Минии уг нагаса – гэр бүлымни омогорхол

Тематическое направление – «Илалтата Сталинградые хамгаалга, суута Курскын байлдаан»

Тема сочинения – «Минии уг нагаса – гэр бүлымни омогорхол»

Жанр сочинения – сочинение – повествование

Минии нэрэ Бэлигмаа. Би, мүн намтай суг һурадаг нүхэд дайн дажар тухай юумэ ехэ һайн мэдэхэгүй байнабди. Үни хада Эсэгэ ороноо хамгаалгын дайн дүүрээ. Тиибэшье тэдэнэй эрэлхэг зориг, баатаршалга тухай бидэ ходо һанажа ябахабди. Юундэб гэхэдэ, мүнөө сагай амгалан байдал тэдэнэй габьяа болоно ха юм.

Минии гэр бүлэдэ сэрэгшэ бии. Бидэ тэрэ сэрэгшээрээ ехэтэ омогорходогбди. Энэ минии уг нагаса - эжымни хүгшэн абань болоно. Би уг нагаса тухайгаа хөөрэжэ үгэхэеэ һананаб.

Минии уг нагаса  Банзаракцаев Борис Баторович 1924 ондо Гэдэн уулын хойморто, Зэдэ голой эрьедэ, Гэдэн нютагта түрэһэн юм. Гэр бүлэдөө зургаан үхибүүд бэлэй.

1942 ондо нютагайнгаа хүбүүдээр сэрэгэй албанда татагдажа, Шэтэдэ залуу сэрэгшын һургуули гараһан байна. Тэрэнэй һүүлээр, нэгэ хэды саг соо түмэр замай станцида автоматчигуудай отделениин ахалагшаар алба гараа. 1943 оной эхеэр уг нагасамни зургаан һараар уһанай сэрэгэй һургуулида татагдаа. Тиигээд сэрэгэй захиралтаар хүндэ уһан соо ябадаг сэрэгшын һургуулида эльгээгдээ. Зуун хорин сэрэгшэдһээ орой хорин табан сэрэгшэд тэрэ һургуулида ороһон байгаа. 1944 ондо үбгэ эсэгыемни Дунай мүрэнэй флотили эльгээгээ. Аварийна абарагшын отрядта алба гараа. Түргэн ябадалтай катернуудаар Румыниин Сулик хото руу тэдэниие эльгээһэн байна. Эндэһээл уг нагасымни дайшалхы зам эхилһэн юм. Австри, Болгари, Венгри, Чехословаки гүрэнүүдые сүлөөлсэһэн түүхэтэй.

Илалтын үдэр Венэһээ холо бэшэ Колостатбург хотодо угтаа һэн. Дунай мүрэнэй сэрэгэй флотто 1947 оной май һара болотор алба гараа. Һүүлдэнь Балтиин флотто эльгээгдээ. «Страшный» гэһэн эскадронно миноносец дээрэ сэрэгэйнгээ алба үргэлжэлүүлһэн байна. 1948 ондо гэр бүлынгөө шалтагаанаар албаяа түгэсхэһэн байна.

Уг нагасамни үндэр наһатай болотороо ажаһуугаа. Ном уншаха ехэ дуратай байһан. Хүдөөгэй номой сангһаа сүүмхээр дүүрэн номуудые абаад ерэгшэ бэлэй гэжэ эжымни һанан, һанан хөөрэдэг.

Би уг нагаса тухайгаа олон мэдээсэлнүүдтэй танилсааб, уншааб, эжымни хөөрэжэ үгөө. Үнэн зүрхэнһөө уг нагасадаа  – Банзаракцаев Борис Баторовичта – баярые, һайниие хүргэнэб.

Хүндэтэ уг нагасамни,

Та – манай герой, манай ветеран!

Манай бага наһа хадагалаат!

Росси гүрэнииемнай хамгаалаат!

 Агууехэ илалта шэрэлсэһэн габьяа ехэтэ сэрэгшэдтэй хамта минии уг нагаса гэдэргээ сухарингүй ябалсаһан байна. Бидэ, залуушуул, тэрэнииень һайн ойлгожо, эрхимээр һураха ёһотойбди!