Багшанартаа доро дохином

Багшанар, тандаа дохином

«Орёо хүндэ багшын мэргэжэлтэйт,

Оньhыень таан оншотой алхалнат,

Олон шабинараа тэгшэхэн энхэрнэт,

Оролдосын hэшхэлээр орьёлдо зоригжуулнат».

Ц.Номтоев

         Би - В.Б.Сагановай нэрэмжэтэ Харбяангуудай hургуулиин  9 классай hурагшаб. Манай hургуулида 11 багша ажаллана. Тэдэ булта ондо ондоонуудшье hаа, булта үхибүүдтэ, өөрынгөө ажалда дуратай. Тэрээгээрээ адли болоно гээшэ.

Багша бүхэн тухайгаа нэгэ хэдэн үгөөр хөөрэһүү. Манай классай хүтэлбэрилэгшэ Майя Александровна ород ба буряад хэлэ 16 жэл соо Харбяангуудай hургуулида заана. Энэ багшын бэлдэhэн hурагшад олимпиада, конференци ба мүрысөөнүүдтэ эдэбхитэй хабаададаг, түрүү hууринуудые аймаг соогоо  эзэлжэ байдаг.

Физикын багша Валентина Базыр-Жаповна хахад наhаяа багшаар ажаллана. Мүнөө хүдэлжэ байhан багшанар сооhоо эгээл наhатай, эгээ ехэ дүй дүршэлтэй багша болоно.

Дарима Иосифовна истори ба обществознани манда заадаг. Һонирхолтой хоёр нээмэл хэшээл үнгэргөөд байна.

Мүнөө жэл манай hургуулида дүрбэн шэнэ багша ерээ: Римма Доржеевна, Светлана Петровна, Павел Кузьмич, Елена Бадмаевна. Эдэ багшанар хэшээлнүүдээ һайнаар заана. Физкультура – манай хүбүүдэй эгээ дуратай хэшээл, харин Павел Кузьмич тэдэнэй эгээл дуратай багшаниинь болоно. Эдэ шэнэ багшанарнай манай hургуулида удаан ажаллаhай даа гэжэ бидэ, hурагшад hананабди.

Октябриин гурбанда бидэ, 9 классай hурагшад багшанарайнгаа орондо хэшээлнүүдые үнгэргөөбди. Тиигээд би багшын ажал тухай иигэжэ хэлэхэ байнаб: ехэл харюусалгатай, хүнгэн бэшэ ажал байна даа. Бэеэ шэмхэжэ туршаад лэ, багша болохо хэрэгтэй гэжэ залуу үетэндэ хэлэхэеэ hананаб.

Багшанартаа амжалтые, hайн hайханиие хүсөөд, доро дохином.