Келькте, келькте, шачем уженяй!

            Муниципальный конкурс творческих работ на тему:

            «Мордовия. Здесь Родины моей начало».

Келькте, келькте, шачем уженяй!

Сёрмадозе Ковылкина ошень

4-це общеобразовательнай бюджетнай школань

6-це класса тонафнись

Родькин Кириллсь.

Проверязе мокшень кялень

тонафтысь

Житаева Лариса Леонидовнась.

Ковылкино, 2015

                                 Келькте, келькте, шачем уженяй!

Мон эрян эсь модазень лангса!

Катк сембонди саты сонь кшиц,

И топодемс вестьке аф андсы

Монь ваймозень сонь мазышиц.

                                 В. Нестеров.

Мон шачень Ковылкина ошса,  мокшень семьяса, тянь инкса марян оцю гордость, мес шачень Мордовияса,  семьяса, коса фкя лаца кельгсазь кода мокшень, станя и рузонь кяльть.  Конашкава павазуван, мес эрян тя райскяй уженяса. Илякс аш кода лемдемс ня васттнень.

Мон тядязень и алязень мархта эрян Ковылкинаса, а щавазе эряй Од Толку велеса. Ёфси кудонц ваксса оцю садоц, аф ичкозе няеви вирсь. Тундаста сявомок кизоньберьф морайхть нармоттне, кожфсь арудонга-ару, и сяшкава тёждяста тарксесак ваймоцень! Мазышить лангс ваномста тотназеви седице.

 Сембе каникуланень ётафнесайне велеса. Щавазе мянь рахсесь лангсон: «Цёрай, школаса нинге пайгонясь цинняй урокста, а тон кенереть ни тяза пачкодемс. Кинди сяда лажадоть, лефкскяй, тейнек щятяцень мархта или соксненди да тялонь вирти?»

А кода аф лажадомс тялонь вирти,  тяшкава мазы сембе перьфпяльти? Тейне  тяса тялонда аф  якшама,  кизонда аф пси. Сембе перьфпяльсь тялода акша щамса щаф, щуфттне лешафт. Молят вирьге соксса, ёфси ёфкссат. Аф кулят нармонь морот, аф няят мазы панчфт, а седисот сяка кати-мезень кенярдема, марнек учат кодама-бди оцю ила. Кодак лиси шинясь – цифторгоды лешсь сельминголет разнай тюсса тёжянень тяштеняса – кенярдемати ваймоце потмозт аф тяльги, сембе вирть келес ювадемаце сай: «Ванода, конашкава тяса цебярь!» Весть ни мярьгонь тядязти сявомда школаста документонень да ётафтомс Од Толку. Ужяль, сёлгозь тястонь школать, тяни шабатне якайхть Момалаевав, усксесазь автобусса мянь кафкса вайгяльбет. Мон уже содаса, мзярда касан, тонафнян, обязательна саяян эряма вели.

Якан шачем ширеняван,

Мярьгат ёфксс сувань.

Крайняй, мархтот весть аф яван,

Эзгат тапан ян.

Кизонь сембе каникулатнень дуганозень мархта тожа ётафнесаськ Од Толкуса. Даниланьге мялезонза велеса эрямась.  Лисят щавазень вальмалу, а инголет пиндолды парьхцикс  няеви Рябка ляйсь. Мянцеви-шаронды, бта ёрай няевомс нинге сяда мазыста. А сонць тошказь-тошкай, терди эсот: «Мес ащат аш кашт молезь? Сак сяда куроконя, чопафтт ару веднязон, эжентть беряксон лямбе шуварнять лангса, кочкак вийня-эрьгяня». Ну кода тяда меле аф комотемс мялень салай лямбе ведняти?!

А конашкава мазыхть минь виреньке сёксенда! Золотань тюсса валовихть келуфне, тумотне. Якстерь, тюжя тюсса архтовихть пизел кярьмасне. Тяса кизоть коряс сяда кржа нармонь вайгяльда, но и сёксень вирьса нармоттне аф лотксихть эрямда. Аньцек кулхцонтт и марясак, кода читорды сязьгатась, марнек ёмла молатканяса калтыи шуфттненди шякшатась. Пангта тяса эрь кизоня – пефтома!

Тят нолгада, кочкак. Щавазе фалу корхни; «Кельгость, цёраняй, вирть и ванфтость. Сон вдь эрек, семботь марясы, семботь кульсы. Вирь маласа мзярдовок аф юмат: сон и щатанза, и трятанза, и пчкафттанза».

Пяк кельгса велеса перьфпяльть, а Ковылкиназень кельгса  сонцень мазышиц инкса.

Хоть ошсь нинге од Мордовиянь лия ошнень коряс, но сон шиста-шис касы и келеми, и мазоми. Цебярьгофтозь ваймамань паркть. Тяни тяса кели кинятнень крайгя ащихть скомнянят, озак, ваймосек. Кизоньберьф панжихть мазы панчфт. Панчфта лама аф аньцек паркса, а марнек ошень ульцятнень эса. Сембе ульцятне видет, аруфт, эсост касыхть лама шуфтта, сянкса няевихть пяк цебярьста. Ошть кармасть мазопнемонза  лама этажса од куттне, конат строявихть пяк курокса, разнай тюсонь кирпицьсста. Ётай кизоть панжевсь  идень од садик «Сказка» бассейна мархта, торговай центрат, спортивнай комплекст. Оцю мяль шарфневи шабатнень школаса тонафнемаснон и ваймамаснон лангс, шумбрашинь ванфтомать лангс. Кие аф содасы «Сосновый бор» идень санаториять или «Мокша» санаториять. Синь ащихть пцтай ряцок Мокша ляйть лангса пиче вирь потмоса мазыдонга-мазы вастса.

Мон азондан шачема вастозень колга. А кода фкявок валня аф азомс Мордовиять  столицанц, Саранскяйть, колга? Вдь кие хоть весть ульсь тяса, сон уже мзярдонга аф юкстасы Россиять седи кучкаса ащи мазы ошть. Вага кода корхтась сонь колганза И.Девин:

Касы минь столицаньке,

Касы шиса-веса.

Содасазь столицаньконь

Тяни масторбеса.

Столицаньконь содасазь сембе масторбеса аф аньцек мазышинц инкса, но и цебярь, ляпе седи, кели вайме, инжиень кельги ломанензон инкса. Сембе мирсь содасыне минь олимпийскяй чемпиононьконь, великай скульптороньконь, космонавтоньконь, флотоводецоньконь и ламотнень лиятнень.

Седиса- ваймоса кельгса шачема масторозень и марян оцю гордость инксонза.

Кельгома Мордовия! Нинге сяда каст, кемокстак и катк фалу ули вельхкссот ару сенем менельсь.