"Мит поселок Нелемнэй"

Мит поселок Нелемнэй.

Мит поселок Нелемное оҕоой пудэнмиэдьэ чоҕосьо будиэ Чахаадан унуҥ архаа. Тии иильисьэ лэбиэ, поселок өнмиэдиэпэлэ йөмгориит оҕоой. Лигэйоонпэ пундуунуҥа, титуөн йалмэшки миэстэ. Чуөльоол модопэдэйлэ чомоодьэ оожии мэйнумльэлум, тии оожии эл мэйну. Чахаадан – мэт эмэй, миткэлэ лэгитиэнум. Одулпэ тудэл лостаабиинуҥа, тудэл титтин хамиэдьэгэн монут. Чахаадан унуҥгэлэ шоромопул йахтэриинуҥа, омосьэ аажуук шурулэшҥилэ. Унуҥ шэльгэйдоонэ, титтэл унуҥ лэгитиэнуҥа, оожииҥин пэйжиинуҥа лудун пондэпул, королькиипул, чөнчэ лэгул. Таасилэ моннуҥи:

«Оожиид-эмэй, митин лэгул кэйк,

Тэт будиэн митул омось эйрэш!»

Мит Нелемное йукоой, атахун сто шоромопул оотэй, нингэйэ национальностьпэлэк модоҥил.

Куөйпэпул – хаҥичэпул чуөльэд омниигэт нумэгэ иись эл льэнуҥи, чуөтэ йообии эйриэнуҥи: промышльайнуҥа, анил иксииннуҥилэ. Титтэл чуөльэд омнии миибэптэйлэ чумут лэйдииҥа.

Ньаадэмэ паайпэпул шахальашнуҥа одун лэбэйдиигэлэ, кэйлэбэйдиилэ, чолҕорон лэбэйдиилэ, аранпаайэ.  Анилгэт йукэлэк аануҥилэ, хаарпэлэк кэрлэшнуҥилэ.

Пугэмэ Нелемнэйгэ одун праздник «Шахадьибэ» оонуй. Одулпэ кишэнуҥа нэмдик титтэл лэйдиҥилэ национальнэй культурэгэ. Паайпэпул кишэнуҥа титтэ чэкчильгэлэ: одун лэгулгэлэ, ньиэргэлэ. Куөйпэпул кишэнуҥа ходо лосил пиэдэтин, шаашиипэ эгэтэсьтин, омось пэйжидин болас, пөлбиэлгэн мэнмэндьидин таасилэ эйэлэ омось айнудин. Таат одулпэ чумут шахальаанульэлҥи, йахтаанульэлҥи, йөмгиэнуйэ лоҥдолэ «Лоҥдо» лоҥдаанульэлҥи.

Мит анурэ уйлоол лэбиэ. Мит Нелемнэй – чиэк омосьэ поселкэк! Мит киэйэ нигийоодьэ уйл оҕоой: поньааштин одун ажуу, культура, чумут иркилльэн мит аатэй!

София Андрющенко, 7 класс