Кампус "Ая ганга"

Зохеохы зорилготой кампус «Ая ганга»

2019 оной декабрь һарада Хоца Намсараевай нэрэмжэтэ Хэжэнгын дунда һургуули 8.7 млн түхэригэй грант шүүбэ гэһэн баяртай мэдээн ерээ һэн. Энэ хадаа Россин эрдэм һуралсалай яаманай “Һуралсал” гэһэн үндэһэн проектын “Цифровая экономика” гэһэн шэглэлэй федеральна грант болоно.Тус конкурсда хабаадахадаа, һургуулиингаа дэргэдэ “Кампус молодежных инноваций “ гэһэн профильна талмай  нээхэ эрилтэ табигдаа бэлэй.

Түсэлэй гол зорилго хадаа үбэлэй амаралтын үедэ хабаадагша үхибүүд тоо бодолгын экономикодо мэргэжэлтэ ёһоор хандаха, дадал шадабаритай болгохо гэһэн байна. Тиихэдэ техническэ урлалгада зохёохы ёһоор хандаха, һонирхол татаха, эрдэм шэнжэлэлгын ажалда дүршүүлхэ арга боломжо олгохо байгаа.

Январиин 3-һаа – 12 болотор “Ая ганга” гэжэ уласхоорондын профильна халаан ажалаа эхилбэ. Эндэ үбэлэй амаралтын үедэ Монголһоо, Буряад оронһоо, нэрлэбэл, Хэжэнгын, Хориин, Ивалгын аймагуудай, Улаан-Үдэ хотын 17, 63, 35, 14, 20, 29 һургуулиинуудай 300-гаад һурагшад хабаадаха арга олгогдобо. Мартагдашагүй һайхан арбан үдэрнүүдые “Ая ганга” кампусай резидентнүүд эрхим һайнаар, һонирхолтойгоор үнгэргэһэн байна.

Түрүүшын үдэрһөө эхилжэ, “Тоогой һэбшээн”- гэһэн хакатоной (һуралсалай) ажал ябуулагдаа. Эндэ ВСГУТУ болон БГУ-гай багшанар менторы, харин Хориин, Хэжэнгын аймагай багшанар тьюторнууд боложо, һуралсалай модульнуудаар хубааржа,  Кампусай резидентнүүдээр ажаллаһан байна.

Резидент бүхэн өөрынгөө дуратай шэглэл шэлэн абажа, тэрэнээ яажа үнгэргэхэ, хамгаалха зорилготойгоо тодорхойлһон байгаа.

Ямар шэглэлнүүд дурадхагдааб гэхэдэ,

• 3D-моделировани;
• Робототехникэ;
• Графическа дизайн;
• “Цифровой  брендинг
• “Цифровой модельер”
• “Динамо”- автохүлэгэй ябадалай хурдадхалга, шэнэ конструкцинуудые зэргэсүүлэн үзэлгэ
• “Зоркий глаз”- харанхы сагта харгы дээрэхи аюулгүй байдал сахихын тула ямар шэнэ юумэ дурадхажа болохоб гэһэн шэглэл.
• “Хэжэнгын аймагай геройнууд” гэһэн социальна захилаар шэнэ сайт зохёолго
• Түсэлэй  мобильна приложени зохёолго;
• Харгын логистико, аймагай газарай дэбисхэрэй карта зохёолгын түсэл болон бусад һонирхолтой шэглэлнүүдээр үхибүүд хүдэлһэн, ухамайлан зохёоһон байна.

Иимэ һуралсалай модульнуудаар үхибүүд хүдэлхэдөө, дабтагдашагүй дүршэл абаһан байна. Бүхэдэлхэйн техническэ оршондо ондоо хүнтэй, тиихэдэ бэе бэетэеэ харилсажа болохоб гэһэн арга олдоо бшуу.

Һурагшадые харахада, сүлөө забдагүй сагынь үнгэржэ, хэһэн ажалдаа дуратайгаар, шуналтайгаар хандаһаниинь элирээ. Үхибүүн бүхэн шэнэ түсэл зохёожо дүүргээд, олоной дунда тэрэнээ хамгаалжа, эгээл эрхимэй тоодо орохоео булта оролдоо.

“Ая ганга” гэһэн уласхоорондын халаанда һурагшадта һуралсалай модульнуудай хажуугаар, элдэб ондоо хэмжээ ябуулганууд үнгэргэгдөө: “Танилсалгын үдэшэ”, бизнес-квест-нааданууд, Агууехэ дайнай илалтын 75 жэлэй ойдо зорюулһан дуу инсценировка, «Буряад хэлэнэй үдэр» г.м. мүрысөөнүүд.

Сүлөө сагтаа резидент бүхэн обсерватори гү, али һургуулиин спортзал, Тамирай заал соо теннис болон бассейн, елүүртэ өөрынгөө дураар ошодог байгаа. Энээнһээ гадна Хэжэнгын дунда һургуулиин багшанарай эмхидхэһэн мастер-классуудта, КВН, зүжэгшын һургуули, һүн дээрэ зураг зуралга г.м юумэнүүдтэ онсо дуратайгаар хабаадаа.

Танай анхаралда һанамжануудтаяа хубаалдахамнай:

“Ая ганга” нэрэтэй Кампус молодежных инноваций гэһэн халаанда ерэһэн үхибүүд зохёохы бэлигээ хурсадхаа, эрдэм шэнжэлхы хүдэлмэридэ абьяастай болоо. Эрдэм гээшэ тон шэнэ һалбари, хүнэй һонирхол, хүсэл ургуулха зүйл гэжэ мэдэрээ. Эндэ ганса һураха бэшэ, харин бэе бэетэеэ харилсаха, танилсаха, бултадаа эб нэгэн хүдэлхэ гэһэн эрилтые кампусай хүтэлбэрилэгшэ дүүрэн хангажа шадаа”- гэжэ Сэлмэг Жимбеевна Жамсуева, олониитэдэй холбоо бариха кампусай мэргэжэлтэн тобшолол хэбэ.

“Грант шүүгээд байхадаа, һайн талань гэхэдэ, һургуулидаа мүнөө үеын хэрэгсэл абаха аргатай болонобди. Мобильна компьютерна класс, проекторнуудые, компьютер болон робототехникын хэрэгсэл абахабди. Автомастерской нээхэ түсэбтэйбди,”- гэжэ Дарима Ивсталиновна Цыренжапова“Ая ганга” кампусай ударидагша(хүтэлэгшэ) хэлэбэ.

“Би “Ая ганга” кампуста ерэһэндээ ехэ баяртай байнаб. Олон нүхэдтэй болооб. Муу тала нэгэшье олоогүйб. Үглөөнһөө үдэшэ болотор бүхы саг хубаарилагданхай байгаа”- гэжэ Улаан-Үдэ хотын 17-дохи һургуулиин Елизавета Бубеева һанамжатаяа хубаалдаба.

“Энэ лагерьта аша хүбүүгээ ябуулааб. Үбэлэй амаралтань иимэ һайханаар үнгэргэһэндэнь ехэ баяртайб! Багшанарта, эмхидхэгшэдтэ үнэн зүрхэнһөө һайн һайханиие хүсэнэб”,- гэжэ Ородой-Адагай дунда һургуулиин Балданов Жамсын эжы баяраа мэдүүлээ.

“Бидэ 7-дохи “Улаалзай” бүлэгэй резидентнүүдбди. Монгол ороной нүхэдтэй болоһондоо баяртайбди. Һонирхолтой түсэлнүүдтэ хабаадаабди, олон юумэндэ һураабди. Амтатайгаар эдеээлээбди,”- гэжэ Хэжэнгын дунда һургуулиин һурагшад Цыбиков Бэлиг Тарнуева Номина хоер хэлэбэ.

"Энэ кампуста ажаллаһан бүхы багшанарта, үхибүүдтэ баяр хүргэнэб. Үнэхөөрөөл, ехын баяр, һайндэр болоо. Гол шухала юумэн гэхэдэ, үхибүүднай харилсажа һураа, шэнэ нүхэдые олоо, зохёохы бэлигтэн эндэһээ гарахал байха. Шэнэ орьёл өөдэ дабшагты!”-Ирина Рубиновна Шулунова, Кампусай ментор, техническэ эрдэмэй кандидат, ВСГУТУ -гай“Системы информатики "кафедрын доцент.

“Удаадахи мэргэжэлтэ лагериин нээлтые тэсэжэ ядан хүлеэхэбди!”- гэлдэн үхибүүд ба багшанар тараа.

Шэнэ халаан урдамнай, дахин уулзатараа баяртай!

P.S: VK «Кампус молодежных инноваций. Кижинга» гэһэн гү,али инстаграм соо kizhinga_school1 гэһэн интернедэй шүлжээндэ фото- ба видеоматериалтай танилсаха аргатайт.

Сультимова С.Ц., Хэжэнгын дунда hургуулиин

буряад хэлэ ба уран зохеолой багша.