Районный конкурс сочинений на бурятском языке «Алтан гуурһан - Хүйһөөрөө холбоотой тоонтомни».

На районный  конкурс сочинений на бурятском языке

 «Алтан гуурһан - Хүйһөөрөө холбоотой тоонтомни»

«Нютагайм шарай»

Би мүнөө аба эжыһээнь, хамта һурадаг нүхэдһөөнь, гэртэһээнь холын газар ошоод байнаб. Нэгэдэхи ангиһаань эхилжэ, волейболоор ехэтэ һонирхожо, эдир тамиршанай харгы шэлэнхэйб. Саг болоод лэ Сотниковын һургуулиин, Ивалгын аймагай, Буряад Уласай нэрэ һүлдые дээшэнь үргэжэ, хаа хаанагүй мүрысөөнүүдтэ хабааданабди. Эдэ үдэрнүүдтэ Алас Дурна зүгэй чемпионадта хабаадахаяа, холын Хабаровск хото ошоод байнабди. Утын харгыда поездоор гаража, Ородой Холбоото Уласай олон можо нютагуудые хараабди. Поездын зогсоходо, буугаад, вокзал дээгүүр ябажа үрьдинэбди.

Аянда ябахада гоё юм аб даа. Һонин юумэ харахаш, һонирхолтой ушарнуудшье болохо. Харин боро хараанай буухада, поездын аалин түршэгэнөөндэ дууража, нойртоо диилдэхэ хоорондоо гэртэхинээ, гэрээ һанаандаа оруулхаш. Энэ сагта эжы аба ажалһаань гэртээ бусажа, галаа түлихэ, амтатайхан сайгаа нам үгыгөөр уухань, - гэжэ һанаад, гэнтэ гэртээ бусаха дуран хүрэшэнэ. Нэгэ бага уйдаад абанаб. Намай хүгшэн абадаа адли, үглөө, үдэшэ бүхэндэ «Һайхан сайгаа ууя даа», - гээд ходо хэлэдэг байгааш, гэжэ эжы хөөрэдэг. Тэрэнээ мүнөөшье алдаагүй зандаа, шэнэ шанагдаһан сайда үдхэн һүү хэжэ, халууншье гэжэ мэдэхэгүй, уудагби. Хүгшэн эжы намайгаа багаһаань үхэрэй үдхэн һүүндэ дуратай байһыемни мэдэхэ хадаа, хододоо хүдөөһөөнь Малаадайнгаа һү эльгээхые оролдодог. Зундаа хууха бутылкэ соо хэжэ, хүргөөд, үбэлдөө багахан сада ниисхэ соо мондогороор һү хүргөөгөөд эльгээдэг юм. «Хүгшэн абын Эрхүүдэйдэ», - гээд заримдаа мэшээгтэ бэхээр бэшэнхэй байдаг.

Халуун сай уужа һуухадаа, абынгаа тоонто нютагые һанахаш даа. Амаралта бүхэндөө Мэлэ нютагаа ошодог байгаабди. Зундаа үбһэндэнь ошохош. Теэд техникын хүсөөр үбһэ хулһан хуряагдадаг болоходоо, ехэнхидээ хүгшэн эжытэеэ газаа досоогуур ажал хэлсэхэш. Малаадайгаа өөрөө һааха дуратайб. Үглөө үдэшэндөө хүгшэн эжымни һүнэй дээжэ нютаг орондоо мэдүүлхэ. «Харыш даа, ямар гоё үдэр мандахан гээшэб, али ямар аалин, зохид үдэшэ буубаб даа», - гээд хэлэхэ. «Нютагай шарай ямаршье сагта гоё, сэдьхэлдэ дулаан байдаг», - гэхэ.

Декабриин арбан хоёрон болотор волейболоор мүрысөөн Хабаровск хотодо үнгэрхэ. Тэрэнэй һүүлээр үбэлэй амаралта дүтэлхэнь. Заал һаа Мэлдээ айлшалаад, хүгшэн эжы абадаа эрхэлээд, нютагайнгаа шарайгаар сэдьхэлээ баясуулаад ерэхэб.

Александра Жапова,

Сотниковын дунда һургуулиин 6 «Ж» ангиин һурагша.