Ямал – маня” ява’.

Ямал – маня” ява’.

Ненэць’  сояма’ яда, ханярина мэбтаӈод’,  сейхананда ӈэнгу, яханда парумбаӈгу.

Мань сояма’ ями – Ямал.

Яханани’ сян тэс ненэця” иле” – луца”, украинец”, белорус”, узбек”, хадян”. Ӈоб’ мяд’ тердарев’ савовна ниду няць  иле”, ниду’ сяӈа”. Хусувэдо’ харта вадавна лахана, тарем ӈод” нидо’ савовна хамэдамбидо’. Ненеця” манзара харвобтаду’. Сяман манзая тэсм’ ни’ я’ам.

Ямалхана соявы” ненеця” сесяту мюй” сава’, сейду лимбяка. Мяканда тюням’ ядемдаӈгуду”, ӈавлаӈгуду”. Ӈуда терси’ ниду” ӈедараӈгу”.

Ӈэрм ями’ хусувэй ельцаӈгана сава – сырэй ӈэбта, нара’, та’, ӈэрю’.

Сырэй ельцӈгана, тарем сырап’, хою тяхана ӈамгехерт яӈгода толаха, ӈоб’  терсяда то’лаха. Пэдара поӈгана мэб’, лаханакохона мэнарахан ӈэӈгун. Пэдара сэр’ панэмда сервы, ненэйтана толаха. Сыраниня  ядмаку”, тэвасику тенякоход хунбавы, нохоку няватавы. Пэдарахана, пя”  поӈгана, хоркы” лыӈгары”, сыра’ мандалакураха”.

Пэвсюмняна харп лэюрцяты, нумги” ябиресеты”.

Сырэй нум ӈацеки” ёльце харвобтаду”. Тецьдахад ехера, яля ямбан пихиня сянакода”, танабахана едэйкода”, пайдэриду ибцереӈгу’, нярьяӈгу’

Нум нарэйман малбой” маембасеты”. Яляда ямбумсеты, нумда ядемда.  Ты пэртя’ нарэйманда сер’ манзаяду  ӈокамсеты. Яхадей” ницяты, ” суляку” ӈадимсеты, ” хойн” тер”  маебцу”.

Яда, парумбада тотрев, илена пэӈгу’. Нум сармик” ядембада яхад тосеты”. Яхаку” пендгуд”.  То сэр’ ниня хохорэй”, нябэця”, ябто” хатакарта”. Сянбой яляхана яда ӈарханда падярахаӈе ханда, ӈамдэд’,пэдара’вэба”вадюда”
         Танда маня” яханана” сабе ямб ниӈа. Ӈамдэд вадюсеты, ӈодя -. мараӈга”, нисярмя”, лэмор” ӈодя”, хэбт”.

Ӈамдэдо”, ӈодя” нэнэця” пардонӈэ мэ’эйду”. Хусувэй ӈодя харта хабцям’ савудамби.

Яв няна  ненэця” халям’ хадаби”  – сюмбанг”, юдирця”, вамня”, ехена”.

Ӈэрю’ ява’ ӈарханда нярьясеты, харв”, золотэй паны” сервэраха” ӈэсяты”. Емздей”, тудуку” вадёсеты”. Тиртя сармик иба яхату” ханаць пэрӈа”.

Маня яханана нефть’, газ’ сояма ’таня. Тецьда нум, ядимбада нумд нясь сыраць”, мэбита ненеця” манзара”.

Ямал тер”, ява’ лэтамбахава”, манзарама’ пуд ям’ хабтумдамбира”, идм’ нера” нехолопю”. Ява’ хабтуӈе мэква”, и’ма’ хабту ӈэя. Нюна’ ню” е’эмня,  сава ям хаевана” е’эмня, сомбой, паской,   ям’ маниеванду”  е’эмня.  Ябда, илебяде  илея” яна’ тер’  ненэця”.