Безнең белән булганың өчен, бик зур рәхмәт сиңа.

2 А.б.: Ә хәзер әйдәгез күмәк бию башкарыйк.

                       (Бию башкарыла).

1 А.б.: Бәйрәмсез бик күңелсез бит-

            Күңелсездер сезгә дә.

            Бәйрәмнәр кирәк безгә дә,

            Бәйрәмнәр кирәк сезгә дә,

            Кирәк һәммәбезгә дә!

2 А.б.:Бәйрәмнәр бетмәс берчак та,

            Балачаклар бар чакта.

            Зур бәйрәм-җырлап алсак та,

            Җәйге кояшта янсак та,

             Походларга барсак та.

1 А.б.:Бәйрәмнәр бездә җитәрлек,

          Үзе бәйрәм-балачак!

          Балачакның шат җырлары,

           Мәңге истә калачак!

          Бәйрәмнәр бик күп болай да,

          Ә шулай да,ә шулай да

          Иң шәп бәйрәм-балачак!

 2 А.б.:  Кичәбез ахырына якынлаша.        

1 А.б.: Ә хәзер барыгызны да чәй табынына чакырабыз.

                            (Чәй эчәләр).

               Кичә төрле  балалар уеннары белән дәвам итә.