Муниципальное образование Ямальский район

Муниципальное казённое учреждение общеобразовательная школа-интернат

«Салемальская школа – интернат имени Володи Солдатова»

«Ява" лэтрамбхава"»

Автор: Пуйко Семен, 6класс

Руководитель: Салиндер Е.Н., воспитатель

2017г.

 «Ява" лэтрамбхава"»

 Ңарка ненеця″ маннсеты″: соявы  яра" мэнера", сяңара", ңани тарця ям' нида" хуңгу", нида" манэт".

   Мань Пуйкохона' иледм', халясавэй харад хэвхана. Пуйкова" невхы хардась.  Пуна ненэця мал" Салемалан ямдавы". Ирими тарем вадецетыда. Теда хардана нюм'  Салемал.

    Хусувэй по'  таңы каникулха Пуйкон' ханцетыдм': тикы невхы иринани иле я.  Ненэй мякна илесетыва". Мяни' тер″ мал″  халям хадабада″ ненэць″. Нисями ңани халям″ хадаби. Салемал' завод' няю″ халина″ мипина″.

   Ирими таня,ңарка ңацями, пенсияхана' мэ'.  Илеванда ямбан' халям' хадабада ненэцясь.

 Теда тю″ вадедана ненэцие табедамбасеты. Невхы похона манзарамамда вадецеты. Ириюни, хадахаюни ёльце сава ненэцяха": нюди' мале сян'. Тедахав маня сидна, нюти" ню", табедамсетыхы".

   Невхы иринана" ям' сямбна" таранив". Хусувэй по' таняна илевана е'эмня ява" хабто ңэбта таранив. Ява худханзо мэпнана", сяхари ханя" илеванзь' хандава"?

 Иринана", хаданана" ямданавана мальңгана мядына" хабтомбдамба сидна" табедамбсеты". Тарем мансеты": «Мядыра хабтоңэ хаера", тикы ян' ңани ңэсодава". Ңамгэхэрт пэ" тахарама", еся" лоңг, табор" хаёбту ни" тара". Хаевы табор" яна" сэв" таборңэ ханда". Ява" няна" ненбата ни тара: сяхари ңани тикы ян' ңэсодава"».

Ненсянда ңод', ямданава мальңгана, тарем сырпани, тёняңы нина" ңани мядырмамдо хабтомдамбсетыдо". Ма' алавы" табор" ңопой ян' маласетыдо", я' яд' ня" ханасетыдо".  Мань нюдя нини" ня" ңани мядыва" хабтомдасетыва". Мядыва", нерць ина" вар'  тэри хабтоңэ хаёсеты'. Тенев нивам, ңани похона ңани тикы ян' ңэсодава".

 Маня" ява"  мал маня ненэцяңэ мява" нивңа'. Маня мяна мюй халтамбина", сомбой ңэ сертабина". Сидна" ңавламбада ява" ңани тарем пэрпана" нив' тара.

   Ирими тарем мансеты: ява" ненэцядрев ңани хаңгурць' пирңада. Маня нива хаңгурмана"е'эмня,  ява" лэтрамба таранив', худханзо мэць ни тара. Тикы е'эмня маня", тю вадедана" ңацекы", ңамгэм серта пиртава"?  Манзаявада  ңарка ниңа: хусувэйва" харта пуданда таборакода"  ханая.  Тикана ява" сэвхана манэць хамзъялңгу. Теда маня" нибнана" хамеда" ява" ңамгэ савода' тара,  тикахана сяхарт' нива" хамедаңгу". Юрбана" ни тара: ява" янңамгэ ңацекэрха, ненэця" сертавы" едям' намдорңада, ява" ңоб ирле', лэтрамба' тара.