Авторская сказка " Цардис ǽмǽ уыдис Тǽрхъус"

    Цардис ǽмǽ уыдис Тǽрхъус,тынг ǽфсǽрмыгǽнаг ǽмǽ уǽздан.  Иухатт ,къабускайǽ куы бафсǽсти кǽйдǽр цǽхǽрадоны,ǽмǽ йǽ хǽдзармǽ цǽуынвǽнд куы скодта ,уǽд ǽвиппайды ауыдта Рувасы.Уый фǽцǽйцыдис хъǽдмǽ.Йǽ къухы нǽ бафтыд хъǽуы искǽй каркǽй аминас кǽнын.Уымǽ гǽсгǽ уыд тынг ǽххормаг ǽмǽ мǽстджын.
      Тǽрхъусы зǽрдǽ тǽсǽй барызти.Алидза, ǽмǽ кǽдǽм? Уалынмǽ ауыдта цыдǽр лǽгǽт ǽмǽ цǽстыфǽныкъуылдмǽ йǽ дуармǽ балǽууыд. Фǽлǽ мǽгуырǽг Тǽрхъус нǽ зыдта фыддǽр фыдбылыз ǽм кǽй ǽнхъǽлмǽ касти : лǽгǽты царди калм.Йǽ уд йǽ къухы хǽсгǽйǽ ма тǽрхъус ǽмбǽрста , ǽнǽбафǽрсгǽйǽ искǽй хǽдзармǽ цǽуын кǽй нǽй. « Салам раттын хъǽуы,-ахъуыды кодта Тǽрхъус,-фǽлǽ кǽмǽн? Кǽй зǽгъын ǽй хъǽуы , лǽгǽтǽн!»  
    Йǽ  фǽстǽгтыл ǽрбадгǽйǽ, Тǽрхъус уǽзданǽй загъта:
-Дǽ бон хорз ,уазǽгуарзон лǽгǽт! Суазǽг мǽ кǽн,дǽ хорзǽхǽй !
   Цы цин бакодта Калм, Тǽрхъусы хъǽлǽс фехъусгǽйǽ! Уый тынг уарзта тǽрхъусы фыд.
-Мидǽмǽ,мидǽмǽ!-дзуапп радта калм.Йа зǽрды уыдис Тǽрхъусы асайын.
   Фǽлǽ Тǽрхъус Калмы хъǽлǽсы уагǽй тынг хорз бамбǽрста, дывыдон арты кǽй бахаудта,уый.
-Бахатыр кǽн, кǽй дǽ батыхсын  кодтон,-загъта тǽрхъус.-Айрох мǽ ис ,не ’фсин   мǽм ǽнхъǽлмǽ кǽй кǽсы,уый.Хорзǽй баззай!-ǽмǽ уыциу тъǽбǽртт фǽкодта.
    Æрбалыгъд Тǽрхъус йǽ хуыггоммǽ ǽмǽ ахъуыды кодта,уǽздандзинад кǽй никуы никайы бахъыгдǽрдта.
   Калм,йǽхи ǽрбатымбылтǽгǽнгǽйǽ ,бахъуыр-хъуыр кодта:
-Фǽлтау ǽм куы ницы сдзырдтаин! Оххǽй,ацы уǽздан тǽрхъустǽ!Гъе ныр мǽ мидǽмǽ ǽрбахизыны бар куы нǽ ракуырдтаид,уǽд бǽгуы нǽ уыдаид!