Йӕ цард - йӕ адӕмӕн нывонд

                         Йӕ цард - йӕ адӕмӕн нывонд.

       160-азы размӕ Ирыстоны зӕххыл равзӕрд, йӕ зӕрдӕйы Амраны цӕхӕр кӕмӕн сыгъди, ахӕм генион адӕймаг, сывӕллоны цӕссыгау кӕмӕн уыд сыгъдӕг йӕ уд, йӕ намыс, адӕмӕн йӕ цард нывондӕн ӕрхӕссынмӕ цӕттӕ чи уыд, ахӕм ирон гуырд -  Хетӕгкаты Къоста. Стыр хӕрзиуӕг ын балӕвар кодта Хуыцау - адӕмы уарзт ӕмӕ ӕнусон цард адӕмы зӕрдӕты.

      Бирӕ хорз ныхӕстӕ загъд ӕрцыд Къостайы тыххӕй. Бирӕ чингуытӕ йыл ныффыстой, бирӕ зарджытӕ ӕмӕ кадджытӕ, фӕлӕ уый ӕгъгъӕдыл банымайӕн нӕй.

       Хъуамӕ алы ирон адӕймаг дӕр Къостайы базона ӕмӕ бауарза нырмӕйӕ хуыздӕр. Уӕд фылдӕрӕй - фылдӕр кӕндзӕн нӕ адӕмӕн йӕ кад, йӕ цӕрӕнбон, йӕ удыхъӕд, ӕмӕ йӕ зонд та аивдӕр ӕмӕ тыхджындӕр уыдзӕн.

       Йӕ рӕстӕджы В. Г. Белинский Пушкины тыххӕй афтӕ загъта: "Всякий образованный русский должен иметь у себя всего Пушкина: иначе он не образованный, и не русский..."

       Ӕз та ацы ныхӕстӕ зӕгъын Къостайы тыххӕй: " Къостайы чингуытӕ чи нӕ бакаст, йӕ хӕдзары сӕ чи нӕ дары, уый нӕдӕр фендджын у,  нӕдӕр ирон адӕймаг у".

      Афтӕ мӕм кӕсы, ирон адӕм цас хуыздӕр зоной ӕмӕ фылдӕр уарзой Къостайы, уыйас аивдӕр ӕмӕ ӕнусондӕр уыдзысты сӕ уды фарн ӕмӕ сӕ национ фидӕн.

     Ӕз скъоладзау куы нӕма уыдтӕн, уӕдӕй фӕстӕмӕ хъуыстон йӕ кадджын ном, йӕ аив, зӕрдӕмӕдзӕугӕ ӕмдзӕвгӕтӕ. Мӕ хӕдзары ис " Ирон фӕндыр". Уый у ӕппӕтӕй зынаргъдӕр дзаума нӕ хӕдзары.  Цас хистӕр кӕнын, уыйас  тынгдӕр ӕмбарын райдыдтон Къостайӕн йӕ хъуыдытӕ, йӕ сагъӕстӕ. Ноджы ма бамбӕрстон:  мӕлӕт нӕй, адӕмы фарнӕн йӕ цард чи снывонд кодта, ӕрмӕст уымӕн.

          160-азы цӕры ирон адӕмы зӕрдӕйы Хетӕджы - фырт -   номдзыд Къоста - ирон литературӕйы бындурӕвӕрӕг, поэт нывгӕнӕг , драматург, публицист.

        Къостайы ӕмдзӕвгӕтӕ сты ӕппӕт адӕмтӕн ӕнусон фӕндаг амонӕг.                                                                                                                                                                         Кӕронбӕттӕны мӕ фӕнды ӕрхӕссын Тедеты Ефимы ныхӕстӕ:       " Къоста чысыл адӕмы фырт куы нӕ уыдаид, уӕд хъуамӕ ацы ӕмдзӕвгӕйы ныхӕстӕ: " Весь мир - мой храм, любовь моя святыня, Вселенная - Отечество моё," - фыст уаиккой Иугонд нациты организацийы къӕсӕры сӕрмӕ ӕнусон фӕндаг амонӕджы хуызы ӕмӕ сӕ дариккой Хуыцауы арфӕйау."

        Стыр бузныг Къоста, дӕ ном ӕнустӕм цӕрӕд ирон адӕмы ӕмӕ дунейы дзыллӕты зӕрдӕты.

                          Гусаты Д.         7  кълас

                                     2019 аз