Стихотворение по произведению А.Созаева "Акь сыртдан манга дери - сени ауазынг"

 «Акъ Сыртдан манга дери-сени ауазынг» деген чыгъарманы окъугъандан сора жазылгъан назму.

1.Мамыр жашап тургъан халкъгъа

  Къыйынлыкъ келди.

  Зауаллы парий Тутар да

  Палахны сезди.

             Тынгысызды кёкде ай,

             Шош къарайды, жылтырай.

             Тынгысызды тёгерек.

             Бу палах кимге керек?

Тутар тёшден къарайды,

Кёзлери жана:

«Эл нек тебе болмаз?»-деп.

Кече- къап-къара.

              Танг атаргъа машинала

              Алдыла элни.

              Аскерчиле айланалла

              Къармай юйлени.

Парий кёрдю машинаны

Юйню аллында.

Иесини апчыгъаны

Аны халында.

              Экиси да бетден-бетге

              Къарап къалдыла.

             Эки таза, халал жюрек

              Къучакълашдыла.

Бурчакъ-бурчакъ кёз жашлары

Акъдыла аны.

 Къыркъылдыла жаш санлары

Жарлы Ачаны.

            Тутар не этерге билмей,

            Бир кесек турду.

            Эс жыйып, халал иени

            Ызындан болду.

Машинаны женгил жетип,

Иесин тапды,

Битеу болгъан кючюн жыйып,

Чархланы къапды.

             Машинагъа бек илинип,

             Бир кесек барды.

             Къарыуу ташлап, ычхынып,

             Жерде сойланды.

Ёрге къобаргъа кюрешди,

Алай къарыу жокъ.

Аягъы къыяулу болду

Анга мадар  жокъ.

            Сюркеле, тырнакълай, парий,

            Акъ Сыртха чыкъды.

            Халкъыны ызындан къарап,

            Жиляп, ашырды.

Бар сарнаула ёчюлдюле.

Алам шошайды.

Энди парий жюрекледе

Сарнау башланды.

              Жиляу жырын айта, парий

               Юйюне кирди.

               Сыннган бешикни кёргенде,

               Жюреги сынды.

Парий жиляу эте эди,

Ууалгъан бешикни жиляуун,

Халкъ бешикни жиляуун,

Туугъан от жагъаны жиляуун.

2. Къуругъан тау элни

    Экинчи тангы атды

    Март айны тангы

    Морт сыннган айны тангы

    Оту сууугъан айны тангы

    Къуту къуругъан айны тангы.

   Танг хар замандача, къанатларын жайып

   Къудуретни жангырта, жарыта

   Жырлата келмеди бу жол.

   Кеси кесин тюе келди,

   Къанатлары кюе келди.

   Келди да, элни башындан къарады.

   Юйлени терезелеринде кесини

   Уллу кёзлерин къоя

   Арбазлагъа, зыбыр къол аязларын сала.

   Танг, жауа-жауа, шош жиляды.

   Эл анасыча жиляды танг,

   Насыпсыз анача.

   «Жаз башы ёсерми энди бу жерде?»-деп,

    сагъышланды танг.

    Акъ Сыртдан а анга жууапха

    Тутарны жыры эшитилди:

    Дунияда бар жырладан мудах жыр

    Бар жиляуланы унутдургъан жыр.