Ме косъя, талун эскыны мед позис..

Пожöг МБОУ «СОШ»-са велöдчысь Шахова Мария Михайловналöн коми литератураысь творческöй  удж (сочинение)

Сочинение тема: «Ме кöсъя,талун эскыны мед позис…» (А.Е.Ванеев)

У

»

«Ме кöсъя,талун эскыны мед позис…» (А.Е.Ванеев)

(Сочинение- мöвпалöм.)

… «Ме кöсъя,талун эскыны мед позис»…Ме чайта, мый быд морт збыльысь олö тайö му вылас тырбур олöмöн, кытчöдз эскö бурас да кöсйö тайö олöмсьыс мыйкö бурмöдны, мичмöдны, сöвмöдны..Ме коми морт. Чужи Эжва йывса коми сиктын и тані кöсъя водзö на быдмыны-бордъясьны войвывса лэбач моз…. Сьöлöмкылöмöс тшöкыда восьта аслам кывбуръясын. Со «Киö босьта рöмпöштан» гижöдöй.

Киö босьта  рöмпöштан,

Видзöдча ме дыр,

Чужанінöй менам тан,

Кöні джуджыд кыр,

А кыр йылас керка эм,

Менам чужан поз.

Быдмис тані Шахов рöд,

Менам дона йöз.

Кекур сиктöй видзöдчö

Эжва-рöмпöштанö…

Рочакань кодь кажитчö

Сылöн чужöмбаныс…

Помтöг радейта ассьым чужан сиктöс.…И кöсъя, талун эскыны мед позис, мый эм менам Пожöг сиктлöн аскиа лун. А медым олöмыс тані вöлі бурджык, миянлы, том йöзлы, колö отсавны чужанінлы лоны дзоньвидзаöн.Аслам  сочинениеын ме видла не сöмын петкöдлыны сиктса олöмысь  медшöр мытшöд-вина юöм,коді ёна дойдö менсьым сьöлöмöс,, а вöзъя кутшöмсюрö асшöр мöвп,кыдзи татчöс олöмсö позьö вöчны бурджыкöн.

.Некод оз кöсйы лоны сы кодьöн…Алкоголик... Олöмысь лэдзчысьöм морт. Сылы ставыс веськодь: семья, челядь, матыссаяс. Пасьтасьöма кыдзи веськалö, ылісянь на кылö лёк дук… И ми вешъям бокöджык. Зывöктам. Лыддям асьнымöс наысь бурджыкöн, вежöраджыкöн, сöстöмджыкöн.Тайö жö алкоголик…И сöмын корсюрö думыштлам,кыдзи та выйöдзыс лэдзчысис.

…Коми йöз шулöмаöсь: «Коді вина юö, сылöн доныс чинö. Код юраыдлы ставыс тшак ва»,»Винатö он помав, морттö винаыд помалас.»

 Некод оз кöсйы лоны сы кодьöн… Но мыйсянь ставыс заводитчö? Öти румкасянь. Медводдза румкасянь. Кодлыкö сійöс мыччöны асьныс бать-мам кага бурдöдöм могысь.Шуам, гаръя вина, прöстудаöн висигöн. Либö, кыдзи ошйысьöны ёртъяс, выль во дырйи шампанскöй.13-14 арöса тшöтшъя пöвстын зэв нин этша коли сэтшöмыс, коді вомас курыдторсö эз на босьтлы.А мыйла юöнысö? Кодкö тöдмасьöм ради, мый пö тайö винаас сэтшöмыс эм? Кодкö ёртъяс водзас асьсö петкöдлöм ради. Ті пö он лысьтöй, бать-мамысь поланныд, а ме ог пов. Ещö öд и кутшöм компанияын бергалö мортыс.Став ныв- зонмыс кö пиво юöны, тэ öд абу жö «рыжöй».Первой видласьöны гусьöн, сэсся оз нин ёна некодысь повны. Мукöдыс лыддьöны, мый танцы вылö садь юрöн пырны- яндзим.Юöмыд кö- став кодьыс.Сэсся «Контактö» пукталöны юан фотояссö öта-мöдлы ошйысьöм могысь, комментируйтöны: «Бара нин код», «алкоголикъяс», «миянлы кольыштöй жö».Но мовпыштлö-ö тайö здукас миян тшöтшъяным, мый водзö олöмыс вермас лоны сэтшöм, кыдзи  сочинение заводитчигöн гижöма?...Алкоголикöн лоны некод на пöвстысь оз кöсйы!

 …Менам эм уна ёрт. Öти классын велöдчысьяс, öти кружок- секцияö ветлысьяс, «Контактса» ёртъяс. Абу ставныс найö юысьяс. Зэв нимкодь, мый унджыкыс на пöвстысь- водзмöстчысь йöз. Кодкö петкöдчö спортын, кодко гижö кывбуръяс, пырöдчö уна сикас конкурсö, ветлö ылі походъясö гожöмнас. А кодкö прöста бура велöдчö да кöсйö тöдны нöшта унджык. Петкöдлö бур тöдöмлун  олимпиадаясын.

  Шуам, ас йылысь кö, ме збыльысь велöдча сьöлöмсянь.Пырöдча школа да район олимпиадаö, гижан конкурсъясö. Йöзöдчывлі нин «Йöлöга» да «Парма гор» газетъясын.. Меным тайö сьöлöм серти, меным тайö интереснö

Чужанінын  бать кодь гымыс,

Ропкö сöмын,но оз дойд.

Чужанінын шоныд лымйыс,

Весиг бурдöдö зэр войт.

Чужан сиктын ставыс дона,

Чужан муын ставыс ас,

Нöшта кöсйыся зэв ёна

Кольны ассьым югыд пас….

 А мед кольны ас бöрсяыд сöмын югыд пас, колö уджавны ас вылад талунсянь нин..Сідзкö, садь олöмö медводдза воськов-  корсьны сэтшöм  кружок либö спортивнöй секция, кöні тэнад мыйкö бура артмö либö кöсъян мыйöкö велöдчыны. И зэв ёна скöрмöдö, кор мукöдыс шуöны, овнысö пö гажтöм. Быттьö кодкö бокысь воас да кутас гажöдны миянöс. Школаын со эм дзюдо, волейбол секцияяс.Кöсъян кö пуысь вöчасьны- позьö РЦДО-ö ветлыны. Нöшта унаторйö на позьö велöдчыны асланым школаын.

        Дерт, окота, мед менам тшöтшъяяслы сетісны  унджык позянлун видлыны да тöдмавны асьнысö. Ме чайта, мый колö торъя шöрин, коні эськö специалистъяс уджалісны юысь бать-мамкöд.Од на вылö видзöдöмöн ёнджыкасö и юсьöны велöдчысьяс.Мед сэні эз пинявны, а шуам, отсалісны аддзыны удж.Нуöдісны кутшöмкö конкурсъяс.Позис юксьыны проблемаясöн. Зэв ыджыд буртор- сиктын вичко восьтöм. Но уна-ö том йöз талун ветлöны сэтчö? Зэв на этшаöн. Сы вöсна, мый миянлы унатор на абу гöгöрвоана. Колö воскреснöй школа. Мед ичöтсянь позис тöдмасьны духовнöй культураöн..Лоны сöстöмджыкöн.Зэв бур, мый гожöмъяснас вичко бердын уджалісны школьнöй бригадаяс, отсасисны вичко дзоньталігöн. Пуктісны ассьыныс пай.

. Колö кутшöмкö культура шöрин. Мед позис велöдчыны колана ног  асьтö кутны йöз пöвстын, мичаа пасьтасьны, мед сэні позис дасьтысьны профессия бöрйигкежлö. Мед воссисны  интерес серти клубъяс. А гожöмъяснас  позис уджавны, аслыным нажöвитны сьöм.Дерт, эмöсь школьнöй бригадаяс, но найö уджалöны енджыкасö июнь  тöлысьын.А окота, мед гожöмбыд, стройотряд сяма, отувъя программаöн.

 Некод оз кöсйы лоны алкоголикöн…Ме гöгöрвоа, мый кöсйöмыс тані вывті уна.Унатор абу миян сайын. Но унатор и ас саяд.Шуам, бöрйыны аслад девизöн «Вина ютöг олöм- тайö интереснöй олöм!» Корсьны интерес серти кружок?! Вермана.Ёртъяскод  футбол, лыжиöн исласьöм котыртны?! Вермана! Со тай неважöн на муніс миян сиктын республикаса том войтырлöн «Йиркап» спортивнöй гаж.А öд сійöс дасьтöмö кымын енбиа сиктса йöз пай пуктісны.Тшöтш и миян школаса велöдчысьяс. Примерсö   босьтны налысь, коді писькöс вежöра, интереснöй, кыпöдан характера?! Вермана…А важ йöзыдлысь шуöмтö пыдди пуктыны колö…Винатö пö он помав, а морттö винаыд помалас…А босьтчыны кö ассяньным.?!!! Сэки талунсянь нин позьö эскыны,мый сиктын олöмыс лоö гажаджык, югыдджык. Сы вöсна мый тайö садь видзöдласа олöм. А тайö- бур олöмлöн крепыд вужйыс. Ме кöсъя, талун эскыны мед позис…А.Е.Ванеевлöн шуöм кывъясыс колана да ышöданаöсь.