Рассказ "Минии эжы эгээл hайхан"

Рассказ

Минии эжы эгээл hайхан

        Дэлхэй дээрэ эгээл hайхан, үнэтэй үгэ эжы гээшэ. Эжы, эжы…Ямар гүнзэгы удхатай  энэ богонихон үгэ  гээшэб! «Эжытэй хүн эльгэ дүүрэн» гэлсэдэг. Энэнь тон зүб. Эжытэйл  хадаа би баяртайб, хүхюутэйб, жаргалтайб. Минии эжы Светлана Цыденжаповна гэжэ нэрэтэй. Эжымни Улаан-Одоной hургуулиин дарга, буряад  хэлэнэй  багша тон харюусалгатай ажалтай, хүн бүхэндэ хүндэтэй,  олон нүхэдтэй  юм.

        Би эжыдээ ехэ дуратайб. Эжымни сагаан сэдьхэлтэй, зөөлэн, хүндэмүүшэ зантай,  ходол уринаар энеэжэ ябадаг, уран гартай,  элдэб гоёор намдаа юумэ нэхэдэг, зураг зураха дуратай, хамаг юумэ шадаха, мэдэхэ юм. Эжымни хэнhээшье  амтатайгаар эдеэ бэлдэдэг,  харин эжынгээ бариhан олаади  одоол эдихэ дуратайб. Би эжыгээрээ омогорхожо, жэшээ абажа ябадагби.

        Эжымни намайе ходо эрхэлүүлдэг, дулаан үгэнүүдээр магтадаг, зүб бурууем заадаг, hанаhан юумыемни дэмжэдэг, үшөө юун хэрэгтэйб даа намда. Би эжыдээ туhалдагби, эжытэеэ хамта  аяншалха дуратайб.

        Эжыгээ хододоо хүндэлжэ ябагты, гурбан зөөлэнөөр үргэгты, гомдохоонгүй үдэр бүри баярлуулжа ябыт даа гэжэ бултанда ханданаб. Эжыгээ Мартын 8-най hайндэрөөр амаршалаад, удаан жаргал , ута наhа үреэнэб. Эжыдээ энэ зохёоhон шүлэгөө  зорюулнаб.

Эжы

     Энээхэн дэлхэй дээрэ намайе түрөөл,

                                      Эгээл hайхан эжымни.

                                      Альган дээрээ тэнжээгээл,

                                      Эдыхэн наhатай болоторни.

                            hайхан, урихан шарайтай,

                                      hаруул сэлмэг бодолтой,

                                      hара нарандал сэбэрхэн

                                      hайхан hанаатай эжымни.

Цыбикжапова Таня  Хориин 1-дэхи дунда hургуулиин  5-дахи классай hурагша